နိုဝင်ဘာ ၈ ရက်တွင် ကျင်းပမည့် ရွေးကောက်ပွဲ အတွက် ကြိုတင်မဲပေးကို ကော်မရှင်အဖွဲ့ခွဲရုံးတွင် လုံခြုံရေးရဲဖြင့် ထားသော်လည်း ရာနှုန်းပြည့် စိတ်မချရမှု မရှိကြောင်း သိရသည်။
အောက်တိုဘာ ၂၉ ရက်မှ နိုဝင်ဘာ ၇ ရက်ထိ မနက် ၈နာရီ မှ ညနေ ၆နာရီထိ အသက် ၆၀နှစ် အထက် သက်ကြီးရွယ်အိုများသည် နိုဝင်ဘာ ၈ရက် ကျင်းပမည့် ရွေးကောက်ပွဲအတွက် ကြိုတင်မဲများပေးနေရပြီဖြစ်သည်။
ထို့ကြောင့် ကြိုတင်မဲပုံးများကို သက်ဆိုင်ရာ ရပ်ကွက် ကျေးရွာအုပ်စု ကော်မရှင်အဖွဲ့ခွဲတွင် သာ ထားရှိပြီး၊ သတ်မှတ်ထားသည့် လုံခြုံရေးရဲ များရှိသော်လည်း ရာနှုန်းပြည့် စိတ်ချရသည်အရာ မရှိကြောင်း သျှမ်းပြည် ရွေးကောက်ပွဲ ကော်မရှင်ခွဲ ဥက္ကဌ ဦးထင်ကျော် က သျှမ်းသံတော်ဆင့်ကို ပြောသည်။
“သတ်မှတ်ထားတဲ့ လုံခြုံရေး ရဲတွေတော့ ရှိပါတယ်။ စိတ်ချရလား ဆိုတာကတော့ ရာနှုန်းပြည့် စိတ်ချရတယ်ဆိုတာ ဘယ်ဟာမှ မရှိဘူး။ ဖြစ်သွားလို့ ဘယ်တတ်နိုင်မလဲ မဖြစ်သွားအောင်လို့တော့ ထားရတာပေါ့။ စိတ်ချရတယ်ဆိုတာကတော့ ဘယ်အရာမှ မရှိပါဘူး။ ကိုယ့်ကိုယ်က တောင်အစိုးမရတာ။ အနာဂတ်ဆိုတာ တွေးနေလို့မရတာ။ လုပ်စရာရှိတာတော့ လုပ်ထားပြီးပြီ ” ဟု ဦးထင်ကျော် က သျှမ်းသံတော်ဆင့် ကိုပြောသည်။
၂၀၂၀ အထွေထွေရွေးကောက်ပွဲ ကျင်းပသည့်ကာလ မြန်မာနိုင်ငံတွင် ကိုဗစ်-၁၉ ရောဂါ ဖြစ်ပွားမှုနှုန်းမှာ တစ်နေ့ထက် တစ်နေ့ မြင့်တက်နေပါသည်။
ထို့ကြောင့် သက်ကြီးရွယ်အိုများအတွက် ကြိုတင်မဲပေးခြင်းသည် အကောင်းဆုံးနည်းလမ်းဖြစ်သော်လည်း ကြိုတင်မဲသည် အလိမ်အညာဖြစ်မည်ကို စိုးရိမ်သဖြင့် တောင်ကြီးမြို့မှ အသက် ၆၀ နှစ်အထက် သက်ကြီးရွယ်အိုများက မဲမပေးချင်ကြကြောင်း သိရသည်။
“ကြိုတင်မဲ ဆိုတာ က နာမည်ဆိုးနဲ့ ရှိနေတော့ ပေးရင် မှန်ကန်မှုရှိမလား။ နောက် ကြိုတင်မဲကို စိတ်ချတဲ့နေရာမှာ ထားမှာလား။ ညကျရင် ကိုယ့်မဲကို လာပြီးတော့ လှဲသွားမှာဆိုတဲ့ အတွေးတွေရှိတယ်။ ဒါ့ကြောင့် အခုထိ ကြိုတင်မဲ မပေးသေးတာပါ” ဟု သျှမ်းပြည် မြောက်ပိုင်း လားရှိုးတွင် နေထိုင်သည့် အသက် ၆၇ နှစ် အရွယ် ပါ့မြရင် က ပြောသည်။
ကြိုတင်မဲ နှင့် ပတ်သက်ပြီး များသောအားဖြင့် စိုးရိမ်ပူပန်မှုကြားက ကြိုတင်မဲကို ပေးနေရသူများလည်း ရှိကြောင်း သိရသည်။
သို့သော် သျှမ်းပြည်တောင်ပိုင်း လင်းခေးခရိုင် မိုင်းပန်မြို့နယ်တွင် အသက် ၆၀ အထက် ကြိုတင်မဲပေးမည့် မဲဆန္ဒရှင် (၂၀၀၀) ကျော်ရှိပြီး၊ ကြိုတင်မဲထားသည့်နေရာ လုံခြုံမှု ရှိကာ စိတ်မပူရကြောင်းလည်း ရှမ်းတိုင်းရင်းသားများ ဒီမိုကရေစီ အဖွဲ့ချုပ် (SNLD)ပါတီ မိုင်းပန်မြို့နယ် ပြည်သူ့လွှတ်တော် ကိုယ်စားလှယ်လောင်း စိုင်းကျော်ခိုင်က သျှမးသံတော်ဆင့်ကို ပြောသည်။
“မဲပုံးကတော့ လုံခြုံပါတယ်။ တစ်ချို့နေရာ ကော်မရှင်ရုံးမှာထားတယ်။ တစ်ချို့ကျတော့လည်း ကော်မရှင် ဥက္ကဋ္ဌ အိမ်မှာ ထားပါတယ်။ ခွဲထားပါတယ်။ မဲပုံးတွေကတော့ လုံခြုံမှု ရှိပါတယ်။ ဘာမှ စိတ်မပူရပါဘူး” ဟု စိုင်းကျော်ခိုင် က ပြောသည်။
ယမန်နေ့ မိုင်းပန်မြို့နယ်မှာ ကြိုတင်မဲ လာပေးသည့် မဲဆန္ဒရှင် လေးပုံ တစ်ပုံ သာရှိပြီး ကျေးရွာတွေမှာလည်း ကြိုတင်မဲပေးခြင်း နှင့် ပတ်သက်ပြီး စိုးရိမ်မှု မရှိကြောင်း ပြောသည်။
“ကျနော် လိုက်ကြည့်တာတော့ ရွာတိုင်းအဆင်ပြေပါတယ်။ ကြိုတင်မဲရဲ့ အတိုင်းအတာအရဆိုရင်တော့ တရားမျှတမှုရှိပါတယ်။ မဲပုံးသိမ်းတာလည်း လုံလုံခြုံခြုံလေး ရှိပါတယ်။ မဲပုံးများတဲ့ မဲရုံတွေမှာလည်း အစောင့်တွေ ချထားပါတယ်။” ဟု စိုင်းကျော်ခိုင် ကပြောသည်။
ထို့အပြင် မဲစာရင်း ၂ ကြိမ် တိုင်တိုင် ကြေညာရာမှာလည်း တစ်ချို့ မဲဆန္ဒရှင်များ မိမိ မဲစာရင်းကို သွားရောက် ကြည်ရှုခြင်း မရှိသည့်အတွက် ကြိုတင်မဲ ထည့်သည့်နေရာတွင် အခက်ခဲများ ကြုံတွေ့ရကြောင်း မဲရုံစောင့်များက ပြောဆိုကြသည်။
“ဒီနေ့ ကြုံတွေ့ရတဲ့ အခက်က အသက် ၆၀ အထက် ကြိုတင်မဲပေးတဲ့ နေရာမှာ မဲဆန္ဒရှင်စာရင်း ကြေညာချိန်မှာ မိမိစာရင်းကို သွားမကြည့်တဲ့အတွက် နောက်ဆက်တွဲ ပြဿနာက နာမည်စာရင်း ပြန်ရှာရပြီး အချိန်ကြာမှုတွေ ဖြစ်ခဲ့တယ်။ အချိန်ကြာသွားရင် နောက်လူအတွက်လည်း အချိန်ကြန့်ကြာမှုတွေ ဖြစ်တယ်။ မဲဆန္ဒရှင် တစ်ဦးဟာ မဲပေးတဲ့နေရာမှာ ၁၀ မိနစ် အချိန်ရပါတယ်။ စာအိတ်ထဲပါ ထည့်ရရင် တစ်ရက်ကို ကျနော်တို့ ဘယ်လောက်ထည့်နိုင်မလဲဆိုတာ ရေတွက်လို့ရပါတယ်” ပင်လုံမြို့ အတွင်းရှိ မဲရုံစောင့် အမျိုးသး တဦး ကပြောသည်။
ကြိုတင်မဲပေးရာမှာ ကျန်းမာရေး နှင့် အားကစား ဝန်ကြီးဌာန က ထုတ်ပြန်ထားသည့် စည်းကမ်းချက်အတိုင်း လက်ဆေးခြင်း ၊Mask တပ်ဆင်ခြင်း နှင့် လူစုလူဝေး မဖြစ်အောင် စီစဉ်ရကြောင်း သက်ဆိုင်ရာ တာဝန်ရှိသူများက ပြောဆိုကြသည်။
၂၀၂၀ ပါတီစုံ ဒီမိုကရေစီ အထွေထွေရွေးကောက်ပွဲ ကျင်းပရန်အတွက် ၈ ရက်သာ ကျန်တော့ကြောင်း ၊ ရွေးကောက်ပွဲရက်တွင် ကျန်းမာရေး နှင့် အားကစား ဝန်ကြီးဌာန ထုတ်ပြန်ချက်အရ လူ ၃၀ ဦးထက် ပိုမို စုဝေးခြင်း ကို ခွင့်ပြုထားကြောင်း သိရသည်။
