သျှမ်းပြည်တွင် Quarantine ဝင်နေသူ များ ၂၀၂၀ ရွေးကောက်ပွဲအတွက် ကြိုတင်မဲပေးခွင့်ရှိသည်ဟုဆိုသော်လည်း နယ်သား/ဒေသခံ မဟုတ် (ဧည့်စာရင်းဖြစ်နေ) ပါက မဲပေးရန် ခက်ခဲကြောင်း သတင်းရရှိသည်။

၂၀၂၀ ပါတီစုံ ဒီမိုကရေစီ အထွေထွေရွေးကောက်ပွဲ ကျင်းပရန် ၁၅ ရက်သာကျန်ရှိချိန်၊ မြန်မာနိုင်ငံတဝှမ်း ကိုဗစ်-၁၉ ကူးစက်မှုနှုန်းသည်လည်း တရက်လျှင် တထောင်ကျော် တိုးလာနေပါသည်။ အလားတူ သေဆုံးသူဦးရေ မှာ လည်းမြင့်တက်လာပါသည်။

ကိုဗစ်-၁၉ သံသယလူနာ နှင့် ကိုဗစ်-၁၉ လူနာနှင့်ထိတွေ့သူများလည်း တရက်လျှင် ထောင်ချီရှိနေကြောင်း သိရသည်။

ထို့ကြောင့် ရွေးကောက်ပွဲ မတိုင်ခင် Quarantine ဝင်နေသူများနှင့် ကိုဗစ်-၁၉ လူနာအတွက် ကြိုတင်မဲပေးနိုင်ရန် ပြည်ထောင်စု ရွေးကောက်ပွဲ ကော်မရှင်က စီစဉ်ထားသည်။
တစ်ခြားမြို့နယ်မှ လာပြီး တောင်ကြီးမြို့နယ်တွင် Quarantine ဝင်ရပါက ကြိုတင်မဲ ပုံစံ ၁၅ ကိုလျှောက်ထား နိုင်သော်လည်း မဲပေးနိင်ရန် အတွက် အခက်အခဲအနည်းငယ် ရှိကြောင်း သျှမ်းပြည် ရွေးကောက်ပွဲ ကော်မရှင် အတွင်းရေးမှူး ဦးဇော်မြင့်ဝင်း က သျှမ်းသံတော်ဆင့်ကို ပြောသည်။

“ နယ်မြေကျော်ကလာပြီး Quarantine ဝင်ရင်တော့ မဲဆန္ဒရှင်ရဲ့ ပုံစံ ၁၅ ကို သက်ဆိုင်ရာမြို့နယ်ကနေ Email, Fax နဲပို့ရတာ လွယ်ပေ့မဲ့ မဲလက်မှတ်ကတော့ သက်ဆိုင်ရာမြို့နယ်ကို ပို့လို့မရဘူး ” ဟု ရွေးကောက်ပွဲကော်မရှင် အတွင်းရေး မှူး ဦးဇော်မြင့်ဝင်းက ပြောသည်။

အလားတူ တစ်ခြားမြို့နယ်မှ လာပြီး Positive လူနာဖြစ်ပါက မဲပေးနိင်ရန် အခက်အခဲရှိကြောင်းလည်း ဦးဇော်မြင့်ဝင်း က ဆိုသည်။

တောင်ကြီးမြို့နယ်တွင် Quarantine ဝင်ထားရသူများ ကြိုတင်မဲပေးနိုင်ရန်အတွက် အောက်တိုဘာ ၂၅ ရက် ပုံစံ (၁၅) နောက်ဆုံးလျှောက်ထားရမည် ဖြစ်သည်။

“တောင်ကြီးမြို့နယ်မှာ Quarantine ဝင်လာတဲ့သူတွေက ၂၅ ရက်နေ့ နောက်ဆုံးထားပြီး ကြိုတင်မဲ လျှောက်ထားလို့ရ မယ်။ တခြားမြို့နယ်ကနေပြီးတော့ Quarantine လာဝင်ရင်တော့ မဲပေးဖို့တော့ ခက်ခဲမှုရှိမယ်” ဟု ဦးဇော်မြင့်ဝင်း က သျှမ်းသံတော်ဆင့်ကိုပြောသည်။
ကြိုတင်မဲပေးကို အောက်တိုဘာ ၂၉ ရက်မှစပြီး နိုဝင်ဘာ ၄ ရက်နေ့ထိ မဲပေးနိင်ကြောင်းသိရသည်။

ထိုကြိုတင်မဲပေးနိင်ရန်အတွက် Quarantine ဝင်ထားသူများ၊ မသန်စွမ်းသူများ နှင့် အသက် ၆၀ နှင့် အထက်ရှိသူများကို ဦးစားပေးစီစဉ်ထားပေးသည်ဟုလည်း သိရသည်။
ထို့ကြောင့် ကြိုတင်မဲကို အောက်တိုဘာ ၂၉ ရက်တစ်ကြိမ် နှင့် နိုဝင်ဘာ ၂ ရက်နေ့ တစ်ကြိမ် ကောက်ယူသွား မည်ဖြစ်ကြောင်းသိရသည်။

တောင်ကြီးမြို့နယ်တွင် Quarantine center ဝင်ထားသူ စုစုပေါင်း (၇၀၀) ကျော်ရှိကြောင်း မြို့နယ်အုပ်ချုပ်ရေးမှူး ဦးဖြိုးမင်းထိုက် ကပြောသည်။