မိုးရာသီရောက်တိုင်း တောင်ပေါ် မြေနီလမ်းဟာ ရွှံ့နွံထူထပ်ပြီး လမ်းပန်းဆက်သွယ်ရေးခက်ခဲမှုတွေ နှစ်စဉ်နှစ်တိုင်း ကြုံတွေ့နေရပါတယ်။
ရွှံ့နွံထူထပ်တဲ့လမ်းမှာ ဖိနပ်ချွတ် ၊ ထဘီ ကို ဒူးခေါင်းလောက်အထိ မ တင် ပြီး မဲဆန္ဒရှင်လူထုဆီကို ခက်ခက်ခဲခဲ အရောက်သွားနေသူကတော့ နန်းမြထွေးပါပဲ။
နန်းမြထွေး ဟာ ရှမ်းတိုင်းရင်းသားများ ဒီမိုကရေစီ အဖွဲ့ချုပ်( SNLD) ပါတီကို ကိုယ်စားပြုပြီး ၂၀၂၀ ပါတီစုံ ဒီမိုကရေစီ ရွေးကောက်ပွဲမှာ သျှမ်းပြည်တောင်ပိုင်း လွိုင်လင်မြို့နယ် မဲဆန္ဒနယ်အမှတ်(၂) ပြည်နယ်လွှတ်တော်ကိုယ်စားလှယ် နေရာမှာ ဝင်ရောက်ယှဉ်ပြိုင်မယ့် သူတဦးဖြစ်ပါတယ်။
သူမဟာ ပြီးခဲ့တဲ့ ၂၀၁၅ ခုနှစ်ကလည်း အဲဒီနေရာကနေ ဝင်ရောက်ယှဉ်ပြိုင်ခဲ့ပြီး အနိုင်ရရှိတဲ့ သူတဦးလည်း ဖြစ်ခဲ့ပါတယ်။
လွှတ်တော်သက်တမ်း ၅ နှစ်အတွင်းမှာ လုပ်ငန်းဆောင်တာတွေဆောင်ရွက်ခဲ့ရတာ အားရကျေနပ်မှု မရှိခဲ့သေးကြောင်း၊ မပြီးပြတ်သေးတဲ့ လုပ်ငန်းတာဝန်တွေကို ဆက်လက်ဆောင်ရွက်လိုတာကြောင့် ပြန်လည်ဝင်ရောက် ယှဉ်ပြိုင်ခြင်း ဖြစ်ကြောင်း နန်းမြထွေး က ပြောပါတယ်။
“ ကျမ အနေနဲ့မပြီးပြတ်သေးတဲ့ ကိစ္စရပ်တွေကို ပြန်လည်ဆောင်ရွက်ချင်တဲ့အတွက် ပြန်ဝင်ရောက်ယှဉ်ပြိုင်ရခြင်း ဖြစ်ပါတယ်” လို့ နန်းမြထွေး က ဆိုပါတယ်။
မိသားစုဝင်တွေရဲ့ အားပေး ထောက်ပံ့မှု ကူညီမှု တွေတာ မပါခဲ့ရင် သူမလည်း နိုင်ငံရေးလောကထဲမှာ ကောင်းမွန်စွာ အလုပ်လုပ်နိုင်မှာမဟုတ်ကြောင်း ၊ အခုလိုလည်းဘဲ လွှတ်တော်ကိုယ်စားလှယ်နောက်တကြိမ် ဝင်ရောက်ယှဉ်ပြိုင်နိုင်မှာ မဟုတ်ကြောင်းလည်း နန်းမြထွေး က ပြောပါတယ်။
လွှတ်တော်သက်တမ်းတလျှောက် မဲဆန္ဒရှင် ပြည်သူတွေရဲ့ ကိစ္စကို မလစ်ဟင်းအောင် ကူညီဆောင်ရွက်ပေး နိုင်တာကလည်း မိသားစုဝင်တွေကြောင့်ပါလို့ သူမက ဆိုပြန်ပါတယ်။
သူမ ဝင်ပြိုင်မယ့် မဲဆန္ဒနယ်မှာ တိုင်းရင်းသားမျိုးစုံ ပါဝင်နေထိုင်ကြပြီး တောင်ပေါ်ဒေသ၊ လမ်းပန်းဆက်သွယ်ရေးခက်ခဲတဲ့ ကျေးလက်ဒေသ ၊ အဖက်ဖက်က ဖွံ့ဖြိုးမှု အားနည်းတဲ့အရပ်ဒေသတခု ဖြစ်နေပါတယ်။
လက်ရှိမှာ မြန်မာတဝှမ်းလုံးကိုဗစ်-၁၉ ကူးစက်မှုနှုန်းတနေ့ထက် တနေ့မြင့်တက်လာပြီး၊ ကိုဗစ်-၁၉ ကာကွယ်တားဆီးရေး ကော်မတီမှ ရွေးကောက်ပွဲ ထုတ်ပြန်ချက်ဟာ ရွေးကောက်ပွဲ ဝင်ရောက်ယှဉ်ပြိုင်မယ့် လွှတ်တော်ကိုယ်စားလှယ်တွေ အတွက် အဟန့်အတားဖြစ်နေပါတယ်။
အခုလည်း မဲဆွယ်စည်းရုံးရေးအတွက် တိုတောင်းတဲ့ကာလမှာ ကိုဗစ်-၁၉ ကူးစက်မှုကလည်း တနေ့ထက်တနေ့ မြင့်မားလာနေတဲ့အတွက် သူမအနေနဲ့ ၂၀၂၀ ရွေးကောက်ပွဲအတွက် မဲဆွယ်စည်းရုံးရေးခရီးစဉ်ဟာ အရင်တကြိမ်ကထက် အဆပေါင်းများစွာ ခက်ခဲပင်ပန်းနေတယ်လို့ သူမက နွမ်းလျသံနဲ့ ပြောပြပါတယ်။
“ ကျမတို့ အားခဲထားတာက တနေရာမှာ လူတွေအများကြီးစု ပြီးတော့မှ ဟောပြောပွဲတွေလုပ်မယ်။ ဒါမယ့် ကိုဗစ် ၁၉ ကြောင့် ကျန်းမားရေးက ထုတ်ထားတဲ့စည်းကမ်းချက်အရ လူစုလူဝေးလုပ်လို့မရဘူးဆိုတော့ ကျမတို့ အခက်ခဲ တွေ့နေရတယ်” လို့ နန်းမြထွေး က ဆိုပါတယ်။
ရွေးကောက်ပွဲ ကော်မရှင်က ထုတ်ထားတဲ့ စည်းကမ်းချက်တွေထဲမှာ ဘုန်းကြီးကျောင်းတွေ အစိုးရပိုင် အဆောက်အအုံ တွေမှာ ဟောပြောပွဲ ကျင်းပခွင့် မပြုပါဘူး။
ဒါ့ကြောင့် နန်းမြထွေး တို့ မဲဆွယ်စည်းရုံးရေးအဖွဲ့တွေ ဟာ ကျေးရွာပြည်သူတွေကို အေးမြတဲ့အရိပ်ရ ပင်အောက် ကိုခေါ်ယူပြီး စည်းရုံဟောပြောနေချိန် အစိုးမရတဲ့ သဘာ၀ မိုးကြောင့် ရွှဲရွှဲစိုစိုနဲ့ ဟောပြောမှု တွေ ဆက်တိုက်လုပ်ရတဲ့ ရက်တွေလည်း ရေတွက်လို့မရတော့ပါဘူး။
“ မိုးရေစိုခံရပြီး ဟောရတယ်။ နေမကောင်းတာတွေလည်းရှိပေမယ့် မဲဆွယ်စည်းရုံးရေးကတော့ ဆက်လုပ်နေရတာပဲလေ” လို့ နန်းမြထွေး က ပြောပါတယ်။
နန်းမြထွေး ဝင်ရောက်ယှဉ်ပြိုင်မယ့် နေရာဟာ မြေယာပြဿနာ၊ လမ်းပန်းဆက်သွယ်ရေးပြဿနာ၊ ဆေးရုံဆေးပေးခန်း မလုံလောက်မှုတွေ ရှိတဲ့နေရာ၊ တရားမျှတမှု ကင်းဝေးနေသေးတဲ့ ဒေသတခုဖြစ်ပါတယ်။
ပြည်သူလူထု အများဆုံးတင်ပြလာတဲ့ ပြဿနာ ကတော့ မြေလွတ်၊ မြေရိုင်း ပြဿနာပဲ လို့နန်းမြထွေးက ပြောပြပါတယ်။
သျှမ်းပြည်သူတွေ ဘိုးစဉ်ဘောင်ဆက် မြေယာ လုပ်ကိုင် စိုက်ပျိုးစားသောက်လာခဲ့ကြတာ နှစ်ပေါင်းများစွာရှိခဲ့ပြီး၊ အဲဒီမြေယာတွေဟာ မြေယာပိုင် ပုံစံ (၇) မရှိထားတဲ့အတွက် အဖွဲ့အစည်းကျောထောက်နောက်ခံပြုထားတဲ့သူတွေက ပုံစံ(၇) လျှောက်ပြီး လာရောက်ကျူးကျော် စိုက်ပျိုးလုပ်ကိုင်စားသောက်နေတာတွေလည်းရှိနေတာကြောင့် ဒေသခံ ပြည်သူတွေ နစ်နာဆုံးရှုံးကြရကြောင်း နန်းမြထွေး ကရှင်းပြပါတယ်။
ဒါ့ကြောင့် တချို့သော ဥပဒေ တွေဟာ ပြည်သူဘက် မရပ်တည်တဲ့ ဥပဒေ ဖြစ်နေသေးတဲ့အတွက် လွှတ်တော်အမတ်ထပ်ဖြစ်ခဲ့ရင် နန်းမြထွေးအနေနဲ့ သက်ဆိုင်ရာဌာနနဲ့ ပူးပေါင်း ညှိနှိုင်းပြီး ပြည်သူလူထုပိုင် သဘာဝပတ်ဝန်းကျင်ကိုထိန်းသိမ်းမယ့်ဥပဒေဖြစ်လာအောင် လွှတ်တော်ကနေ ပြင်ဆင်ဆောင်ရွက် သွားမယ်လို့လည်း သူမက ပြောပါတယ်။
ဒါ့ကြောင့် မဲဆန္ဒရှင်တွေရဲ့ အခက်အခဲတွေကို လွှတ်တော်ထဲကနေပြီး ဆက်လက် ဖြေရှင်းသွားချင်တဲ့ ဆန္ဒကြောင့် ရတဲ့အချိန်လေးကို တန်ဖိုးထားပြီး မိုးမရှောင် နေမရှောင် ၊ ရွှံနွံကိုလည်းမမှုအားတော့ဘဲ နေ့နေ့၊ညည မဲဆန္ဒရှင်တွေဆီကို အရောက်လှမ်းပြီး မဲဆွယ်နေတာဖြစ်ကြောင်း၊ နိုဝင်ဘာ ၈ ရက်ကျရင် ကျားခေါင်းပါတီ ကိုယ်စားပြုတဲ့ သူမကို မဲပေးဖို့ မမေ့ကြဖို့တိုက်တွန်းလိုကြောင်းလည်း နန်းမြထွေး က ပြောဆိုလိုက်ပါတယ်။
