သျှမ်းပြည်မြောက်ပိုင်း ကျောက်မဲမြို့နယ်အတွင်း တိုက်ပွဲများ ငြိမ်သက်နေသဖြင့် စစ်ဘေးရှောင်များ မိမိနေရပ်သို့ ပြန်သွားကြပြီဖြစ်ကြောင်း စုံစမ်းသိရှိရသည်။
စစ်ဘေးရှောင်ပြည်သူများ (၂၀၀၀) ကျော် သည် အောက်တိုဘာ (၁၈)ရက် တွင် နေရပ်သို့ ပြန်သွားကြပြီဖြစ်ကြောင်း ကျောက်မဲမြို့နယ် မဲဆန္ဒနယ်အမှတ်(၁) လွှတ်တော်ကိုယ်စားလှယ်လောင်း နန်းအိမွန်အောင် က သျှမ်းသံတော်ဆင့် ကိုပြောသည်။
“၂၀၀၀ ကျော်လောက်တော့ ပြန်သွားကြပြီ။ ၃၀၀ လောက်ပဲ ကျန်မယ်။ တချို့နေရာမှာလည်း စစ်တပ်ရှိမယ်။ တချို့နေရာတော့ မရှိတော့ဘူး။ နောင်ဆင် တော့ရှိတယ်။ မြစ်ဘေးက ရွာဖြစ်နေတော့ အဲ့နားလေးမှာ စစ်တပ်က ရှိနေတယ်။ အဲ့ရွာတော့ သူတို့ မပြန်သေးဘူး” ဟု လွှတ်တော်ကိုယ်စားလှယ်လောင်း နန်းအိမွန်အောင် ကပြောသည်။
နေရပ်ပြန်သည့် စစ်ရှောင်များသည် ပုံဝိုးကျေးရွာ ၊ကွန်ဟင်ကျေးရွာ၊ တောင်ထိပ်ရွာ ၊ ကောင်းလန်းကျေးရွာ နှင့် နောင်ကွမ် ကျေးရွာများမှရွာသားများဖြစ်ကြကြောင်း သိရသည်။
“ခုလက်ရှိက ၃ ကျောင်းလောက်ပဲ ကျန်မယ်။ အဲ့ ၃ ကျောင်းက စစ်တပ်ဘက်က ရွာထဲမှာ ရှိနေသေးလို့ သူတို့က မပြန်သေးတာ။ ကျန်တဲ့ဟာကတော့ အကုန် ပြန်ပြီ” ဟု နန်းအိမွန်အောင် ကပြောသည်။
ယနေ့ အောက်တိုဘာ (၁၉) ရက်မှာ တိုက်ပွဲဖြစ်သည့် ကျေးရွာများကို တာဝန်ရှိသူများက ကွင်းဆင်းစစ်ဆေးသွားမည်ဖြစ်ကြောင်း သိရသည်။
“တိုက်ပွဲအခြေနေတော့ ပြောလို့မရဘူး။ သူတို့ရဲ့ စိတ်က ခန့်မှန်းလို့မရဘူး ဗုံးတွေများ ထားကောင်းထားနိုင်တယ် ရှိကောင်းရှိနိုင်တယ်။ ဒါက ကိုယ့်ရဲ့ သုံးသပ်ချက်ပေါ့။ ဒါမယ့် ဒီနေ့ သွားပြီးတော့ စစ်ဆေးမယ့် အဖွဲ့တွေ ရှိတယ်” ဟု နန်းအိမွန်အောင် ကပြောသည်။
တိုက်ပွဲငြိမ်သက်နေသော်လည်း အစိုးရစစ်တပ်၏ တပ်သားများက ရွာမှ မထွက်ခွါပေးလျှင် စိုးရိမ်စရာ ရှိနေကြောင်း ဒေသခံများကပြောဆိုကြသည်။
“ စစ်ရှောင် အားလုံးနီးပါးပြန်ပြီ၊နမ့်မဟင်ကျေးရွာက အိမ်တွေ တော်တော်များများ မွှေနှောက်ခံ ထားရတယ်။ ပျက်စီးနေတယ်” ဟု နမ့်မဟင်ကျေးရွာမှ နန်းလှက သျှမ်းသံတော်ဆင့်ကိုပြောသည်။
အစိုးရတပ်မတော်သည် နမ့်မဟင်ကျေးရွာအတွင်းသို့ တပ်စခန်းချကာ ဒေသခံနေအိမ်ထဲသို့ ဝင်ပြီး အဝတ်အစားများမွှေနှောက် ယူဆောင်သွားခြင်း၊ စားသုံးကုန်ပစ္စည်းများယူဆောင်သွားခြင်းတို့ရှိကြောင်း နန်းလှ ကပြောသည်။
“ ရွာထဲဝင်လာတော့ ကျွဲတွေသေတယ်။ ကြက်တွေလည်းမရှိတော့ဘူး။ အိမ်ထဲမှာလည်း ရစရာမရှိအောင် ရှာပြီးယူသွားတယ်” ဟု နန်းလှ က ဆိုသည်။
ကျောက်မဲမြို့နယ်အတွင်း အောက်တိုဘာ ၂ ရက်မှ စပြီး ၁၁ ရက်ထိ အစိုးရတပ်မတော်နှင့် ရှမ်းပြည် ပြန်လည်ထူထောင်ရေးကောင်စီ၊ ရှမ်းပြည်တပ်မတော်(RCSS/SSA) တို့သည် တိုက်ပွဲများ ဖြစ်ပွားခဲ့ပြီး ရပ်ရွာနေအိမ်အတွင်း လက်နက်ကြီးများ ကျသဖြင့် ဒေသခံလူထု ထိခိုက်ဒဏ်ရာရ၊ ဆုံးရှုံးမှုများ ရင်ဆိုင်ခဲ့ရသည်။
အစိုးရတပ်မတော် နှင့် RCSS/SSA တို့ တိုက်ပွဲကြောင့် စစ်ဘေးရှောင် ပြည်သူ ၃၅၀၀ ကျော် ရှိခဲ့ ကြောင်း သိရသည်။
လက်ရှိအချိန်သည် သီးနှံဆွတ်ခူးသည့် အချိန်ဖြစ်သဖြင့် တိုက်ပွဲများ မဖြစ်စေချင်ကြောင်း၊ စစ်ကြောင်းများလည်း နောက်ဆုတ်ပေးမှသာလျှင် စစ်ရှောင်များ နေရပ်ပြန်နိုင်မည်ဖြစ်သဖြင့် တိုက်ပွဲများ မဖြစ်ပွားစေရန်၊ တိုက်ပွဲများ လုံးဝရပ်တန့်ပေးရန် စစ်ရှောင်များက တိုက်တွန်းတောင်းဆိုလိုက်သည်။
Leave a Comments