မြောက်ပိုင်းမဟာမိတ်တပ်ဖွဲ့ဝင် TNLA နှင့် SSPP တို့အကြား ဖြစ်ပွားသော တိုက်ပွဲကြောင့် သျှမ်းပြည် မြောက်ပိုင်း နမ္မတူမြို့နယ် ကျေးလက်ဒေသခံ ၅၀၀ ကျော်နေရပ်မှ ထွက်ပြေးတိမ်းရှောင်နေရသည်ဟု သိရှိရသည်။
၂၀၁၈ မေလ ၄ ရက်နေ့မှစ၍ ဖြစ်ပွားသော စစ်ရေးပဋိပက္ခကြောင့် အိမ်ခြေ ၈၀ ရှိ နားဆန်းရွာသူ ရွာသား ၁၈၄ ဦး နှင့် အိမ်ခြေ ၁၈ အိမ်ရှိ လောက်လုံကျေးရွာသူရွာသား ရ၁ ဦး တို့က မိုင်းရင်ရွာမ အရှေ့ဘက် ၂ မိုင်အကွာရှိ ပန်ခမ်းကျေးရွာ ဘုန်းကြီးကျောင်းသို့ထွက်ပြေးခိုလှုံခဲ့ကြသည်။
ထို့အတူ အိမ်ခြေ ၁၇ အိမ်ရှိ နားပျဲန်း ရွာသူရွာသား ၆၀ ကျော်ကလည်း ၀ိန်းနန်ကျေးရွာ ဘုန်းကြီးကျောင်းသို့ လည်းကောင်း အသီးသီး တိမ်းရှောင်ခိုလှုံကြသည်။
မိုင်းရင်ရွာမ ဘုန်းကြီးကျောင်းတွင် အမျိုးသမီး ၁၅၈ ယောက်၊ အမျိုးသား ၆၃ ယောက်၊ မိသားစု ရ၃ စု ရောက်ရှိခိုလှုံနေကြောင်း လူမူကူညီကယ်ဆယ်ရေးအသင်းက ဆရာ စိုင်းဘဉာဏ်က ပြောသည်။ ၄င်းအပြင် နီးစပ်ရာ ဆွေမျိုးများ မိတ်ဆွေများအိမ်တွင် ခိုလှုံနေကြသည်များလည်းရှိကြောင်း ဆိုပါသည်။
အဆိုပါ စစ်ဘေးရှောင်များမှာ ၀မ့်ကုန်းမုန့် ၊၀မ့်အိုင်၊ ၀မ့်ဆာလုံ၊ ၀မ့်ဆာအွန် ရွာတို့မှ ရွာသူရွာသားများဖြစ်ကြသည်။ မေလ ၄ ရက်နေ့တိုက်ပွဲကလည်း ၀မ့်ဆာအွန်ရွာသို့ လက်နက်ကြီးကျည်ကျရောက်မှုကြောင့် ရွာသား ၂ ဦး ကျည်စ ထိမှန်ဒဏ်ရာရရှိခဲ့ကြသည်။
မြောက်ပိုင်းမဟာမိတ်တပ်ဖွဲ့ဝင် အချင်းချင်းဖြစ်ကြသည့် TNLA နှင့် SSPP တို့အကြား မေလ ၄ ရက်နေ့ က တိုက်ပွဲဖြစ်ပွားခဲ့ကြသည်။
၄င်းနှင့်ပတ်သက်ပြီး မဟာမိတ်ဖြစ်သည့် TNLA က အင်အား ၅၀၀ ကျော်ဖြင့် နမ္မတူမြို့ အရှေ့မြောက်ဘက်ရှိ ၄င်းတို့ ယာယီတပ်စခန်းအား လာရောက်တိုက်ခိုက်ခြင်းဖြစ်သည်ဟု SSPP က သတင်းမီဒီယာ များအားဖြေကြားပြောဆိုသည်။
သို့သော် TNLA ဘက်က အဆိုပါ တိုက်ပွဲ အကြောင်း အောက်ခြေတပ်များ အစီရင်ခံခြင်းမရှိကြောင်းသာ မီဒီယာ များသို့ပြောသည်။
TNLA နှင့် SSPP တို့သည် UWSA ၀ တပ်ဖွဲ့ ဦးဆောင်ဖွဲ့စည်းထားသည့် မြောက်ပိုင်းမဟာမိတ် တပ်ပေါင်းစု တွင် ပါ၀င်နေသည့် လက်နက်ကိုင်အဖွဲ့များဖြစ်သည်။ နေပြည်တော်အစိုးရ ဦးဆောင်ဖေါ်ဆောင်နေသည့် တနိုင်ငံလုံးအပစ်အခတ်ရပ်စဲရေးစာချုပ် NCA တွင်လည်းပါ၀င်မပါ၀င်ပေ။
