သျှမ်းပြည် အရှေ့ပိုင်း မိုင်းတုံ၊ မိုင်းဆတ်တွင် ကိုဗစ်-၁၉ ကူးစက်ခံရသူ (၃)ဦးရှိသဖြင့် ကိုယ်စားလှယ်လောင်းများ မဲဆွယ်ခွင့်ရပ်နားထားရကြောင်း စုံစမ်းသိရသည်။
အောက်တိုဘာ ၁၂ရက်မှ အောက်တိုဘာ ၁၄ ရက်ထိ သံလွယ်အရှေ့ခြမ်း မိုင်းတုံမြို့ တွင် ကိုဗစ်-၁၉ ကူးစက်ခံရသူ ကားသမား ၁ ဉီး ကျန်းမာရေး၀န်ထမ်း ၁ ဉီးနှင့် မိုင်းဆတ်မြို့တွင် ကားသမား ၁ ဦးတွေ့ရှိပြီးနောက် အောက်တိုဘာ ၁၄ ရက်မှ စတင်ကာ နိုင်ငံရေးပါတီများ မဲဆွယ်စည်းရုံးမှုကို ခေတ္တရပ်ဆိုင်းထား ကြောင်း ထိုနေရာတွင် ဝင်ရောက် ယှဉ်ပြိုင်မည့် လွှတ်တော်ကိုယ်စားလှယ်လောင်းများ ကပြောသည်။
ကိုဗစ်-၁၉ ပိုးတွေ့လူနာ တွေ့ရှိပြီးနောက် ကျေးရွာလူထုက မဲဆွယ်စည်းရုံးမှုများကို လက်မခံ တော့ဟုဆိုသဖြင့် ရပ်နားထားရခြင်းဖြစ်ကြောင်း ရှမ်းတိုင်းရင်းသားများ ဒီမိုကရေစီ အဖွဲ့ချုပ်( SNLD)မှ မိုင်းဆတ်မြို့နယ် မဲဆန္ဒနယ် အမှတ် ၂ တွင် ဝင်ရောက်ယှဉ်ပြိုင်မည့် စိုင်းဝဏ္ဏ က သျှမ်းသံတော်ဆင့်ကိုပြောသည်။
“မိုးဆတ်မှာ တဦးပိုးတွေ့တာကြောင့် ရွာဘက်တွေက ကျနော်တို့ကို မဲဆွယ်ဖို့ ရွာထဲပေးမဝင်တော့ဘူး။ ကော်မရှင်တွေ၊ အုပ်ချုပ်ရေးမှူးတွေ ပိတ်တာတော့ မဟုတ်ဘူး။ ” ဟု စိုင်းဝဏ္ဏ က ပြောသည်။
ထို့အတွက် ကိုယ်စားလှယ်လောင်းများမဲဆွယ်စည်းရုံးရေးဆင်းမှုနောက်ကျသဖြင့်အခက်အခဲများ ရှိနေကြောင်း ၄င်းက ဆက်ပြောသည်။
“ ကျနော်တို့ မဲဆွယ်ဆင်းဖို့နောက်ကျတာတွေဖြစ်လာတယ်။ သူတို့က စောင့်ကြည့်ဖို့ပြောတယ်။ အခြေအနေကောင်းရင်တော့ ကျနော်တို့ကို ဆက်သွယ်လာမယ် လို့ပြောတယ်။ ” ဟု စိုင်းဝဏ္ဏ ကပြောသည်။
အလားတူ မိုင်းတုံမြို့တွင်လည်း ကိုဗစ်-၁၉ လူနာ ၂ ဦး အထိရှိလာနေပြီဖြစ်သဖြင့်ကိုယ်စားလှယ်လောင်းများ စည်းရုံးရေးဆင်းမှု ရပ်ထားကြောင်း ရှမ်းတိုင်းရင်းသားဒီမိုကရေစီ အဖွဲချုပ်(SNLD) မှ မိုင်းတုံမြို့ နယ် ပြည်သူ့လွှတ်တော် နေရာတွင် ဝင်ရောက်ယှဉ်ပြိုင်မည့် နန်းအုန်းဖြူ က သျှမ်းသံတော်ဆင့်ကို ပြောသည်။
မိုင်းဆတ်မြို့တွင် ကိုဗစ်-၁၉ ပိုးတွေ့လူနာတဦးနှင့် ထိတွေ့သူ (၇) ဦးရှိပြီး ဆေးစစ်ရာတွင် ပိုးမ တွေ့ကြောင်း ၊ ပိုးတွေ့လူနာ ၁ ဉီးမှာ လက်ရှိမိုင်းဆတ်ဆေးရုံတွင်ဆေးကုသမှုခံယူနေကြောင်း စိုင်းဝဏ္ဏ ကပြောသည်။
အဆိုပါ ပိုးတွေလူနာများသည် မိုင်းဆတ်ဆေးရုံတွင် ဆေးကုသခံယူ နေကြောင်းသိရသည်။
၂၀၂၀ပါတီစုံ ရွေးကောက်ပွဲ ကျင်းပရန် အတွက် ရက်ပေါင်း ၂၃ရက်သာကျန်ရှိတော့သည်။
ထို့ကြောင့် မဲဆွယ်စည်းရုံးရေးကာလသည်လည်း ရက်အနည်းငယ်ကျန်ရှိနေချိန်အတွင်း တဖက်တွင် ကိုဗစ်-၁၉ ကူးစက်မှုနှုန်းမြင့်တက်လာမှုကြောင့် မဲဆွယ်စည်းရုံးရေး အတွက် ခက်ခဲမှုများရှိနေကြောင်းလည်း လွှတ်တော်ကိုယ်စားလှယ်လောင်းများက ပြောသည်။
