သျှမ်းပြည်မြောက်ပိုင်း မူဆယ်မြို့ကျန်းမာရေးစစ်ဆေးရေးဂိတ်မှ စစ်ဆေးတွေ့ရှိသည့် ကိုဗစ်-၁၉ လူနာ များသည် ကားသမားများဖြစ်နေကြောင်း စုံစမ်းသိရှိရသည်။
မူဆယ်မြို့တွင် အောက်တိုဘာ ၁၂ ရက် မှ ၁၅ ရက်အတွင်းတွင် ကိုဗစ် ၁၉ လူနာ (၅) ထိတိုးလာရာ လက်ရှိ မူဆယ်ပြည်သူ့ဆေးရုံ တွင် ဆေးကုသခံယူနေသူ ကိုဗစ်-၁၉ လူနာ စုစုပေါင်း ၁၁ ဉီး ရှိနေကြောင်း မူဆယ် ဂရုဏာလူမှု ကူညီရေးအသင်းမှ ဦးသောင်းထွန်းက ပြောသည်။
“ ပိုးတွေ့လူနာထဲက (၉) ယောက်ကတော့ ကုန်တင်ယာဉ်မောင်း နဲ့ ယာဉ်နောက်လိုက် တွေဖြစ်တယ်။ နောက်ပြီး ရန်ကုန်က ပရဟိတ ကားမောင်း(၁)ယောက်နဲ့ မူဆယ်မြို့ဒေသခံ တယောက်ပါတယ်” ဟု ဦးသောင်းထွန်း ကပြောသည်။
မူဆယ်မြို့ခံ ကိုဗစ်လူနာများအနက် တဦးမှာ ရဲတပ်ဖွဲ့ဝင်ထဲမှ ဖြစ်ကြောင်လည်း ဦးသောင်းထွန်းက ပြောသည်။
ကနေ့အထိ သျှမ်းပြည် တစ်ဝှမ်း ကိုဗစ်-၁၉ လူနာစုစုပေါင်း (၆၈)ဦးရှိပြီဖြစ်သည်။ ထိုအနက် ဆေးရုံမှဆင်းခွင့်ရသူ ၃၁ ဉီးရှိပြီး လက်ရှိ ဆေးရုံအသီးသီးတွင်ဆေးကုသမှုခံယူနေသူ ၃၆ဦး ကျန်နေသေးသည်။ သျှမ်းပြည်ကိုဗစ်လူနာများအနက် သေဆုံးသူလူနာ တဦးရှိပြီဖြစ်ပါသည်။
ယနေ့အထိ မြန်မာတနိုင်ငံလုံး ကိုဗစ် ၁၉ ပိုးတွေ့လူနာ ၃၁၃၂၅ ဦး ဆေးရုံမှဆင်းခွင့်ရသူ ၁၃၈၆၆ နှင့် သေဆုံးလူနာ ၇၃၄ ဦးရှိပြီဖြစ်ကြောင်း ကျန်းမာရေးနှင့် အားကစား၀န်ကြီးဌာနမှ ထုတ်ပြန်ထားပါသည်။