သျှမ်းပြည်မြောက်ပိုင်း ကျောက်မဲမြို့နယ် အတွင်း RCSS/SSA နှင့် အစိုးရတပ်မတော်တို့ကြား တိုက်ပွဲကြောင့် စစ်ရှောင် ၃၅၀၀ ဝန်းကျင် ရှိလာကြောင်း လူမှု ပရဟိတ အဖွဲ့များထံမှ စုံစမ်းသိရသည်။

သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည် တပ်မတော်(RCSS/SSA)နှင့် အစိုးရတပ်မတော်တို့ ကြား တိုက်ပွဲများငြိမ်နေသော်လည်း ယမန်နေ့ အောက်တိုဘာ ၁၃ ရက်နေ့ကအထိ စစ်ရှောင်ရွာသားများ ထပ်မံရောက်ရှိလာကြောင်း ကမ်းလင့်လက်များ လူမှုကူညီရေး အသင်း (နောင်ပိန်)မှ စိုင်းနေအောင် က သျှမ်းသံတော်ဆင့် ကို ပြောသည်။

“ တိုက်ပွဲကတော့မဖြစ်တော့ဘူး။ ဒါပေမယ့် စစ်ကြောင်းတွေ က ကျေးရွာကိုဖြတ်ပြီးသွားလာနေတော့ သူတို့ကြောက်လို့ ရှောင်လာတာပါ။ စစ်ရှောင် အားလုံး ၃၅၀၀ ကျော်ရှိပြီ” ဟု စိုင်းနေအောင် က ဆိုသည်။

အဆိုပါ စစ်ရှောင် ၃၅၀၀ ကျော်သည် ကျောက်မဲမြို့နယ် တောင်ထိပ်ရွာမှ ၆၄၈ ဦး၊ နားဆောင်း ရွာသား ၁၇၀ ဦး၊ ပုံဝိုးကျေးရွာ ၇၁၈ ဦး၊ ကွန်ဟင်ကျေးရွာ ၃၉၇ ဦး၊ ကောင်းလန်းကျေးရွာ ၂၈၆ ဦး၊ ဟိုနမ့်ကျေးရွာ ၃၈၆ ဦး၊ နောင်ကွမ်ကျေးရွာ ၉၅ ဦး၊ ဟဲကွီကျေးရွာ ၁၂၅ဦး၊ ကောင်းမှူးခံ ကျေးရွာ ၂၅၀ ဦး နှင့် အုမ်ဟစ်ကျေးရွာတွင် ၄၃၀ ဦးတို့ဖြစ်ကြောင်း သိရသည်။

ရပ်ရွာများအတွင်ဝင်ရောက်လှုပ်ရှားစခန်းချသော အစိုးရတပ်မတော်သည် ယနေ့ချိန်ထိ တပ်ဆုတ်ပေးခြင်းမရှိသဖြင့် တိုက်ပွဲများ ဆက်လက်ဖြစ်ပွါးမည်ကို စိုးရိမ်ရကြောင်း စစ်ရှောင်များက ပြောသည်။

“ တိုက်ပွဲကတော့ ငြိမ်နေတယ်။ ဒါပေမယ့် စစ်ကြောင်းတွေက ရွာနားမှာရှိနေသေးတယ်။ ကျနော်တို့ မပြန်ရဲသေးဘူး။ နောက်ထပ်အခြေအနေစောင့်ကြည့်ပြီးမှ ပြန်မယ်” ဟု ပုံဝိုးကျေးရွာတွင် စစ်ရှောင်နေသည့် အမျိုးသားတဦးက ပြောသည်။

ရွာအတွင်း အစိုးရတပ်သားများ ဝင်ရောက်လှုပ်ရှားပြီး ရွာပြင်ပ တောပိုင်းတွင် RCSS/SSA တပ်များလှုပ်ရှားနေသည်ဖြစ်ရာ တိုက်ပွဲအချိန်မရွေးပြန်လည်ဖြစ်ပွါးလာနိုင်သည်ဟုရွာသားများကပြောသည်။

လက်ရှိ အချိန်သည် သီးနှံဆွတ်ခူးသည့် အချိန်ဖြစ်သဖြင့် တိုက်ပွဲများမဖြစ်စေချင်ကြောင်း၊ စစ်ကြောင်း များလည်း နောက်ဆုတ်ပေးမှသာလျှင် စစ်ရှောင်များနေရပ်ပြန်နိုင်မည်ဖြစ်သဖြင့် တိုက်ပွဲများမဖြစ်ပွါးစေရန် ၊ တိုက်ပွဲများလုံးဝရပ်တန့်ပေးရန် စစ်ရှောင်များက တိုက်တွန်းတောင်းဆိုလိုက်သည်။

ကျောက်မဲမြို့နယ်တွင် အောက်တိုဘာ ၂ ရက်မှ ၁၁ ရက်အထိ တိုက်ပွဲဖြစ်ပွားခဲ့ပြီး ရပ်ရွာနေအိမ်အတွင်းလက်နက်ကြီးများကျသဖြင့် ဒေသခံလူထု ထိခိုက်ဒဏ်ရာရ ၊ ဆုံးရှုံးမှုများ ရင်ဆိုင်ခဲ့ရသည်။

ကိုဗစ်-၁၉ ကူးစက်မှုကြောင့် လူစုလူဝေးခြင်း ခရီးသွားလာခြင်းများကန့်သတ်ထားသဖြင့် အလှူရှင်များကူညီထောက်ပံ့မှုပေးရန် မလာနိုင်သောကြောင့် စစ်ဘေးရှောင်ပြည်သူများ နေထိုင်စားသောက်မှု အစစအရာရာ အခက်အခဲရင်ဆိုင်နေရကြောင်း လည်း စစ်ဘေးရှောင်များကို ကူညီသည့် အဖွဲ့များက ပြောသည်။

၂၀၂၀ ပါတီစုံ ဒီမိုကရေစီ ရွေးကောက်ပွဲ ကျင်းပရန် ရက်ပေါင်း ၂၄ ရက်သာကျန်နေသည့်အချိန်၊ လွှတ်တော်ကိုယ်စားလှယ်လောင်း အသီးသီး မဲဆွယ်နေသည့် ကာလလည်း ဖြစ်သဖြင့် စစ်ရှောင်လူထု နေရပ်ပြန်နိုင်ရန် အစိုးရတပ်မတော်အနေဖြင့် တပ်ဆုတ်ခွာပေးရန်လည်း လူထုက ပြောဆိုလိုက်သည်။

၂၀၁၅ ရွေးကောက်ပွဲ ကာလကလည်း သျှမ်းပြည်တောင်ပိုင်း မိုင်းရှူးမြို့နယ်၊ ကျေးသီးမြို့နယ်၊ မိုင်းနောင်မြို့နယ် အတွင်း ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA)နှင့် အစိုးရတပ်မတော်တို့တိုက်ပွဲပြင်းထန်သဖြင့် ရွေးကောက်ပွဲ ရွှေ့ဆိုင်းခဲ့ရသည်။