သျှမ်းပြည်မြောက်ပိုင်း ကျောက်မဲမြို့နယ် ပုံဝိုးကျေးရွာ စစ်ရှောင်များခိုလှုံရာဘုန်းကြီးကျောင်းအနီး တပ်မတော်မှ စစ်ရဟတ်ယာဉ်ဖြင့် လူအင်အားနှင့် လက်နက်အင်အားတို့ကို ထပ်မံဖြည့်တင်းနေသဖြင့် စစ်ရှောင်များ စိုးရိမ်ထိတ်လှန့်နေကြောင်းစုံစမ်းသိရှိရသည်။
ယနေ့ အောက်တိုဘာ ၁၀ ရက် မွန်းလွဲ ၂ နာရီခန့်က သျှမ်းပြည်မြောက်ပိုင်း လားရှိုးမြို့အခြေစိုက်အေ ရှ့မြောက်တိုင်း(ရမခ)စစ်ဌာနချုပ်မှ စစ်ရဟတ်ယာဉ် (၄)စီးဖြင့် လူအင်အား၊ လက်နက်အင်အားတို့ကို တင်ဆောင်ကာ ကျောက်မဲမြို့ ပုံဝိုးကျေးရွာဘုန်းကြီးကျောင်းစစ်ရှောင်များရှိရာအနီးတွင် အားဖြည့်ချပေး ကြောင်းစစ်ရှောင်များကပြောသည်။
“ဒီနေ့ သူတို့ ၂ ခေါက်တောင်လာတယ်။ (၄) စီးလာတယ်။ ၂ စီးက ပစ္စည်းချပြီး ၂ စီးက ကောင်းကင်ပေါ်မှာ ပျံနေတယ်။ ပစ္စည်းချပြီးရင် လေယာဉ်၂ စီးလုံး ကအတူတူပြန်သွားကြတယ်” ဟု ပုံဝိုးကျေးရွာနေ မြင်တွေ့ရသူ အမျိုးသမီးတဦးက သျှမ်းသံတော်ဆင့် ကိုပြောသည်။
စစ်ရဟတ်ယာဉ်ဖြင့်လာသော စစ်သားများသည် ရွာဘက်သို့ ခြေကျင်ဖြင့်ဆက်လျှောက်သွားကြောင်း ၎င်း အမျိုးသမီး ကပြောသည်။
“ အဲဒီရဟတ်ယာဉ်နဲ့လာတဲ့ စစ်သားတွေက ရွာထဲဝင်လာပြီး ၅ မိနစ်လောက်သေနတ်ပစ်ပြီးတော့ တောင်ပေါ်ဆက်တက်သွားတယ်။ ” ဟု ၎င်းအမျိုးသမီးက ထပ်လောင်းပြောသည်။
လက်ရှိ ပုံဝိုးကျေးရွာဘုန်းကြီးကျောင်းတွင် စစ်ဘေးရှောင် ၇၀၀ ကျော်ရှိပြီး၊ တိုက်ပွဲဆက်လက်ပြင်းထန်လာ မည်ကို ၎င်းတို့ကစိုးရိမ်နေကြသည်ဟုဆိုပါသည်။
“ စစ်ရေးက ဘယ်လို ထပ်လာမယ်မလဲဆိုတာ မသိဘူး။ တိုက်ပွဲတွေမဖြစ်စေချင်ဘူး။ နေ့တိုင်းနီးပါး သေနတ်သံတွေ ကြားနေရတယ်။ ကျေးရွာအနီးတွေမှာတော့ မ ဖြစ်စေချင်ဘူး” ဟု စစ်ဘေးရှောင်အမျိုးသမီး နန်းအောင် က သျှမ်းသံတော်ဆင့်ကို ပြောသည်။
သျှမ်းပြည် မြောက်ပိုင်း ကျောက်မဲမြို့နယ် အတွင်း သျှမ်းပြည်ပြန်လည်ထူးထောင်ရေးကောင်စီ၊ သျှမ်းပြည်တပ်မတော် RCSS/SSA နှင့် အစိုးရတပ်မတော်တို့သည် အောက်တိုဘာ ၂ ရက်မှ စတင်ကာ ယနေ့ချိန်ထိ စစ်ရေး ပြင်းထန်နေသေးကြောင်းသိရသည်။
တိုက်ပွဲကြောင့် စစ်ဘေးရှောင်ပြည်သူ ၃၀၀၀ နီးပါး ရှိပြီး၊ စားဝတ်နေရေး အတွက် ခက်ခဲနေကြောင်း သိရသည်။
အလုပ်သင်သတင်းထောက် စိုင်းဆိုင်လှိုင်း ရေးသားသည်။
Leave a Comments