သျှမ်းပြည်မြောက်ပိုင်း ကျောက်မဲမြို့နယ် ကျွဲကုန်းကျေးရွာအတွင်း ယမန်နေ့ ညပိုင်းက ပစ်ခတ်မှုကြောင့် အမျိုးသမီး တဦး ဗုံးစ ထိမှန်ခဲ့ကြောင်း စုံစမ်းသိရသည်။
ယမန်နေ့(အောက်တိုဘာ ၉ )ရက် ည ၈နာရီ မှ ၉ နာရီခွဲတွင် ကျောက်မဲမြို့နယ် ကျွဲကုန်းကျေးရွာတွင် လက်နက်ကြီး၊ လက်နက်ငယ်များဖြင့် ပစ်ခတ်ရာ အမျိုးသမီး တဦး ဗုံးစ ထိမှန်ခဲ့ပြီး၊ အိမ်ခြေ ၃အိမ် ထိခိုက်ပျက်စီးခဲ့ကြောင်း ကျောက်မဲမြို့နယ် အမှတ်(၁) မဲဆန္ဒနယ် တွင် SNLD ပါတီ မှ ဝင်ရောက်ယှဉ်ပြိုင်မည့် နန်းအိမွန်အောင် (ခ) နန်းလောဝ်လောဝ် က သျှမ်းသံတော်ဆင့်ကို ပြောသည်။
“ အမျိုးသမီး ဗုံးစထိမှန်တာဟုတ်ပါတယ်။ နဖူးနဲ့ ဒူးနားထိပါတယ်။ ဒီမနက်တော့ ဆေးရုံသွားပြ ခဲ့တယ်။ ဆေးပဲလိမ်းပြီး ပြန်လွှတ်တယ်။ ဓာတ်မှန်မရိုက်ပေးသေးဘူး” ဟု နန်းလောဝ်လောဝ် က ဆိုသည်။
ဗုံးစ ထိမှန်သည့် အမျိုးသမီးကို ကျောက်မဲဆေးရုံမှ တနင်္လာနေ့ပြန်လာပြရန် ရက်ချိန်းခဲ့ကြောင်း၊ ဓာတ်မှန်လည်း မရိုက်ပေးသည့် အတွက် ဗုံးစများအသားထဲတွင် ရှိ၊မရှိ မသိရှိရသေးကြောင်းလည်း နန်းလောဝ်လောဝ် က ပြောသည်။
“ ကျမ ဆေးရုံထပ်သွားပြောရအုံးမယ်။ သူတို့ဘာကြောင့် ဓာတ်မှန်မရိုက်ပေးလဲဆိုတာ ဒါက အရေးကြီးတယ် လေ” ဟု နန်းလောဝ်လောဝ် က ထပ်လောင်းပြောသည်။
ယမန်နေ့ ပစ်ခတ်မှုဖြစ်သည့် ကျွဲကုန်းကျေးရွာသည် ကျောက်မဲမြို့ အဝင်လမ်းခွဲတွင်သာရှိပြီး၊ ပစ်ခတ်သည့် အသံသည် တဖက်သာပစ်ခတ်သည့် အသံများဖြစ်နေကြောင်း ကျွဲကုန်းကျေးရွာ မှ ပြည်သူများက ပြောသည်။
“ မနေ့က အသံအကျယ်ကြီးပဲ ဒီကလူတွေအသံကြားတာလဲ အိမ်ထဲမှာပဲ နေနေရတယ်” ဟု ကျွဲကုန်းဒေသခံ တဦး ကပြောသည်။
လက်ရှိ မှာလည်း ကျွဲကုန်းကျေးရွာအတွင်း တပ်မတော်မှ တပ်သားများ သွား၊လာ လှုပ်ရှားနေသဖြင့် ပြည်သူများအနေဖြင့်စိုးရိမ်ထိတ်လန့်မှု ဖြစ်နေကြောင်းလည်း သိရသည်။
“ မနေ့ညက တဖက်သတ် လျှောက်ပစ်နေတာ။ အခုလည်း ကျေးရွာထဲမှာ စစ်သားတွေ လမ်းလျှောက်ပြီး ရွာထဲကို ပတ်နေတာ။ ဘာလုပ်ကြလဲ မသိဘူး” ကျွဲကုန်း ဒေသခံတဦးက ဆိုသည်။
မြန်မာနိုင်ငံတဝှမ်း ၂၀၂၀ ပါတီစုံရွေးကောက်ပွဲကို လာမည့် နိုဝင်ဘာ ၈ရက်တွင် ကျင်းပမည်ဖြစ်ပြီး၊ ရွေးကောက်ပွဲ ကျင်းပရန် တလ သာကျန်ချိန်တွင် သျှမ်းပြည်မြောက်ပိုင်း ကျောက်မဲမြို့နယ်အတွင်း စစ်ရေးများ ပြင်းထန်လာသည်။
ထိုစစ်ရေးသည် အောက်တိုဘာ ၂ရက် မှ စတင်ကာ ယနေ့ချိန်ထိ သျှမ်းပြည်ပြန်လည်ထူထောင်ရေး ကောင်စီ၊ သျှမ်းပြည် တပ်မတော်(RCSS/SSA) နှင့် အစိုးရတပ်မတော်တို့တိုက်ပွဲ ပြင်းထန်နေဆဲ ဟုသိရသည်။
ထိုကိစ္စနှင့် ပတ်သက်ပြီး ကျောက်မဲမြို့နယ် အတွင်း ရွေးကောက်ပွဲဝင်ပြိုင်မည့် နန်းလောဝ်လောဝ် က “စစ်ပွဲတွေရပ်ပေးပါ။ လောလောဆယ်ရွေးကောက်ပွဲထက် အရေးကြီးတဲ့ ပြည်သူလူထုကို ထိခိုက်နေတယ်။ ပြည်သူလူထု မျက်ရည်တွေကျနေရတယ်” ဟု ပြောသည်။
တိုက်ပွဲကြောင့် စစ်ဘေးရှောင်လာသည့် ပြည်သူများသည် အကူအညီကင်းမဲ့နေသည့်ခံစားချက် ၊ မျက်နှာထားညိုးနွမ်ကာ ဝမ်းနည်းပူဆွေး ငိုယိုနေကြသည် ကို မြင်ရသည့်အတွက် မခံစားနိုင်ကြောင်း၊ ထို့ကြောင့် တိုက်ပွဲအမြန်ရပ်တန့်ရန် လိုအပ်ကြောင်း နန်းလောဝ်လောဝ်က တောင်းဆိုလိုက်သည်။
ကျောက်မဲအတွင်း RCSS/SSA နှင့် အစိုးရတပ်မတော်တို့ တိုက်ပွဲဖြစ်ပွားမှုကြောင့် ကျောက်မဲမြို့နယ် အတွင်းစစ်ဘေးရှောင် ၃၀၀၀ နီးပါး ထွက်ပြေးတိမ်းရှောင်နေရပြီး၊ စားဝတ်နေရေး အခက်အခဲ ဖြစ်နေကြောင်း သိရသည်။
Leave a Comments