သျှမ်းပြည်မြောက်ပိုင်း ကျောက်မဲမြို့နယ် အတွင်း RCSS/SSA နှင့် အစိုးရတပ်မတော်တို့ကြား တိုက်ပွဲ ပြင်းထန်မှုကြောင့် တောင်ထိပ်ရွာဘုန်းကြီးကျောင်းသို့တိမ်းရှောင်လာသည့် စစ်ရှောင် ၇၀၀ ကျော် စားနပ်ရိက္ခာ အခက်အခဲရင်ဆိုင်ကြုံတွေ့နေရကြောင်း စုံစမ်းသိရသည်။
သျှမ်းပြည် ပြန်လည် ထူထောင်ရေး ကောင်စီ၊ သျှမ်းပြည် တပ်မတော်(RCSS/SSA)နှင့် အစိုးရ တပ်မတော်တို့သည် အောက်တိုဘာလ ၂ ရက်နေ့ကတည်းကစပြီး ယနေ့ချိန်ထိ တောင်ထိပ် စစ်ရှောင်များနေထိုင်သည့် အနီးပတ်ဝန်းကျင်တွင် တိုက်ပွဲများ ပြင်းထန်ဖြစ်ပွါးနေသေးကြောင်း သိရသည်။
“ ဒီနေ့ တောင်ထိပ် က စစ်ဘေးရှောင်တွေကို ကူညီဖို့အတွက် ကားအစီးပေါင်း ၂၀ သွားတယ်။ အဲ့တောင်ထိပ် သွားတဲ့လမ်း မှာ တိုက်ပွဲတွေ ဖြစ်နေတယ်။ ၂ တပ်စလုံးရှိတော့ သွားလို့မရဘူး” ဟု ကျောက်မဲမြို့ ဒေသခံ နန်းကျိန် က သျှမ်းသံတော်ဆင့်ကို ပြောသည်။
တောင်ထိပ်ကျေးရွာတွင် စစ်ဘေးရှောင် ၇၀၀ ကျော်အတွက် စားနပ်ရိက္ခာ ခက်ခဲနိုင်ကြောင်း၊ တိုက်ပွဲများ ဆက်လက်ပြင်းထန်နေပါက တောင်ထိပ်ရွာရှိ စစ်ဘေးရှောင်များအတွက် ရိက္ခာပြတ်လပ်သွား နိုင်ကြောင်းလည်း နန်းကျိန် က ဆိုသည်။
“ တိုက်ပွဲက အဲ့တောင်ထိပ် နားတဝှိုက်မှာဖြစ်နေတာ။ မနေ့က ည သန်းခေါင်အထိဖြစ်နေတာ။ ဒီမနက်လည်းဖြစ်တယ်။ တိုက်ပွဲက ဆက်တိုက်ဖြစ်ရင် ရိက္ခာအတွက် စိုးရိမ်ရတယ်” ဟု နန်းကျိန်က ပြောသည်။
RCSS/SSA နှင့် အစိုးရ တပ်မတော်တို့တိုက်ပွဲဖြစ်ပွားမှုကြောင့် တောင်ထိပ်ကျေးရွာ တွင် စစ်ရှောင်( ၇၀၀) ကျော်နှင့် ပုံဝိုးကျေးရွာတွင် စစ်ရှောင် (၅၀၀)ကျော် ရောက်ရှိခိုလှုံနေကြောင်း သိရသည်။
“ ပုံဝိုးမှာက စားနပ်ရိက္ခာ မစိုးရိမ်ရဘူး။ တောင်ထိပ်ပဲ ပို့ဖို့ခက်နေတာ။ ပုံဝိုးက အလှူရှင်တွေ တော်တော်များများရောက်တယ်။ အခု တောင်ထိပ်ကို ပို့ပေးနိုင်ဖို့ လိုအပ်တယ်” ဟု ရှမ်းတိုင်းရင်းသားများ ဒီမိုကရက်တစ်ပါတီ ( SNDP)မှ ကျောက်မဲမြို့နယ် အမျိုးသားလွှတ်တော် ကိုယ်စားလှယ်လောင်း စိုင်းထွန်းလင်း က သျှမ်းသံတော်ဆင့် ကို ပြောသည်။
ယနေ့ အောက်တိုဘာ ၇ ရက် နေ့လည် ၁ နာရီဝန်းကျင်တွင် အစိုးရတပ်မတော်မှ စစ်ရဟတ်ယာဉ် ၂စီးဖြင့် ပုံဝိုးကျေးရွာ အထက် တောင်ကြောတွင် စစ်အင်အားနှင့် စစ်ရိက္ခာလာချသွားကြောင်း ပုံဝိုးကျေးရွာ အတွင်း စစ်ရှောင်များက ပြောသည်။
“ ရဟတ် ယာဉ် ၂စီးနဲ့ စစ်အင်အား ၁၀၀ကျော်လောက်လာချသွားတယ်။ နေ့လည်ကလည်း တိုက်ပွဲဖြစ်တယ်။ ကျမတို့လည်းစိုးရိမ်မှုနဲ့ ပုံဝိုးကျေးရွာ ဘုန်းကြီးကျောင်းမှာ နေနေရတယ်။ လက်နက်ကြီးတွေ ကျောင်းကိုထိမှာကြောက်တယ်” ဟု ပုံဝိုးကျေးရွာတွင် စစ်ရှောင်နေသည့် အမျိုးသမီး တဦး က သျှမ်းသံတော်ဆင့် ကို ပြောသည်။
လက်ရှိ RCSS/SSA နှင့် အစိုးရတပ်မတော်တို့ ဖြစ်ပွားနေသည့် တိုက်ပွဲသည် စစ်ရေးပြင်းထန်မှု၊ လျော့ကျမှုသည် အစိုးရတပ်မတော်ပေါ်သာ မူတည်ကြောင်းလည်း RCSS/SSA ပြောရေးဆိုခွင့်ရှိသူ ဒုဗိုလ်မှူးကြီး အုမ်ခေး က သျှမ်းသံတော်ဆင့်ကို ပြောသည်။
၂၀၂၀ ပါတီစုံ ဒီမိုကရေစီ ရွေးကောက်ပွဲ ကျင်းပရန်လည်း ၁လ နီးပါးသာကျန်နေသည့်အချိန်၊ လွှတ်တော်ကိုယ်စားလှယ်လောင်း အသီးသီး မဲဆွယ်နေသည့် ကာလအတွင်း အစိုးရတပ်မတော် အနေဖြင့် ယခုကဲ့သို့ တိုက်ပွဲဖန်တီးခြင်းသည် ရုပ်ဆိုးကြောင်းလည်း စစ်ရှောင်များက ပြောဆိုလိုက်သည်။
လွန်ခဲ့သည့် ၂၀၁၅ ရွေးကောက်ပွဲ ကာလတွင်လည်း သျှမ်းပြည်တောင်ပိုင်း မိုင်းရှူးမြို့နယ်၊ ကျေးသီးမြို့နယ်၊ မိုင်းနောင်မြို့နယ် အတွင်း ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA)နှင့် အစိုးရတပ်မတော်တို့တိုက်ပွဲပြင်းထန်မှုဖြစ်ပွားမှုကြောင့် ရွေးကောက်ပွဲမကျင်းပနိုင်ခဲ့ဘဲ ၂၀၁၇ ကြားဖြတ်ရွေးကောက်ပွဲမှသာ ပူးပေါင်းမဲပေးခဲ့ရသည့် ဖြစ်စဉ်ရှိခဲ့သည်။
Leave a Comments