သျှမ်းပြည် မြောက်ပိုင်း မူဆယ်မြို့ သို့ဝင်ရောက်လာသည့် ကားများကို စစ်ဆေးရေးဂိတ်တွင် Rapid test kit စစ်ဆေးရာ ကားသမားထံ ကိုဗစ်-၁၉ တွေ့ရှိခဲ့ကြောင်း စုံစမ်းသိရသည်။

ယနေ့ (အောက်တိုဘာ ၆)ရက် တွင် မူဆယ်ကျန်းမာရေး စစ်ဆေးရေးဂိတ်တွင် ကားသမား (၁၀၁)ဦးကို စစ်ဆေးရာ ကိုဗစ်-၁၉ လူနာ တဦး တွေ့ရှိခဲ့ကြောင်း မူဆယ်မြို့ကျန်းမာရေး စစ်ဆေးရေးဂိတ်တွင် တာဝန်ကျနေသည့် အမျိုးသား တဦးက သျှမ်းသံတော်ဆင့်ကိုပြောသည်။

“ ဒီနေ့ ကားသမား တဦးမှာ ကိုဗစ်-၁၉ တွေ့ပါတယ်။ မူဆယ် ဆေးရုံမှာ တင်ထားပါတယ်”ဟု ၎င်း အမျိုးသားက ပြောသည်။

လက်ရှိမှာ မူဆယ်မြို့တွင် ကိုဗစ်-၁၉ အတည်ပြုလူနာ ၄ဦး ရှိပြီး၊ အသက် (၆၂)နှစ် အရွယ် ယာဉ်မောင်း တဦးမှာ စိုးရိမ်ရသည့်အခြေအနေရှိကြောင်းလည်း သိရသည်။

“ ၄ ဦးမှာ အသက် (၆၂)အရွယ် အမျိုုးသားက ရောဂါအခံရှိတော့ စိုးရိမ်ရတယ်” ဟု အထက်ပါ အမျိုးသားက ပြောသည်။

Rapid Test Kit ဖြင့်စစ်ပြီး Positive ဖြစ်ပါက ပိုးတွေ့လူနာအဖြစ်သတ်မှတ်နိုင်ကြောင်း Negative ဖြစ်သွားပါက ပိုးရှိနေလည်း ပိုးမတွေ့နိုင်ကြောင်း သိရသည်။

Rapid Test kit စစ်သည့် သူများသည် ပတ်ဝန်းကျင် အနေအထား၊ဖတ်သည့် နည်းပညာပေါ်မူတည်ပြီး ပိုးရှိနေလည်း ပိုးမတွေ့နိုင်ကြောင်း၊ Test kit ဖြင့် စစ်ပြီး Negative ပင်ဖြစ်နေသော်လည်း စိတ်မချနိုင်ကြောင်း ဒေါက်တာ ဇဝနကို ကပြောသည်။

မြန်မာနိုင်ငံသည် ကိုဗစ် ၁၉ အတည်ပြုလူနာ (၂၀၀၃၃) ဦးရှိလာပြီး၊ သေဆုံးသူ (၄၇၁) ဦးရှိကြောင်း နှင့် ပြန်လည်သက်သာလာသူ (၅၇၈၂ )ဦးရှိကြောင်း ကျန်းမာရေးနှင့် အားကစားဝန်ကြီးဌာန ထုတ်ပြန်ချက်အရသိရသည်။

အလုပ်သင် သတင်းထောက် စိုင်းဆိုင်လှိုင်း ရေးသားသည်။