သျှမ်းပြည် မြောက်ပိုင်း ကျောက်မဲမြို့နယ် ခန့်ခဲ (ခန်ခိုင်း)ကျေးရွာ အုပ်စု ခန့်ခဲ (ခန်ခိုင်း) ကျေးရွာတွင် တိုက်ပွဲဖြစ်ပွားရာ အရပ်သား အမျိုးသားတဦး လက်နက်ကြီးထိမှန်ပြီး၊ ဒေသခံ(၇၀၀)ကျော် ထွက်ပြေး တိမ်းရှောင်နေရကြောင်း စုံစမ်းသိရသည်။
အောက်တိုဘာလ ၄ ရက် ညနေပိုင်းတွင် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) နှင့် အစိုးရ တပ်မတော်တို့ တိုက်ပွဲဖြစ်ပွားကာ အသက် ၄၅ နှစ်အရွယ် အမျိုးသားတဦး လက်နက်ကြီးထိမှန်ပြီး၊ ဒေသခံ ၇၀၀ ကျော်ထွက်ပြေးတိမ်းရှောင်နေရကြောင်း ကျောက်မဲမြို့နယ် စစ်ရှောင်ကော်မတီ ဥက္ကဌ ဦးတင်မောင်သိန်း က သျှမ်းသံတော်ဆင့်ကိုပြောသည်။
“စစ်ရှောင် ဒဏ်ရာရရှိသူ အခုချိန်ထိတော့ (၁) ယောက်ဘဲ ရှိသေးတယ်။ ကျောက်မဲဆေးရုံမှာ ရောက်နေပါတယ်။ စစ်ရှောင်တွေက ကျနော် စာရင်း အရတော့ (၇၀၀) ကျော်လောက်ရှိတယ်” ဟု ဦးတင်မောင်သိန်း ကပြောသည်။
လက်ရှိမှာ စစ်ရှောင်များအတွက် စစ်ရှောင်ကော်မတီ မှ အစားအသောက်ကူညီထောက်ပံ့ပေးထားပြီး၊ မြို့နယ်အုပ်ချုပ်ရေးမှူးမှလည်း ကြက်ဥနှင့်ခေါက်ဆွဲခြောက်များကို ထောက်ပံ့ပေးခဲ့ကြောင်း ဦးတင်မောင်သိန်း က ပြောသည်။
ထို့အပြင် လက်နက်ကြီးထိမှန်ပြီး ဆေးကုသနေသည့် အမျိုးသား အတွက် စစ်ရှောင်ကော်မတီမှ ဆေးကုသစရိတ် ကျပ်ငွေ ၅၀၀၀၀ ပေးခဲ့ကြောင်းလည်း ဦးတင်မောင်သိန်း က ထပ်လောင်းပြောသည်။
“ မနေ့က ခန်ခဲကျေးရွာမှာ တိုက်ပွဲဖြစ်တယ်။ ကျေးရွာက ဒေသခံတွေက ပုံဝိုးကျောင်းကို စစ်ရှောင်လာရတယ်။ ပုံဝိုးမှာ စစ်ရှောင် ၂၀၀ကျော်ရှိတယ်” ကျောက်မဲမြို့နယ် ပြည်နယ် မဲဆန္ဒနယ် အမှတ်(၁) လွှတ်တော်ကိုယ်စာလးှယ် စိုင်းထွန်းဝင်း က သျှမ်းသံတော်ဆင့် ကို ပြောသည်။
တိုက်ပွဲကြောင့် လက်နက်ကြီး သည် ခန်ခိုင်းကျေးရွာရှိ နေအိမ်တလုံးပေါ် ကျကာ အရပ်သားတဦး ထိခိုက်ဒဏ်ရာရရှိခဲ့ကြောင်းလည်း စိုင်းထွန်းဝင်းက ဆိုသည်။
RCSS/SSA နှင့် အစိုးရ တပ်မတော်တို့သည် စက်တင်ဘာ ၃၀ ရက်နေ့မှစပြီး ယနေ့အချိန်ထိ တိုက်ပွဲများပြင်းထန်နေကြောင်း စုံစမ်းသိရသည်။
“ တိုက်ပွဲဖြစ်တာတော့ ဟုတ်တယ်။ အစိုးရ တပ်မတော်ဘက်က ထိခိုက်မှုများတယ်လို့သိရတယ်။ စာရင်းအတိအကျတော့ မသိရသေးဘူး” ဟု RCSS/SSA ပြောရေးဆိုခွင့်ရှိသူ ဗိုလ်မှူးကြီး အုမ်ခေး က သျှမ်းသံတော်ဆင့် ကို ပြောတယ်။
အစိုးရ တပ်မတော်သည် RCSS/SSA တပ်စခန်းရှိသည့်နေရာကိုတက်လာသဖြင့် တိုက်ပွဲဖြစ်ပွားခဲ့ကြောင်း၊ လက်ရှိမှာလည်း စစ်ရေးတင်းမာနေကြောင်း စုံစမ်းသိရသည်။
လက်ရှိ တိုက်ပွဲဖြစ်ပွားနေသည့် ခန်ခဲကျေးရွာသည် ကျောက်မဲမြို့နှင့် မိုင် ၂၀ အကွာတွင် တည်ရှိသည်။
အလုပ်သင် သတင်းထောက် စိုင်းဆိုင်လှိုင်း ရေးသားသည်။
Leave a Comments