သျှမ်းပြည်တောင်ပိုင်း တောင်ကြီး မြို့နယ်အတွင်း အမျိုးသားဒီမိုကရေစီ အဖွဲ့ချုပ် (NLD) သည် ယနေ့(စက်တင်ဘာ ၃၀)ရက်တွင် အောင်နိုင်ရေးခရီးစဉ် ကို ကက္ကူ ဘုရားသို့ ချီတက်ခဲ့ကြောင်း သိရသည်။
အဆိုပါ အောင်နိုင်ရေး ခရီးစဉ်တွင် ကားအစီး(၂၀)၊ ဆိုင်ကယ် အစီး(၅၀) ဖြင့် သွားရန် အတွက် သျှမ်းပြည် ရွေးကောက်ပွဲ ကော်မရှင် ကို တင်ခဲ့ကြောင်း သိရသည်။
“ကျနော်တို့ကနှိုးဆော်ရေး လုပ်တာပါ။ ကိုယ်စားလှယ်လောင်းတွေမပါဘူး။ ကျနော်တို့ပါတီ ရဲ့ နှိုးဆော်ရေး အစီစဉ်နဲ့ ထွက်ခဲ့တာပါ” ဟု တောင်ကြီးမြို့ အောင်နိုင်ရေးခေါင်းဆောင် ဦးအောင်ကျော်နိုင် က သျှမ်းသံတော်ဆင့် ကိုပြောသည်။
ထို အောင်နိုင်ရေး ခရီးစဉ်အတွက် ကြေညာထားခြင်းမရှိဘဲ ပြည်သူများက လမ်းတွင် စောင့်ဆိုင်းကာ လိုက်လံ ဝန်းရံကြခြင်းဖြစ်ကြောင်း၊ ကျန်းမာရေး နှင့် အားကစားဝန်ကြီးဌာန ထုတ်ပြန်ချက်ကိုလည်း လိုက်နာဆောင်ရွက်ကြောင်း လည်း ဦးအောင်နိုင်ကျော် က ပြောသည်။
“ကျနော်တို့ လည်းစည်းမဲ့ကမ်းမဲ့ မဖြစ်အောင် Social Distancing ဖြစ်အောင်ဆိုပြီး ကျနော်တို့ ကြပ်မတ်ပီး ဆောင်ရွက်ထားတာရှိတယ်” ဟု ဦးအောင်ကျော်နိုင် ကပြောသည်။
ယနေ့ အောင်နိုင်ရေး ခရီးစဉ် အတွက် ကြိုတင် အသိပေးထားခြင်းမရှိကြောင်းလည်း သိရသည်။
NLD ပါတီ သည် ၂၀၁၅ ခုနစ်တွင် အနိုင်ရရှိသည့် ပါတီဖြစ်ပြီး အစိုးရဖွဲ့ခဲ့သည့် ပါတီတခုလည်းဖြစ်သည်။
အလုပ်သင် သတင်းထောက် စိုင်းဆိုင်လှိုင်း ရေးသားသည်။
