သျှမ်းပြည်တောင်ပိုင်း တောင်ကြီးမြို့ရှိ Mask (နှာခေါင်းစည်း) မတပ်သည့် ပြည်သူများကို အသိပညာပေး ပြစ်ဒဏ်များ ဆောင်ရွက်ရာတွင် တရက်လျှင် အယောက် (၁၀၀)ကျော်ရှိကြောင်း စုံစမ်းသိရှိရသည်။
ယနေ့ စက်တင်ဘာ (၂၁) ရက်တွင်လည်း တတိယအကြိမ်အဖြစ် တောင်ကြီးမြို့ အနှံ့အပြားမှာ Mask မတပ်သည့် ပြည်သူများကို အသိပညာပေး ပြစ်ဒဏ်များ ဆောင်ရွက်နေကြောင်း ကိုဝင်းနိုင်စိုး ထံ သိရသည်။
“Mask မတပ် ကားမောင်းလာသူများ ဆိုင်ကယ် စီးနှင်းလာသူများ ဈေးရောင်းဈေးဝယ်သူ အားလုံး မည်သူမဆို Mask မတပ်တဲ့ လူတိုင်းကို ကျနော်တို့ ပူးပေါင်း စစ်ဆေးရေးအဖွဲ့ကနေပြီးတော့ အသိပညာပေး ပြစ်ဒဏ်များ ဆောင်ရွက် နေပြီဖြစ်ပါတယ်” တောင်ကြီး စေတနာ့ ဝန်ထမ်း ကိုဝင်းနိုင်စိုး က ၎င်း၏ လူမှုကွန်ရက် စာမျက်နှာပေါ်မှာ Live လွှင့်ပြီး ပြောဆိုခဲ့သည်။
အဆိုပါ အသိပညာပေး ပြစ်ဒဏ်ပေးမှုမှာ စက်တင်ဘာ (၁၅) ရက်မှ စတင်ဆောင်ရွက်ရာ Mask မတပ်သည့်သူ (၁၃၅) ဦး ရှိပြီး ဒုတိယ အကြိမ် အသိပညာပေးမှုမှာ (၁၅၆) ဦး ရှိကြောင်း သိရသည်။
“ဒီနေ့ တွေ့ရသလောက်တော့ တောင်ကြီးမြို့ပေါ်က ပြည်သူတွေ Mask တပ်ပြီး သွားလာနေကြပေမယ် တချို့ က မတပ်ကြဘူး” ဟု တောင်ကြီးဒေသခံ တစ်ဦး ကပြောသည်။
အသိပညာပေး ခံယူရန်အတွက် ၆ ပေအကွာမှာ ၁၅ မိနစ်ခန့် မတ်တပ်ရပ်ပြီး ပညာပေးမှုများ ပြုလုပ်ခဲ့ကြောင်း သိရသည်။
Mask မတပ်သည့် ပြည်သူများကို ရဲတပ်ဖွဲ့များ ၊ ယာဉ်ထိန်းတပ်ဖွဲ့များ၊ အထွေထွေ ဦးစီးဌာနများ၊ ကြက်ခြေနီ အဖွဲ့များ၊ စေတနာ့ ဝန်ထမ်းများ စသည့် ပူးပေါင်းအဖွဲ့ အသိပညာပေး ပြစ်ဒဏ်များ ဆောင်ရွက်နေကြောင်း သိရသည်။
စက်တင်ဘာ (၂၀) ရက်မှာ တောင်ကြီးမြို့ အမှတ်(၂) အထက်တန်းကျောင်းတွင် Quarantine ဝင်နေသည့် သံသယ လူနာ တစ်ဦး သေဆုံးသူ အပါအဝင် ဓါတ်ခွဲနမူနာ (၃၁၆) ခု စ ယနေ့ တောင်ကြီး စဝ်စံထွန်း ဆေးရုံမှာ စစ်ဆေးသွားမည်ဖြစ်ကြောင်း သိရသည်။
မြန်မာနိုင်ငံတဝှမ်းလုံး ကိုဗစ်-၁၉ အတည်ပြု လူနာ စုစုပေါင်း (၅၈၀၅) ရှိပြီး သေဆုံးသူ (၉၇) ဦး ရှိပြီဖြစ်ကြောင်း စက်တင်ဘာ (၂၁) ရက် မနက် (၈) နာရီချိန်တွင် ကျန်းမာရေး နှင့် အားကစား ဝန်ကြီးဌာန ထုတ်ပြန်ချက်အရ သိရသည်။
Leave a Comments