သျှမ်းပြည်တောင်ပိုင်း မိုင်းကိုင်မြို့နယ်ရှိ တအာင်းပါတီ TNP ၏ ပါတီ၀င်တဉီးအား သျှမ်းပြည် တပ်မတော်က ဖမ်းဆီးသွားကြောင်းတအာင်းပါတီက ပြောဆိုလိုက်သည်။

စက်တင်ဘာလ ၁၅ ရက်နေ့က မိုင်းကိုင်မြို့နယ် ခေးအုံအွေအုပ်စု ပန်မောင်းရွာရှိ တအာင်းပါတီ ၏ စည်းရုံးရေးမှူးတဉီးဖြစ်သည့် စိုင်းလှစိန်အား RCSS/SSA ကဖမ်းဆီးသွားကြောင်း လက်ရှိတွင်  နေအိမ်သို့ပြန်မရောက်သေးသဖြင့် အမြန်ဆုံးပြန်လွှတ်ပေးရန် တအာင်းပါတီမှ တောင်းဆိုလိုက်သည်။

တအာင်းပါတီ TNP ၏ မိုင်းကိုင်မြို့နယ် ပါတီဉက္ကဌ မိုင်းနုမ်ဟန် က-  “စိုင်းလှစိန်က ခေးအုံအွေအုပ်စုရဲ့ စာရေးပါ။ သူက ကျနော်တို့ပါတီကို ကူညီနေတဲ့သူတဉီးဖြစ်ပါတယ်။  ဖမ်းဆီးသွားပြီး ခုထိအိမ်ပြန် မရောက် သေးလို့ မိဘနဲ့အိမ်သားတွေက စိတ်ပူနေကြတယ်။ သူ့ကိုဘယ်မှာသွားထားကြ သလဲ။ ဘာကြောင့် ဖမ်းသွားလဲ ဘယ်နေရာမှာသွားထားသလဲ RCSS ကို မေးချင်ပါတယ်။” – ဟု သျှမ်းသံတော်ဆင့်အားပြောသည်။

ပျောက်ဆုံးနေသော စိုင်းလှစိန်သည် အသက် ၃၀ ခန့်အရွယ်ရှိပြီး အိမ်ထောင်သည်တဉီးဖြစ်ကြောင်း၊ သို့သော်သားသမီးမထွန်းကားသေးကြောင်း သိရသည်။

၄င်းနှင့်ပတ်သက်ပြီး RCSS/SSA ပြောခွင့်ရ ဒု-ဗိုလ်မှူးကြီး အုမ်ခေးက – “ ဒီကိစ္စနဲ့ပတ်သက်ပြီး ကျနော်တို့ မသိရသေးပါဘူး။ အရင်တုန်းက ဒီလိုဖမ်းဆီးခံရသူတွေဟာဆိုရင် မူးယစ်ဆေး၀ါးနဲ့ ပတ်သက်တဲ့သူတွေ၊ ရောင်း၀ယ်သူ၊ သောက်သုံးသူတွေသို့မဟုတ် လက်လီအရောင်းသမားတွေ ဖြစ် တယ်။ ဒီကိစ္စမဟုတ်ရင်လည်း တပ်ပြေးဖြစ်မယ်။ တကယ်လို့အဖမ်းခံရတာသေချာတယ်ဆိုရင်တော့ ဒေသတွင်း လှုပ်ရှားနေတဲ့ ကျနော်တို့တပ်တွေကိုဆက်သွယ်မေးမြန်းဖို့လိုပါတယ်။ ”- ဟု သျှမ်းသံတော်ဆင့်အား ပြောသည်။

တအာင်းအမျိုးသားပါတီ TNP သည် သျှမ်းပြည်မြောက်ပိုင်း နမ့်ဆန်မြို့တွင်ရုံးချုပ်ထားရှိပြီး ၂၀၂၀ အထွေထွေရွေးကောက်ပွဲတွင် သျှမ်းပြည်မြောက်ပိုင်းကျောက်မဲ၊ နမ့်ဆန်တို့တွင်အပြင်  သျှမ်းပြည် တောင်ပိုင်းမိုင်းကိုင်မြို့တွင် ၃ နေရာနှင့် အမျိုးသားလွှတ်တော်ကိုယ်စားလှယ် ၁ နေရာ၀င်ရောက် ယှဉ်ပြိုင် မည်ဖြစ်သည်။