ကိုဗစ်ကူးစက်မှုကြောင့် သျှမ်းပြည်မြောက်ပိုင်း မြန်မာ-တရုတ်နယ်စပ် နမ့်ခမ်းမြို့တွင် တရုတ်အစိုးရမှ နယ်စပ် ၀င်/ထွက်ပေါက်များအားလုံး တင်းကြပ်ပိတ်လိုက်သောကြောင့် တရုတ်မှတင်သွင်းရောင်းချသော ဟင်းသီး ဟင်းရွက်များစျေး အဆမတန်မြှင့်တက်နေပြီး မွေးမြူရေးငါးများ ပြတ်လပ်နေသည် အထိဖြစ်ပေါ် နေကြောင်း သတင်းရရှိသည်။
“ဒီနေ့ နမ့်ခမ်းစျေးထဲမှာ ဟင်းသီးဟင်းရွက်များ စျေးအဆမတန်တက်နေတယ်ရှင့် ၊ ကျမတို့ မြို့ထဲမှာ ဟင်းသီးဟင်းရွက်တွေ သိပ်မစိုက်ကြတော့ ဒီရက်ပိုင်း တရုတ်ဘက်ကုန်စိမ်းသည်တွေ လာလို့မရတော့ ဟင်းသီးဟင်းရွက်တွေစျေးတက်နေတာ။ စျေးတက်နေတာမကဘူး တချို့ဟာတွေဆို ပစ္စည်းပြတ်နေပြီ ” ဟု စားသောက်ဆိုင်ပိုင်ရှင် ပါ့ပီး ပြောသည်။
နယ်စပ်ဝင်ထွက်ပေါက် မပိတ်ခင်ကာလ ခရမ်းချဉ်သီး တစ်ပိဿာစျေး တစ်ထောင်ကျပ်သာ ရှိသော်လည်း ယနေ့မှာ တစ်ပိဿာ သုံးထောင်ကျပ်အထိစျေးတက်သွားကြောင်း အလားတူ ယခင် က တစ်ပိဿာ ရှစ်ရာကျပ်ပေးဝယ်ရသော အာလူးမှာလည်း ယခုတွင် တစ်ပိဿာ နှစ်ထောင့်ငါးရာကျပ် ရောင်းနေကြ ကြောင်း ၄င်းကသျှမ်းသံတော်ဆင့် အားပြောပြသည်။
“ကုန်စိမ်းတွေ စျေးတက်နေလည်း မတတ်နိုင်ဘူး။ မီးဖိုချောင်သုံးပစ္စည်းဖြစ်တာကြောင့် မဖြစ်မနေ ၀ယ်ယူ ချက်ပြုတ်သုံးနေရမှာပဲ၊ တရုတ်ဘက်က ပိတ်နေသရွေ့တော့ မီးဖိုချောင်သုံးပစ္စည်းတွေကို စျေးကြီးကြီးနဲ့ဝယ်ယူစားသုံးနေရဦးမယ်” ဟု အိမ်ရှင်မတစ်ဦး ဖြစ်သူ နန်းခမ်း ကပြောသည်။
နမ့်ခမ်းမြို့စျေးထဲတွင် တရုတ်ထွက်မွေးမြူရေးငါးများ ပြတ်လပ်နေသည်မှာ ၃ ရက်ခန့်ရှိနေပြီဖြစ်ကြောင်း မူစယ်-နမ့်ခမ်း ဘက်ခြမ်းတွင်လည်း ငါးမွေးမြူရေးမလုပ်ကြသဖြင့်လက်ရှိ နမ့်ခမ်းမြို့စျေးထဲတွင် ဆလားဗီးယားငါးများနှင့် ငါးခူများ ပြတ်လပ် နေသည် အထိဖြစ်နေကြောင်း နမ့်ခမ်းမြို့ဒေသခံ လုံးဆိုင်လုံ ကဆိုသည်။
မူစယ် – နမ့်ခမ်းမြို့နှင့် နီးစပ်သော တရုတ်နိုင်ငံ ရွှေလီမြို့တွင် စက်တင်ဘာ ၁၄ ရက်နေ့က တရုတ်နိုင်ငံ အတွင်း ခိုးဝင်နေထိုင်သည့် မြန်မာနိုင်ငံသား နှစ်ဦးထံ ကိုဗစ် ရောဂါပိုး အတည်ပြုတွေ့ရှိရပြီး တရုတ်အစိုးရ မှ ရွှေလီမြို့နှင့်အနီးတဝိုက် အရေးပေါ်အခြေအနေကြေငြာပြီး မြန်မာ-တရုတ်နယ်စပ်တစ် လျှောက်ရှိ ၀င်ထွက်ပေါက်အားလုံးကို လုံခြုံရေးတင်းကြပ်ပြီး ပိတ်ပင်ထားလိုက် သည်။
(သျှမ်းသံတော်ဆင့်သတင်းထောက် စိုင်းဘတိုင်း ရေးသားပေးပို့သည်။)
Leave a Comments