ကိုဗစ်-၁၉ ဒုတိယလှိုင်း ကာလအတွင်း သျှမ်းပြည်တွင်း ပြေးဆွဲသည့် လေကြောင်းလိုင်းများ ခရီးသည်တင် ယာဉ်လိုင်းများ ရပ်နားခဲ့ကြောင်း သိရသည်။

ကိုဗစ် ကာလမှာ ခရီးသည်တင်ကားမှ ခရီးသည်များ မတင်ကြတော့ပဲ ကုန်စိမ်းများသာ တင်ခဲ့ရကြောင်း မူဆယ်မှ ရန်ကုန် မန္တလေး ပြေးဆွဲနေသည့် မူဆယ် ရွှေလီဦး ကားဂိတ် ကပြောသည်။

“ကားတော့ဆွဲတယ်။ ခရီးသည်တော့ မတင်တော့ဘူး။ ကုန်ပစ္စည်းတွေပဲ တင်တော့တယ်။ ခရီးသည်တွေကလည်း ခရီးထွက်ကြတော့ဘူး။” မူဆယ် ရွှေလီဦးကားဂိတ် ကပြောသည်။

တဆက်တည်းမှာပဲ ကိုဗစ်-၁၉ ဒုတိယလှိုင်းကြောင့် သျှမ်းပြည်တွင်း ပြေးဆွဲသည့် လေကြောင်းလှိုင်းများလည်း ရပ်နားခဲ့ရသည်။

လေကြောင်းခရီးသွားလာခြင်းမှ တစ်ဆင့် မြန်မာနိုင်ငံတွင်း ကိုဗစ်-၁၉ ရောဂါကူးစက်ပျံ့နှံ့မှု တားဆီးကာကွယ်နိုင်ရန် ကန့်သတ်ချက်များကို မြန်မာနိုင်ငံ လေကြောင်း ပို့ဆောင်ရေး ညွှန်ကြားမှု ဦးစီးဌာန၏ ထုတ်ပြန်ချက်အရ သြဂုတ် (၂၆) ရက်တွင် ရန်ကုန်အပြည်ပြည်ဆိုင်ရာ လေဆိပ်မှာ အပြည်ပြည်ဆိုင်ရာ ခရီးသည်တင်လေယာဉ်များ ပျံသန်းပြေးဆွဲခွင့်ရပ်နားခြင်းကို စက်တင်ဘာ(၃၀) ရက်နေ့ထိ ထပ်မံတိုးမြှင့်လိုက်သည်။

“ဒီလမှာ (၂)စောင်ပဲ ရောင်းရတယ်။ ဘယ်သူမှ ခရီးမသွားကြတော့ဘူး” တောင်ကြီးမြို့မှာ အခြေစိုက်သည့် လေယာဉ်လက်မှတ်အရောင်းကိုယ်စားလှယ် ပီခမ်း က သျှမ်းသံတော်ဆင့် က ပြောသည်။

တောင်ကြီး လေယာဉ်အရောင်းကိုယ်စားလှယ်များသည် တလလျှင် အစောင် ၂၀၀ မှ အစောင် ၃၀၀ ထိ ရောင်းရပြီး၊ ကိုဗစ်- ၁၉ စဖြစ်ချိန်တွင် အစောင် ၂၀ မှ အစောင် ၃၀ထိ ရောင်းရကြောင်း သိရသည်။

“ရုံးခန်းဖွင့်ထားပေမယ့် Air Line တွေက အကုန်ပိတ်လိုက်တယ်လေ။ KBZ တစ်ခုတည်းပဲ ကျန်တော့တယ်။ MNA လည်း ၁၁ ရက်နေ့က စပိတ်တယ်။ လကုန်ထိ သွားမယ်လို့ ထင်တာပဲ။ ပြည်ပက လုံးဝ ပြန်မဖွင့်သေး”ဟု ပီခမ်း ကပြောသည်။

ကိုဗစ်-၁၉ ကပ်ရောဂါကြောင့် လူစုလူဝေး မသွားရခြင်း၊ မိမိအိမ်တွင်သာ နေထိုင်ရခြင်း အလိုအပ်ပဲ အိမ်ပြင်မထွက်ရခြင်း စသည့် ကျန်းမာရေး ဌာနက ထုတ်ပြန်ထားသည်။

“အရင်ကဆိုရင် ဟဲဟိုး ရန်ကုန်ဆိုရင် ပုံမှန်တုန်းကဆိုရင် တစ်နေ့ ၅ စီးလောက် ရှိတယ်။ အခုက တစ်နေ့ တစ်စီးတောင် မရှိတော့ဘူးထင်တယ်။ ခရီးသွားမယ့်သူလည်း မရှိတော့ဘူးကော။” ဟု ပီပီခမ်း ကပြောသည်။

သျှမ်းပြည်တွင်း ပြေးဆွဲသည့် လေကြောင်းလိုင်းသည် Air KBZ ၊ Myanmar National Airlines ( MNA) ၊ Golden Myanmar Airlines ၊ Mann Yadanarpon Airlines ၊ Air Thanlwin စသည်တို့ ပြေးဆွဲသည်။

လက်ရှိဖြစ်ပွားနေသည့် ကိုဗစ်-၁၉ အခြေနေများကြောင့် Air Thanlwin လေကြောင်းလိုင်း၏ ပုံမှန်ပျံသန်းပြေးဆွဲလျက်ရှိသော ခရီးစဉ်များကို ၂၀၂၀ စက်တင်ဘာ (၁၀) ရက်နေ့ မှ စက်တင်ဘာ (၂၄) ရက်ထိ ပျံသန်းဝန်ဆောင်မှုပေးနေခြင်းအား ခေတ္တဆိုင်းငံ့ထားမည် ဖြစ်ကြောင်း ထုတ်ပြန်ထားသည်။

မြန်မာနိုင်ငံတွင် ယနေ့ (စက်တင်ဘာ ၁၈)ရက် မနက် (၈)နာရီ ကျန်းမာရေး နှင့် အားကစား ဝန်ကြီးဌာန ထုတ်ပြန်ချက် အရ ကိုဗစ်-၁၉ စုစုပေါင်း (၄၂၉၉ ) ဦးရှိပြီး၊ သေဆုံးသူ (၆၁) ဦး ထိမြင့်တက်လာကြောင်း သိရသည်။