မြန်မာ-တရုတ်နယ်စပ် တွင် ကိုဗစ်-၁၉ ကူးစက်ခံရသူ ရှိနေသော်လည်း ယနေ့ချိန်ထိ ဒေသခံပြည်သူများပေါ့ဆမှု ရှိနေသေးကြောင်း မူဆယ် လူမှု အဖွဲ့အစည်းများက ပြောသည်။
စက်တင်ဘာ (၁၂)ရက်တွင် မြန်မာဘက်မှ တရုတ်နိုင်ငံ ရွှေလီမြို့သို့ ခိုးဝင်သည့် မြန်မာနိုင်ငံသား (၂) ဦးကို တရုတ်ဘက်မှ စစ်ဆေးခဲ့ရာ ကိုဗစ်-၁၉ တွေ့ရှိခဲ့ကြောင်း တရုတ်အစိုးရ က တရားဝင်ကြေညာချက်ထုတ်ခဲ့သည်။
ထိုနည်းတူ စက်တင်ဘာ (၁၄) ရက်တွင်လည်း တရုတ်နိုင်ငံမှ မြန်မာနိုင်ငံ မူဆယ်ဘက်သို့ဝင်လာသည့် ရွှေ့ပြောင်းအလုပ်သမားတဦးတွင် ကိုဗစ်-၁၉ ပိုးတွေ့ရှိကြောင်း ကျန်းမာရေး နှင့် အားကစားဝန်ကြီးဌာန က ကြေညာချက် ထုတ်ပြန်ခဲ့သည်။
မြန်မာ-တရုတ်နယ်စပ် ဖြစ်တဲ့ ရွှေလီမြို့ တွင် မြန်မာနိုင်ငံသား(၂) ဦးကိုဗစ်-၁၉ တွေ့ရှိပြီးနောက် ရွှေလီမြို့ ကို ဝင်၊ထွက်ခွင့် ပိတ်ဆိုင်းခဲ့ပြီး Lockdown ချကာ ရွှေလီမြို့တွင်နေထိုင် သူများကို ကိုဗစ်-၁၉ အခမဲ့ စစ်ဆေးရန်လည်း တရုတ်အစိုးရ က ထုတ်ပြန်ခဲ့သည်။
သို့သော် မူဆယ်မြို့ တွင် လက်ရှိအချိန်ထိ ကိုဗစ်-၁၉ နှင့် ပတ်သက်ပြီး ပေါ့ဆနေသေးကြောင်း၊ တချို့ မှာ Mask (နှာခေါင်းစည်း) မတပ်ဆင်ဘဲ ပုံမှန် သွားလာနေကြကြောင်းလည်း မူဆယ် ဒေသခံ စိုင်းမြတ်အောင် က သျှမ်းသံတော်ဆင့်ကို ပြောသည်။
“အခု ပိုးတွေ့ ၁ ဦးရှိတာ တောင်ပေါ့ပေါ့ဆဆရှိနေသေးတယ်။ အပြင်သွားတာ Mask မတပ်တဲ့ လူတစ်ချို့ ရှိနေသေးတယ်။ ပုံမှန်သွားလာနေသေးတယ်။ မကြောက်ကြသေးဘူး။ကြောက်တဲ့လူလည်းရှိတယ်” ဟု စိုင်းမြတ်အောင် က ပြောသည်။
လက်ရှိ မူဆယ်မြို့ တွင် ကိုဗစ်-၁၉ ကာကွယ်သည့်အနေဖြင့် မီးသတ်အဖွဲ့ဝင်များ၊ ရပ်ကွက် အုပ်ချုပ်ရေး အဖွဲ့ဝင်များ ပူးပေါင်းကာ Mask မတပ်သူများကို ပထမအကြိမ်တွေ့ရှိပါက ဒဏ်ငွေ ၁၀၀၀ ကျပ် ပေးဆောင်စေပြီး ဒုတိယ အကြိမ်တွေ့ရှိပါက ကျပ်ငွေ ၂၀၀၀ ဒဏ်ငွေပေးဆောင်ရကြောင်း၊ တတိယ အကြိမ်တွေ့ရှိပါက ထောင်ဒဏ် (၁)လ ချမှတ်သွားမည် ဖြစ်ကြောင်းလည်း စိုင်းမြတ်အောင် ကပြောသည်။
ဆက်လက်ပြီး မြန်မာ-တရုတ် နယ်စပ် ရွှေလီမြို့သို့ ခိုးဝင်သည့် မြန်မာနိုင်ငံသား (၂) ဦး ထံတွင် ကိုဗစ်-၁၉ တွေ့ရှိပြီးနောက် ၎င်း (၂) ဦး နှင့် ထိတွေ့သူများ ကိုဗစ်-၁၉ ပိုးရှိ၊ မရှိ စစ်ဆေးနေကြောင်းလည်း မူဆယ်မြို့ ဂရုဏာလူမှုကူညီရေး အသင်းမှ ဦးသောင်းထွန်း က သျှမ်းသံတော်ဆင့် ကို ပြောသည်။
“ ရွှေလီ (၂) ယောက်နဲ့ဆက်စပ်သူတွေကို ဆေးစစ်ထားပါတယ်။ ထိတွေ့သူက များတယ်။ အရင်နေ့က စစ်တာ (၅၀)ကျော်တယ်။ မနေ့က စစ်တာက (၇၄) ယောက်စစ်တယ်” ဟု ဦးသောင်းထွန်းက ပြောသည်။
တရုတ်-မြန်မာ နယ်စပ်တွင် ရွှေလီမြို့တွင် မြန်မာနိုင်ငံသား (၂) ဦး ကိုဗစ် ၁၉ တွေ့ရှိသည့် အပေါ် လက်ရှိတွင်မြို့ Lockdown ချထားပြီး ရွှေလီမြို့တွင် နေထိုင်သူအားလုံးကို တစ်ယောက်မကျန် ကိုဗစ် ၁၉ ရောဂါ ဆေးစစ် ပေးသွားမည်ဟု တရုတ် အစိုးရ က ထုတ်ပြန်ခဲ့သည်။
ထို စစ်ဆေးမှု အတွက် ကုန်ကျစရိတ်အားလုံးကိုလည်း ရွှေလီ အစိုးရမှ တာဝန်ယူ ဆောင်ရွက် သွားမည်ဟု သိရသည်။
လက်ရှိတွင် မူဆယ်မြို့ Lockdown ချရန် အတွက်လည်း ကျန်းမာရေး တာဝန်ရှိသူ နှင့် မြို့ တာဝန်ရှိသူများက လုပ်ဆောင်နေကြောင်း ဦးသောင်းထွန်းက ဆိုသည်။
ထို့အပြင် ယခုအချိန် မူဆယ်မြို့သို့ ရောက်လာသူများအား အိမ်ရှင် အခန်းရှင်များက အိမ်/ အခန်း ငှားမပေးကြောင်း သိရသည်။
“မြန်မာနိုင်ငံမှာ ကိုဗစ် ၁၉ စဖြစ်ကတည်းက ကျနော်တို့က အိမ်ရှင်တွေကို ခေါ်ပြီးတော့ အိမ်ငှားတွေကို လူသစ်တွေကို ထပ်ပြီးလက်မခံဖို့ ကို အခုထက်ထိတော့ လုပ်နေသေးတယ်။ တစ်ခြားမြို့ကလာရင်လည်း ဧည့်သည် တွေကို လက်မခံဖို့ ကျနော်တို့ကို အကြောင်းကြားထားပြီးသား” ဟု စိုင်းမြတ်အောင်က ပြောသည်။
အလားတူ ယမန်နေ့ စက်တင်ဘာ ၁၅ ရက် သျှမ်းပြည်နယ်တောင်ပိုင်း ဆီဆိုင်မြို့တွင် ကိုဗစ် ၁၉ ပိုးတွေ့လူနာတစ်ဦးရှိလာသည့် အပေါ် ယနေ့ ပြည်သူများပေါ့ဆ စွာသွားလာနေကြောင်း ဆီဆိုင်မြို့နယ် ဦးမောင်မောင် ၏ လူမှုကွန်ရက်စာမျက်နှာတွင်ရေးသားထားသည်။
မြန်မာနိုင်ငံတွင် ကိုဗစ်- ၁၉ ကူးစက်မှုနှုန်းမြင့်လာသောကြောင့် သျှမ်းပြည်နယ်တွင် Mask မတပ်သူများကို ပညာရေးပေးလုပ်ဆောင်မှုများ၊ တစ်မြို့နယ်မှ တစ်မြို့နယ်သို့ သွားလာရာတွင် ကျန်းမာရေးထောက်ခံစာနှင့် ရပ်ကွက် ထောက်ခံစာများကို ယူဆောင်သွားလာနေရ ကြောင်းသိရသည်။
ယနေ့ မြန်မာနိုင်ငံတွင် ကိုဗစ်အတည်ပြုလူနာ ၃၆၃၆ ဦး ၊ သေဆုံးသူ ၃၉ ဦးရှိကြောင်း ယနေ့ စက်တင်ဘာ ၁၆ ရက်မနက်ပိုင်း ကျန်းမာရေး နှင့် အားကစားဝန်ကြီးဌာန ထုတ်ပြန်ချက်အရ သိရသည်။
(အလုပ်သင် သတင်းထောက် စိုင်းဆိုင်လှိုင်း ရေးသားသည်။)
