ကိုဗစ် ၁၉ ကာလအတွင်း တောင်ကြီး ဈေးသည်များအခက်ခဲကြုံတွေ့နေရ

0

သျှမ်းပြည်တောင်ပိုင်း တောင်ကြီးမြို့ (မြို့မဈေး)တွင် ဈေးရောင်းနေသူများ မှာကိုဗစ် ၁၉ ကာလအတွင်း ဈေးရောင်းပါးပြီး စားဝတ်နေရေး ခက်ခဲနေကြောင်း စုံစမ်းသိရှိရသည်။

မြန်မာနိုင်ငံတွင် ကိုဗစ် ၁၉ ကူးစက်မှုနှုန်းမြင့်လာသော်လည်း တောင်ကြီးမြို့ရှိ အခြေခံလူတန်းစား ဈေးသည်များသည် ကျန်းမာရေးထက် ဝမ်းရေးကို ပိုဦးစားပေးနေရသည်။

“ဈေးရောင်းတာလည်း မကောင်းဘူး။ တချို့ရက်တွေဆိုတောင် မရောင်းရဘူး။ ရောဂါ ကိုကြောက်ရပေမယ့် ဒါမှမလုပ်ရင် စားစရာ ကမရှိဘူး။ ကျမဆို အခုအိမ်ငှားနေရတယ်။ ကျန်းမာရေးထက် စားဝတ်နေရေးအတွက် ပိုပြီးစဉ်စားရတယ်လေ” ဟု တောင်ကြီးမြို့ (မြို့မဈေး) မှ သစ်သီးသည် မဇင် ကပြောသည်။

ဈေးသည်အများစုသည် တခြားမြို့နယ် မှ တောင်ကြီးသို့လာရောက်ကာ စီးပွားရှာစားကြသူများဖြစ်ပြီး၊ ထိုသူများသည် အိမ်ငှားနေထိုင်ရသည်သူများဖြစ်ကြောင်း မဇင် က ပြောသည်။

“ကိုဗစ်ကာလ မှာဈေးရောင်းရတာ အဆင်မပြေဘူး။ ကုန်ပစ္စည်းတွေကို တဆင့်ယူရောင်းထားတာလေ။ ရောင်းရသမျှက စားဖို့ဘဲပြန်ဖြစ်နေတယ်။ ကျန်းမာရေးထက် စားဖို့က ပိုအရေးကြီးနေတာကို” ဟု အမှတ်(၅) ဈေးတွင် ကုန်စိမ်းရောင်းနေသည့် မဥမ္မာ က သျှမ်းသံတော်ဆင့် ကို ပြောသည်။

ဈေးသည်များသည် ကိုဗစ်-၁၉ ကူးစက်မှုနှုန်းမြင့်တက်လာမှုကို သိသော်လည်း ဝမ်းရေး အတွက် ရုန်းကန်နေရသူများဖြစ်ပြီး၊ တဖက်တွင် ဈေးရောင်းရန် အတွက် ချေးငွေ များယူထားကြသဖြင့် ဝင်ငွေ မရှိပါက ချေးငွေပြန်ဆပ်ရန် အခက်အခဲများရှိလာနိုင်ကြောင်း မဥမ္မာ ပြောသည်။

“ ဈေးရောင်းတာ ချေးငွေနဲ့ ယူထားတာလဲရှိတယ်။ ချေးငွေတွေကလည်း မရပ်နားပေးဘူး။ ကောက်နေသေးတယ်။ တောင်းပန်ရင်လည်း ရက်ဘဲဆိုင်းပေးတယ်။ လျှော့ပေးတယ်လို့တော့ မရှိဘူး။ အခုက အကြွေးကတစ်ဖက် စားဖို့ကတစ်ဖက် ဖြစ်သွားတာပေါ့” ဟု မဥမ္မာ ကဆိုသည်။

တောင်ကြီးမြို့မဈေးတွင် လုပ်ကိုင်စားသောက်နေသူများသည် အစိုးရ မှ ထောက်ပံ့သည့် ငွေကြေးတစုံတရာ မှ မရရှိကြပေ။

“အန်တီတို့က အစိုးရကနေ ထောက်ပံ့ကြေးငွေမရဘူး။ စီးပွားရေးကလည်း ရှိတယ်ဆိုတော့။ ကိုယ်ထက်မရှိတဲ့လူကိုပေးတာတော့ ကျေနပ်ပါတယ်။ ဒါပေမယ့် အခုက ကုန်တွေကို ပြန်ဖြည့်တင်ဖို့က လုံးဝမရှိတော့ဘူး။ ရောင်းရတာက စားဖို့ထဲပါသွားတာ” ဟု ထိုဈေးသည်က ထပ်လောင်းပြောသည်။

ကိုဗစ် ၁၉ သည် ရေရှည်ဖြစ်နေပါက အခြေခံအလုပ်သမားဈေးသည်များက ပိုပြီးအခက်ခဲရှိလာနိုင်ကြောင်း တောင်ကြီးမြို့ဒေသခံတစ်ဦးကပြောသည်။

“ကိုဗစ် ၁၉ ဖြစ်လို့ အိမ်မှာဘဲ နေလို့မရဘူး။ အိမ်နေရင် ဘယ်သူမှလာမကျွေးနိုင်တာ။ ကိုဗစ် ၁၉ကိုတော့ လက်ခနခနဆေးတယ်။ Mask တပ်တယ်။ အဲလိုဘဲကာကွယ်ပြီးဈေးရောင်းရတယ် ဟု ကုန်ခြောက်ဈေးသည် နန်းသူဇာ ကပြောသည်။

တောင်ကြီးမြို့တွင် ယနေ့(စက်တင်ဘာ ၁၅) ရက်မှစတင်ကာ Mask (နှာခေါင်းစည်း) မတပ်ဘဲ သွားလာနေသူများကို သက်ဆိုင်ရာ ပညာပေးစနစ်ဖြင့် စတင်လုပ်ဆောင်နေကြောင်း သိရသည်။

မြန်မာနိုင်ငံတွင် ကိုဗစ် ၁၉ ပိုးတွေ့လူနာ (၃၂၉၉) ဦး ရှိကြောင်း ပြန်လည်သက်သာလာသူ (၇၉၀) ဦးရှိပြီး သေဆုံးသူ (၃၂) ထိရှိလာပြီး ဖြစ်ကြောင်း ကျန်းမာရေးဝန်ကြီးဌာန ထုတ်ပြန်ချက်မှ သိရသည်။


သျှမ်းပြည် တဝှမ်းတွင် ဆေးကုသခံနေသည့် ကိုဗစ် ၁၉ လူနာ စုစုပေါင်း (၈) ဦး ရှိကြောင်းသိရသည်။

(အလုပ်သင် သတင်းထောက် စိုင်းဆိုင်လှိုင်း ရေးသားသည်။)

Leave a Comments

SHARE