ငြိမ်းချမ်းရေးတွင် ပါ၀င်သင့်ပါ၀င်ထိုက်သူများ အားလုံးပါ၀င်ခွင့်ရရှိရေးအတွက် သျှမ်းပြည်တိုးတက်ရေးပါတီ SSPP/SSA က ဦးသိန်းဇော်ဦးဆောင်သည့် နေပြည်တော် ငြိမ်းချမ်းရေးကော်မရှင် PC နှင့်ဆွေးနွေးစဉ် ပြောဆို လိုက်ကြောင်းသိရသည်။

ငြိမ်းချမ်းရေးကော်မရှင် PC ၏ ဒုတိယ ဥက္ကဌ ဦးသိန်းဇော် နှင့် အတွင်းရေးမှူး ဒုတိယ ဗိုလ်ချုပ်ကြီး ခင်ဇော်ဦး (ငြိမ်း) ဦးဆောင်သည့် အဖွဲ့ သည် ငြိမ်းချမ်းရေး နှင် ့ဒေသဖွံ့ဖြိုးတိုးတက်ရေးအတွက် ၀မ့်ဟိုင်း ဌာနချုပ်သို့ တည အိပ်ခရီးဖြင့် မေလ ၁ ရက်နေ့ကရောက်ရှိကာ သျှမ်းပြည်တိုးတက်ရေးပါတီ SSPP/SSA ခေါင်းဆောင်များနှင့် ဆွေးနွေးခဲ့ကြသည်။

“တွေ့ဆုံမှု က အပြုသဘောဆောင်ပါတယ်။ အဓိက ကတော့ ငြိမ်းချမ်းရေးနဲ့ ဒေသဖွံ့ဖြိုးတိုးတက်ရေး အတွက် ဆွေးနွေးကြတယ်။ ငြိမ်းချမ်းရေး ကိစ္စ မှာ ဖြစ်ပွားနေတဲ့ နိုင်ငံရေးပြသနာတွေကို စစ်ရေးနည်းနဲ့ မဖြေရှင်း နိုင်ငံရေးနည်းလမ်းနဲ့ဖြေရှင်းဖို့ သွားနေတဲ့ ငြိမ်းချမ်းရေးဖြစ်စဉ်မှာလဲ အားလုံးပါ၀င်ဖို့ပေါ့ ။ နောက်လူထုကို ကျေးဇူးဆပ်နိုင်ဖို့ ဖွံ့ဖြိုးရေးလုပ်ငန်းမှာ ပါ၀င်ကူညီဖို့ ဖြစ်တယ်။ မကြာမကြာတွေ့ဆုံနိုင်ဖို့လဲ နှစ်ဘက်သဘောထားရှိကြတယ်”- ဟု ပြောရေးဆိုခွင့်ရှိသူ ဒုတိယ ဗိုလ်မှူးကြီး စိုင်းဆု ကပြောသည်။

၀မ့်ဟိုင်းဌာနချုပ်သို့ ရောက်ရှိသည့် ဦးသိန်းဇော် နှင့် အဖွဲ့သည် သျှမ်းပြည်တိုးတက်ရေးပါတီ SSPP/SSA ခေါင်းဆောင်များနှင့်ဆွေးနွေးပြီး ၀မ့်ဟိုင်းတွင် တည အိပ်ကာ မေလ ၂ ရက်နေ့ နံနက်ပိုင်း တွင် ၀မ့်ဟိုင်းဌာန ချုပ်မှ လားရှိုးမြို့သို့ ပြန်လည်ထွက်ခွါသွားကြောင်း ကြားသိရသည်။

တွေ့ဆုံဆွေးနွေးပွဲတွင် ကျားဖြူပါတီ ဥက္ကဌ ဦးစိုင်းအိုက်ပေါင်း ၊ ဒုတိယ ဥက္ကဌ (၁) ဦးစိုင်းဆောင်ဆီ နှင် ့ ဒုတိယ ဥက္ကဌ (၂) ဦးစိုင်းလှကျော်တို့က အကျိုးတော်ဆောင်အနေဖြင့်ပါ၀င်ကြောင်း၊ ဦးစိုင်းအိုက်ပေါင်း အနေ ဖြင့်လည်း ‘NCA လမ်းကြောင်းဖြစ်မြောက်အောင်မြင်ရေးအတွက် ယုံကြည်မှုတည်ဆောက်နိုင်ရန် သျှမ်းပြည်တိုး တက် ရေးပါတီ၏ တောင်းဆိုချက်များအား ငြိမ်းချမ်းရေးကော်မရှင် PC အနေဖြင့် ၀ိုင်းဝန်းကူညီ ဆောင်ရွက်ပေး ရန်’ လည်း အစည်းအဝေးတွင် ဦးသိန်းဇော်ထံ တိုက်တွန်းးပြောဆိုသည်ဟု ဆိုသည်။

သျှမ်းပြည်တိုးတက်ရေးပါတီ SSPP/SSA သည် တနိုင်ငံလုံးအပစ်အခတ်ရပ်စဲရေးစာချုပ် မူကြမ်းရေးဆွဲစဉ် ညီညွှတ်သောတိုင်းရင်းသားလူမျိုးများကောင်စီ မှတဆင့် ပါ၀င်ရေးဆွဲခဲ့သည့်အားလျော်စွာ လက်ရှိတွင်လည်း သျှမ်းပြည်တိုးတက်ရေးပါတီ SSPP/SSA အနေဖြင့် NCA အား ဆန့်ကျင်ကန့်ကွက်ရန် သဘောထားမရှိ ဟုဆိုပါသည်။

သို့သော် ၄င်းသည် NCA လမ်းကြောင်း လက်မခံသည့် မြောက်ပိုင်းမဟာမိတ် အဖွဲ့ အတွင် ပါ၀င်သည်။ မြောက်ပိုင်း မဟာမိတ်အဖွဲ့ဝင်များဖြစ်ကြသည့်တအာင်း(ပလောင်) TNLA ၊ ကိုးကန့် MNDAA တို့ အား အစိုးရ နှင် ့တပ်မတော် က လက်မခံပေ။ ထို့ကြောင့် ငြိမ်းချမ်းရေးတွင် အားလုံးပါ၀င်ခွင့်ရရေးအတွက် SSPP/SSA မှ တောင်းဆိုခြင်း ဖြစ်သည်။