သျှမ်းပြည် တောင်ပိုင်း တောင်ကြီးမြို့တွင် ကျန်းမာရေး စစ်ဆေးရေးဂိတ်ကို ၂၄ နာရီ ဖွင့်လှစ် ထားကြောင်းစုံစမ်းသိရှိရသည်။

ယနေ့ စက်တင်ဘာ ၉ ရက် မွန်းလွဲ ၃ နာရီ ကစပြီး သျှမ်းပြည် တောင်ပိုင်း တောင်ကြီး မြို့ဝင်၊ထွက်တွင် ကျန်းမာရေးစစ်ဆေးရေး ဂိတ်ကို ၂၄ နာရီ စတင်ဖွင့်လှစ်ကြောင်း တောင်ကြီးမြို့နယ် အုပ်ချုပ်ရေးမှူး ဦးဖြိုးမင်းထိုက် က သျှမ်းသံတော်ဆင့်ကို ပြောသည်။

“ဒီနေ့ကနေစပြီးတော့ ကျနော်တို့က ၂၄ နာရီလုံးကျန်းမာရေး စစ်ဆေးဂိတ်ဖွင့် သွားမှာပါ ”ဟု ဦးဖြိုးမင်းထိုက် က ဆိုသည်။

ယခင်က ကျန်းမာရေး စစ်ဆေးရေး ဂိတ်ကို မနက် ၆နာရီ မှ ညနေ ၆နာရီထိသာ ဖွင့်လှစ်ခဲ့ကြောင်း သိရသည်။

အဆိုပါ ကျန်းမာရေးစစ်ဆေးရေးဂိတ်တွင် တောင်လေးလုံးတွင် ၂၀ ဦး၊ ဟိုးပုံး-တောင်ကြီး ပြည်ထောင်စုလမ်းမတွင် ၂၄ ဦး အလှည့်ကျ တာ၀န်ယူစောင့်ဆိုင်းစစ်ဆေးသွားမည် ဖြစ်ကြောင်းလည်း ဦးဖြိုးမင်းထိုက်က ပြောသည်။

မြန်မာနိုင်ငံတွင် ကိုဗစ်-၁၉ ကူးစက်ခံရမှုနှုန်း တရက်ထက်တရက် မြင့်တက်လာ သဖြင့် တောင်ကြီးတွင် ကျန်းမာရေး စစ်ဆေးရေးဂိတ် ပြန်လည် ဖွင့်လှစ်ခြင်းဖြစ်ကြောင်းသိရသည်။

မြန်မာနိုင်ငံအတွင်းရှိ ကိုဗစ်-၁၉ ရောဂါ ကူးစက်ခံရသူ (၃) ဦးနှင့် အထက်ရှိသည့် မြို့နယ်များ မှ ဝင်ရောက်လာသူများကို Quarantine ဝင်ရမည် ဟု စက်တင်ဘာ (၇)ရက်စွဲဖြင့် တောင်ကြီးမြို့နယ် အုပ်ချုပ်ရေးမှူး က ထုတ်ပြန်ခဲ့သည်။

တောင်ကြီးမြို့နယ် အတွင်း ရောဂါ ကူးစက်ပြန့်ပွားမှု မရှိစေရန် အတွက် ပြည်ပနိုင်ငံများမှ ပြည်လည် ဝင်ရောက်လာသူများထဲမှ Quarantine ဝင်ရောက်မှုမရှိသေးသူများ၊ ရခိုင်ပြည်သို့ ခရီးသွားရာဇာဝင်ရှိသူများ၊ ရန်ကုန် တိုင်းဒေသကြီး အတွင်းသို့ Stay at Home သတ်မှတ်ထားသည့် မြို့နယ်(၇)မြို့နယ် သို့ ခရီးသွားရာဇာဝင်ရှိသူများအား Quarantine ဝင်ရောက်ရမည် ဟု ထုတ်ပြန်ချက်တွင် ထည့်သွင်းရေးသားထားသည်။

ထို့ ပြင် မြန်မာနိုင်ငံတွင် ကိုဗစ် ၁၉ ကူးစက်မှုနှုန်းများလာသဖြင့် သျှမ်းပြည်နယ်တောင်ပိုင် တောင်ကြီးမြို့နယ်တွင် ကျန်မာရေးထောက်ခံချက် မပါဘဲဝင်ရောက်မည်ဆိုပါက Quarantine ထားရှိသွားမည် ဟု သိရသည်။

“ပြည်တွင်း ကျန်းမာရေး ထောက်ခံချက်မပါဘဲ တောင်ကြီးမြို့နယ်ထဲရောက်လာသူတွေကို တောင်ကြီးမြို့ အ.ထ.က (၅) ကျောင်းနဲ့ အ.ထ.က (၂) ကျောင်း တွေမှာ Quarantine ထားရှိပါတယ်” ဟု တောင်ကြီးမြို့ ပရဟိအဖွဲ့က ကို၀င်းနိုင်စိုး ကပြောသည်။

မြန်မာနိုင်ငံတွင် ကိုဗစ် ၁၉ ပိုးတွေ့လူနာ (၁၈၀၇) ဦးရှိပြီး ပြန်လည်သက်သာလာသူ (၄၆၀) နှင့် သေဆုံးသူ (၁၂)ဦး ရှိပြီးဖြစ်ကြောင်း ကျန်မားရေးဝန်ကြီးဌာန ထုတ်ပြန်ချက်အရ သိရသည်။

ယနေ့ (စက်တင်ဘာ ၉) ရက်တွင် မနက် (၈) နာရီ သတင်းထုတ်ပြန်ချက် အရ ကိုဗစ် -၁၉အတည်ပြု လူနာ (၂) ဦး ထပ်မံသေဆုံးကြောင်း သိရသည်။

(အလုပ်သင် သတင်းထောက် စိုင်းဆိုင်လှိုင်း ရေးသားသည်။)