တောင်ကြီးတွင် ကိုဗစ်-၁၉ ဓာတ်ခွဲနမူနာ စစ်ဆေးနိုင်ပြီ

0

သျှမ်းပြည်တောင်ပိုင်း တောင်ကြီးမြို့ရှိ စဝ်စံထွန်း ဆေးရုံတွင် ကိုဗစ်-၁၉ ဓာတ်ခွဲ နမူနာ စစ်ဆေးနိုင်ပြီဖြစ်ကြောင်း စုံစမ်းသိရှိရသည်။

ဓာတ်ခွဲခန်းထားရှိမည့် တောင်ကြီးမြို့ စဝ်စံထွန်း ဆေးရုံ ( Photo by SHAN)

သျှမ်းပြည်တောင်ပိုင်းရှိ မြို့နယ်များ၏ ကိုဗစ်-၁၉ ဓါတ်ခွဲနမူနာကို တောင်ကြီး စဝ်စံထွန်းဆေးရုံသို့ ပေးပို့လာရမည်ဖြစ်ပြီး တစ်ပတ်လျှင် ၂ ရက် စစ်ဆေး သွားမည်ဖြစ်ကြောင်း သျှမ်းပြည်နယ် ကျန်းမာရေး နှင့် ကုသရေး ဦးစီးဌာနမှူး ဒေါက်တာ သူဇာချစ်တင် က သျှမ်းသံတော်ဆင့် ကိုပြောသည်။

“စဝ်စံထွန်း ဆေးရုံမှာ စစ်လို့ရပြီ။ တစ်ပတ်ကို ၂ ရက် စစ်မယ်။ ဓါတ်ခွဲနမူနာတွေ ပို့တာများရင်တော့ ရက်တိုးစစ်ရမယ်။ ခုလောလောဆယ်တော့ သျှမ်းပြည်တောင်ပိုင်းမှာ ရှိတဲ့ မြို့နယ်တွေရဲ့ ဓါတ်ခွဲနမူနာ စပြီးတော့ စစ်ဆေးမယ်။” ဒေါက်တာ သူဇာချစ်တင် က ထပ်လောင်းပြောသည်။

တောင်ကြီး စဝ်စံထွန်းဆေးရုံတွင် ကိုဗစ်-၁၉ ဓာတ်ခွဲနမူနာကို တစ်ပတ်ကို ၂ ရက် စစ်ဆေးပေးမည်ဖြစ်ပြီး တကြိမ်လျှင် ဓါတ်ခွဲနမူနာ ( ၁၀၀) ဝန်းကျင် စစ်ဆေးသွားမည်ဖြစ်ကြောင်း သိရသည်။

“စစ်ဆေးလို့ရပြီပေ့ါနော်။ ဓါတ်ခွဲ နမူနာ (၉၅) (၁၀၀) လောက် စစ်နိုင်တယ်ဆိုတော့ တစ်ပတ်မှာ ၂ ရက် စစ်မယ်ဆိုပြီးတော့ သတ်မှတ်ထားပါတယ်။ လောလောဆယ် အဲ့လို စစ်မယ်လို့တော့ သတ်မှတ်ထားပါတယ်။” ဟု ဒေါက်တာ သူဇာချစ်တင် ကပြောသည်။

သျှမ်းပြည်မြောက်ပိုင်း လားရှိုးပြည်သူ့ ဆေးရုံမှာလည်း ဓါတ်ခွဲခန်း တည်ဆောက်ရန်အတွက် စတင်အကောင်အထည်ဖော်နေပြီဖြစ်ကြောင်း လားရှိုးပြည်သူ့ဆေးရုံ ထံမှ စုံစမ်းသိရှိရသည်။

“ဓါတ်ခွဲခန်းက ခုမှစပြီး ဆောက်နေပြီ၊ ဆောက်နေပြီ ဆိုပေမယ့် မြေတူးနေပြီပေါ့နော်။ အဆောက်အဦးက ၃ လ လောက် ခန့်မှန်းထားပါတယ် ။နိုဝင်ဘာလ လောက်မှ ပြီးမယ်လို့မှန်းထားတယ်။ ၄ လမြောက်မှာမှ စတင် စစ်ဆေးနိုင်မှာပါ” ဟု လားရှိုး ပြည်သူ့ဆေးရုံကြီး မှ ဆေးရုံအုပ် ဒေါက်တာဉာဏ်မြင့် ကပြောသည်။

သျှမ်းပြည်မြောက်ပိုင်းရှိ ဓါတ်ခွဲနမူနာများကို မန္တလေး ဓါတ်ခွဲခန်းသို့ ပို့ဆောင် စစ်ဆေးရကြောင်း သိရသည်။

သျှမ်းပြည်တောင်ပိုင်း စဝ်စံထွန်းဆေးရုံ နှင့် သျှမ်းပြည်မြောက်ပိုင်း လားရှိုး ပြည်သူ့ဆေးရုံတွင် ထားရှိသည့် ဓါတ်ခွဲခန်းသည် တစ်ဦးတည်း အလှူရှင်ဖြစ်သည့် ငွေအောင်ကမ္ဘာ ကျောက်မျက်ကုမ္ပဏီ လီမီတက် မှ လှူဒါန်းခြင်း ဖြစ်သည်။

အဆိုပါ ဓါတ်ခွဲခန်းများသည် အထူးသဖြင့် ကိုဗစ်-၁၉ ဓါတ်ခွဲနမူနာ အပြင် တခြားဗိုင်းရပ်စ် များပါစစ်ဆေးနိုင်မည် ဖြစ်ပြီး ပုံမှန်လစဉ် ကျပ်သိန်းပေါင်း ၂၈၀၀ ခန့်လိုအပ်ကြောင်း လူမှုရေး ဝန်ကြီး ဒေါက်တာ မျိုးထွန်း က ပြောခဲ့ဖူးသည်။

Leave a Comments

SHARE