ညောင်ရွှေမြို့နယ်အတွင်း မြေယာသိမ်းဆည်းမှုကိစ္စနှင့်ပတ်သက်၍ လွှတ်တော်တိုင်ကြားစာ စီစစ်ရေး ကော်မတီထံပို့ရန် စီစဉ်နေကြောင်း ညောင်ရွှေမြို့ နယ်မဲဆန္ဒနယ် အမှတ်(၁) ၊ ပြည်သူ့လွှတ်တော် ကိုယ်စားလှယ် ဦးခင်မောင်ဝင်း ကပြော သည် ။
ညောင်ရွှေ မြို့နယ် ၊ မိုင်းသောက်ကျေးရွာအုပ်စုတွင် ဧပြီလ ၃၀ ရက်နေ့က အသိမ်းဆည်းခံရ လယ်ယာမြေများ ပြန်လည်ရရှိရေးအတွက် ဆန္ဒ ထုတ်ဖော်ခဲ့ကြရာတွင် ထိုသို့ဆိုလိုက်ခြင်းဖြစ်သည် ။
“ ဒီမဲဆန္ဒနယ်ကလွှတ်တော် ကိုယ်စားလှယ်တွေကို ကျနော်တို့ စာနဲ့အလီလီ ၊ ဖုန်းနဲ့အခါခါ ဆက်သွယ်ပြီး ဒီကိစ္စကို ကွင်းဆင်းစစ်ဆေးပေးဖို့ အကူအညီ တောင်းခဲ့တယ် ၊ တစ်ခါမှ လာရောက်ဆွေးနွေးပေးတာမျိုးမရှိဘူး ” ဟု မိုင်းသောက် ကျေးရွာအုပ်စု မီးသွေးဖုတ် ကျေးရွာ နေတောင်သူတစ်ဦး ဖြစ်သည့် ကိုကျော်သူ ကပြောသည် ။
“ ဒါကတော့ အစိုးရအလုပ်ဗျ ၊ ကျနော်တို့လွှတ်တော်ကိုယ်စားလှယ်က ကြား ၀င်ညှိနှိုင်းပေးလို့ပဲရမယ် ကျနော်တို့ဆုံးဖြတ်ပေးလို့မရဘူးဗျ ။ကျနော်ပြောတယ်လေ မြေတိုင်းစစ်တို့ ဘာတို့တိုင်ကြား စာ စစ်ဆေးတို့ဆီ စာတင် လိုု့ပြောတာ သူတို့မှ မတင်တာ ။ သူတို့က ကျနော့ဆီဖုန်းနဲ့ပဲဆက် သွယ် တယ် ၊ လူကိုယ်တိုင်သွားတော့ လည်းမတွေ့ ဘူးဗျ ” ဟု ပြည်သူ့ လွှတ် တော် ကိုယ်စားလှယ် ဦးခင်မောင်ဝင်း ကဆက်ပြောသည် ။
မိုင်းသောက်ကျေးရွာအုပ်စု ၊ ပါနွေးမြောက်ရွာ ၊ ပါနွေး အလယ်ရွာ ၊ ပါနွေး တောင်ရွာ ၊ မီးသွေးဖုတ်ရွာ နှင့် ပေပင်ကုန်းရွာ စသည့် ရွာ (၅ ) ရွာမှ ဒေသခံတောင်သူ (၂၁)ဦး၏ လယ်ယာမြေ ဧက ၄၃.၉ အား ဟိုတယ်နှင့် ခရီးသွား ၀န်ကြီးဌာနမှ ၁၉၉၁ ခုနှစ်ကသိမ်းဆည်းခဲ့ပြီး ၂၀၀၈ ခုနှစ်အထိ စိုက်ပျိုးရေးများပြန်လည်လုပ်ကိုင်ခွင့် ပေးခဲ့သော်လည်း ယင်းနောက်ပိုင်း တွင် မြတ်မင်္ဂလာဟိုတယ်နှင့် Villa Innlay ဟိုတယ် များထံငှားရမ်းထားပြီး ကျန်မြေများမှာ ပလပ်မြေများ အဖြစ်ရှိနေသည်ဟု ပါနွေးအလယ်ရွာနေ ဦးအောင်ကျော် ကရှင်းပြသည် ။
ယင်းသိမ်းဆည်းခံ မြေယာများနှင့်ပတ်သက်၍ တောင်သူများမှ ဌာန အသီးသီးတွင်တင်ပြ ခဲ့သော်လည်း မည်သည့်ဌာနမှလာရောက် ဆွေးနွေး ညှိနှိုင်း အဖြေရှာပေးခြင်း မရှိသည့်အတွက် ဒေသခံ တောင်သူများ မှ ဧပြီလ ၃၀ ရက်နေ့ကလမ်းလျှောက် စီတန်းလှည့်လည်ဆန္ဒပြခဲ့ခြင်းဖြစ် သည်ဟု တောင်သူများထံဆက်လက် သိရသည် ။
