သျှမ်းပြည်တောင်ပိုင်း လွိုင်လင်မြို့နယ် တွင် ကိုဗစ်- ၁၉ ကာကွယ်ထိန်းချုပ်ရေးစီမံချက်ဖြင့် မြို့ဝင်ဂိတ်တွင် အလိုအလျောက် အဖျားတိုင်းစက် ထားရှိကြောင်းစုံစမ်းသိရသည်။
စက်တင်ဘာ ၄ ရက်မှ စတင်ကာ လွိုင်လင်မြို့နယ် ပင်လုံမြို့တို့တွင် ကိုဗစ်- ၁၉ ကာကွယ်ထိန်းချုပ်ရန်အတွက် အလိုအလျောက် အဖျားတိုင်းစက်များကိုမြို့ဝင်ဂိတ်တွင် ထားရှိခဲ့ကြကြောင်းသိရသည်။
“မြို့ဝင်ဂိတ်စောင့် တာဝန်ကျတဲ့သူတွေက ခရီးသွားလာသူတွေနဲ့တိုက်ရိုက်ထိတွေ့ရတယ်။ ဒါကို ကျနော်တို့က ပိုပြီးလုံခြုံစိတ်ချစေချင်လို့ စက်ကိုသွားပြီး တပ်ဆင်ထားလိုက်တာပါ” ဟု လွိုင်လင်မြို့နယ်အုပ်ချုပ်ရေးမှူး ဦးသန်းလွင်က သျှမ်းသံတော်ဆင့် ကိုပြောသည်။
စက်ကို လွိုင်လင်မြို့ဝင်ဂိတ်တွင် ၂ လုံးနှင့် ပင်လုံမြို့၀င်ဂိတ်တွင် ၁ လုံး ထားရှိကြောင်း ဉီးသန်းလွင်က ဆိုသည်။
၄င်းစက်သည် ကိုယ်ပူချိန်တိုင်းပြီးနောက် တိုင်းတာခံရသူ၏ ကိုယ်ပူချိန်မှတ်တမ်းနှင့် ဓါတ်ပုံမှတ်တမ်း ကို ၇ ရက်ကြာ သိမ်းထားပေးကြောင်း၊ ထို့ပြင် စက်မှ Hand Gel(လက်သန့်ဆေးရည်)ကို ပါ တစ်ခါထည်းထုတ်ပေးကြောင်းသိရသည်။
အလိုအလျောက် ကိုယ်ပူချိန်တိုင်း စက်ကိရိယာတလုံးသည် တန်ဖိုး ကျပ် ၃ သိန်းခန့်ရှိကြောင်း သိရသည်။
ပြည်ပ ခရီးသွားလာမှု၊ ကိုဗစ်-၁၉ ရောဂါ အဖြစ်များသည့်ဒေသမှ လာသူများဖြစ်ပါက Quarantine ဝင်ရမည်ဖြစ်ပြီး၊ ယခင်က ပြည်ပမှ ပြန်လာပါက ၇ ရက်သာ Quarantine ထားရှိသော်လည်း လက်ရှိမှာ Qurantine ၁၄ ရက် ထားကြောင်း ဆေးစစ်ချက် Negative ဖြစ်မှသာလျှင် သက်ဆိုင်ရာ မြို့နယ်သို့ ပြန်လွှတ်မည်ဖြစ်ကြောင်း ဦးသန်းလွင် က ပြောသည်။
“တခြားဒေသကလာတဲ့သူတွေ လွိုင်လင်မြို့နယ်ထဲ ၀င်လာမယ်ဆိုရင် ကျန်းမာရေးထောက်ခံစာ ပါလာမှ လိုရာခရီးကို ဆက်ပေးသွားမှာပါ။ မပါလာရင် Quarantine ဝင်ခိုင်းမှာပါ။ တချို့ က နေရာမှန်ကို မပြောကြတာ အခက်ခဲရှိနေတယ် ”ဟု ဦးသန်းလွင်က ထပ်လောင်းပြောသည်။
သျှမ်းပြည်နယ်အတွင်းရှိ မြို့နယ်များတွင် ကျန်းမာရေးထောက်ခံစာ ပါဝင်မှ မြို့ထဲသို့ ပေးဝင်သွားမည်ဟု သက်ဆိုင်ရာက ထုတ်ပြန်ထားကြောင်းသိရသည်။
လွိုင်လင်မြိုနယ်တွင် Quarantine ဝင်ထားသူ ၄၃ ဦးရှိကြောင်း၊ လက်ရှိ မှာ နည်းပညာ ပင်လုံတက္ကသိုလ်တွင် ၂၇ ဦးနှင့် ပင်လုံကွန်ပျူတာ ၁၆ ဦးတိုံရှိကြောင်းသိရသည်။
မြန်မာနိုင်ငံတဝှမ်း ယနေ့ မနက် (၈) နာရီ အချိန်ထိ ကိုဗစ်- ၁၉ ပိုးတွေ့လူနာ (၁၄၆၄) ဦးရှိပြီး သျှမ်းပြည် အတွင်း ဆေးကုသနေသူ (၆)ဦးရှိကြောင်း သိရသည်။
မြန်မာနိုင်ငံတွင် ကိုဗစ် ၁၉ ကြောင့် သေဆုံးသူ (၈) ဦးရှိကြောင်း ကျန်းမာရေး နှင့် အားကစားဝန်ကြီးဌာန ထုတ်ပြန်ချက် အရသိရသည်။
( အလုပ်သင် သတင်းထောက် စိုင်းဆိုင်လှိုင်း ရေးသားသည်။)
