သျှမ်းပြည်အရှေ့ပိုင်း ကျိုင်းတုံခရိုင် မိုင်းယန်းမြို့နယ် ဆီလူးဒေသတွင် ကိုဗစ်-၁၉ အတည်ပြုလူနာ (၃) ဦး နှင့် ထိတွေ့သူ စုစုပေါင်း (၁၃၈) ကျော် ရှိကြောင်း စုံစမ်းသိရှိရသည်။
စက်တင်ဘာ (၅) ရက်က အားကစား နှင့် ကျန်းမာရေး ဝန်ကြီးဌာန ထုတ်ပြန်ချက်အရ မိုင်းယန်းမြို့နယ် ဆီလူးဒေသတွင် ရခိုင်ပြည်မှ လာသည့် ရွှေ့ပြောင်းအလုပ်သမား (၃) ဦးထံ ကိုဗစ်-၁၉ ပိုးတွေ့ရှိကြောင်း စုံစမ်းသိရှိရသည်။
“လက်ရှိ မနေ့ည ၈ နာရီခွဲလောက်ထိ ကျနော်တို့ လိုက်ထားသမျှက (၁၃၈) ယောက်ရှိထားပါတယ်။ အဓိကကတော့ ကျိုင်းတုံ ၊ လေယာဉ် အတူစီးတဲ့သူရယ်၊ စိုက်ခင်းထဲမှာ အလုပ် တူတူ လုပ်တဲ့သူတွေရယ်” ဟု သျှမ်းပြည်အရှေ့ပိုင်း လက်ထောက်ညွှန်ကြားရေးမှူး ဒေါက်တာ ဘစိုးသက် က သျှမ်းသံတော်ဆင့် ကိုပြောသည်။
လက်ရှိ အချိန်ထိ ထိတွေ့သူ (၁၃၈) ဦးမှ (၇၉ ) ဦး၏ ဓါတ်ခွဲနမူနာ ကို ရန်ကုန်အမျိုးသား ကျန်းမာရေး ဓါတ်ခွဲဌာန သို့ပို့ဆောင် စစ်ဆေးထားကြောင်း သိရသည်။
“အားလုံးကို Quarantine လုပ်ထားပြီးပါပြီ။ ကျန်တဲ့ ကျိုင်းတုံက ထိတွေ့တဲ့ဟာတွေကျတော့ ဒီနေ့ ဒါမှမဟုတ် နက်ဖန်လောက်မှ ဓာတ်ခွဲနမူနာ ယူမယ်” ဟု ဒေါက်တာ ဘစိုးသက် ကပြောသည်။
အဆိုပါ ကိုဗစ်-၁၉ တွေ့ရှိသူ လူနာ (၃) ဦးသည် လွန်ခဲ့သည့် သြဂုတ် ၅ ရက်နေ့တွင် ရခိုင်ပြည်မှ ရန်ကုန်သို့ ရောက်ရှိလာပြီး ထိုမှ တဆင့် ကျိုင်းတုံ ကိုလည်း လေကြောင်းလိုင်းဖြင့် လာသူများဖြစ်ကြောင်း၊ ထိုသူများသည် ဆီလူးဒေသ သြဂုတ် ၉ ရက်နေ့တွင် ရောက်ရှိပြီး ငှက်ပျောခြံတွင် အလုပ်လုပ်ကိုင်နေ သူများဖြစ်ကြောင်း ဒေါက်တာ ဘစိုးသက် ကပြောသည်။
“ကျိုင်းတုံမှာ အရင်ကလည်း ဖြစ်ဖူးသွားပြီ။ ဒါကြောင့် ကျနော်တို့လည်း အပြင်သွားတိုင်း Mask တွေတပ်တယ်။ လက်တွေ ဆေးတယ်။ ကျန်းမာရေး ဝန်ကြီးဌာနက ထုတ်ပြန်တဲ့ စည်းကမ်းအတိုင်း လိုက်နာတယ်။ ကြောက်ပေမယ့် အရင်ဖြစ်တုန်းကလို သိပ်မစိုးရိမ်တော့ဘူး။ ကာကွယ်တဲ့ နည်းလမ်းလည်း သိပြီဆိုတော့” ကျိုင်းတုံ ဒေသခံ စိုင်းဆိုင်တွံ ကပြောသည်။
လက်ရှိ အချိန်ထိ သျှမ်းပြည် အရှေ့ပိုင်း အတွင်း သွားလာလှုပ်ရှားမှုသည် ယခင်အတိုင်းပင်ဖြစ်နေသေးကြောင်း၊ သို့သော် လူတိုင်းနီးပါး Mask (နှာခေါင်းစည်း)များ တပ်လာကြကြောင်း သျှမ်း/ အရှေ့ ပြည်သူများ ကပြောသည်။
“ အခုတော့ ပညာပေးမှုတွေလုပ်နေရတယ်။ Mask တော့ တပ်ကြတယ်။ ရခိုင်ကနေ ဒါမှ မဟုတ် ရန်ကုန်ကနေ လာရင်တော့ Quarantine ဝင်ဖို့ ပြောထားပါတယ်” ဟု မိုင်းယန်း မြို့နယ် မှ အစိုးရ ဝန်ထမ်း တဦး ကပြောသည်။
သျှမ်းပြည် အရှေ့ပိုင်းသို့ ရခိုင်ပြည် သို့မဟုတ် ကိုဗစ်-၁၉ ကူးစက်မှုနှုန်းများပြီး Stay at Home နေရာ မှ လာသည့်သူများ Quaratine ဝင်ရမည် ဖြစ်ကြောင်း လည်း ၎င်း အစိုးရ ဝန်ထမ်းက ပြောသည်။
သျှမ်းပြည် တွင် ယနေ့ အချိန်ထိ ကိုဗစ်-၁၉ အတည်ပြု လူနာ (၆) ဦးရှိရာ သျှမ်းပြည်တောင်ပိုင်း တောင်ကြီး စဝ်စံထွန်းဆေးရုံတွင် (၁)ဦး၊ ကလောမြို့ တွင် ရခိုင်မှပြန်လာသည့် တပ်မတော်သား (၂)ဦးနှင့် ကျိုင်းတုံဆေးရုံတွင် ရခိုင်မှ လာသည့် ရွှေ့ပြောင်းအလုပ်သမား (၃) ဦးတို့ ဆေးကုသမှု ခံယူနေကြောင်း သိရသည်။
မြန်မာနိုင်ငံတဝှမ်း ကိုဗစ်-၁၉ အတည်ပြု ၁၄၆၄ ဦး ရှိပြီး သေဆုံးသူ ၈ ဦး နှင့် ရောဂါကင်းစင်သူ ၃၈၅ ဦး ရှိကြောင်း ကျန်းမာရေးနှင့် အားကစား ဝန်ကြီးဌာန ကထုတ်ပြန်ချက် အရသိရသည်။
