ယခုရက်ပိုင်း ကိုဗစ်-၁၉ မြင့်တက်မှုလာပြီး နေပြည်တော် အဝင် စည်းကမ်း တည်းကြပ်လာသဖြင့် တောင်ကြီး- နေပြည်တော် ပြေးဆွဲသည့် ကားများ ယာယီပိတ်မည် ဟု စုံစမ်းသိရသည်။
နေပြည်တော်သို့ လာရောက်သူများသည် ခရီးသည် နေရပ်လိပ်စာ၊ မြို့နယ်၊ရပ်ကွက်၊ ကျေးရွာ ထောက်ခံစာ ယူဆောင်လာရမည်ဖြစ်ပြီး၊ တခြားဒေသများမှ လာသည့် သူများသည် Quarantine နေထိုင်ရမည် ဖြစ်ကြောင်း စက်တင်ဘာ (၁)ရက်နေ့တွင် သက်ဆိုင်ရာက အသိပေး ကြေညာခဲ့ကြောင်း သိရသည်။
ထို့ကြောင့် နေပြည်တော်သွားမည် သူများအတွက် အခက်အခဲများစွာ ရှိသဖြင့် လိုင်းကားကို ယာယီ ရပ်နားလိုက်ခြင်းဖြစ်ကြောင်း တောင်ကြီး- နေပြည်တော် ပြေးဆွဲနေသည့် ကားသမားများ က ပြောသည်။
“ကျမဂိတ် နေပြည်တော် ကိုမသွားတော့ဘူး။ နေပြည်တော်သွားမဲ့ ကားကိုပိတ်ထားတယ်။ သူတို့ကလည်း ပိတ်ထားတယ်” ဟု တောင်ကြီး- နေပြည်တော် ပြေးဆွဲနေသည့် ဒိုညီနောင်ကားဂိတ်မှ တာဝန်ကျ ဝန်ထမ်းတစ်ဦး က သျှမ်းသံတော်ဆင့်ကို ပြောသည်။
တချို့ ယာဉ်လိုင်းများသည် ယာယီ ရပ်နားထားပြီး၊ တချို့ယာဉ်လိုင်းများမှ နေပြည်တော်သို့သွားမည့် ခရီးသည် များကို မိတ္ထီလာအနီးတွင်သာ ပို့ဆောင်ခဲ့ပြီး ဆိုင်ကယ်ကယ်ရီ ဖြင့် နေပြည်တော် သို့ ဝင်နိုင်ရန် ချိတ်ဆက်ပေးကြောင်း သိရသည်။
“ Quarantine ကလည်း ၁၄ရက်ဝင်ရမယ်။ ကားသမားတွေက စဝင်ရမယ်။ နောက် ဓာတ်ခွဲခန်း အဖြေစစ်ဖို့ကလည်းလုပ်ရမယ်ဆိုတော့ မသွားတော့ဘူး။ ဒီချိန်က ဘယ်ခရီးမှ မသွားတာ အကောင်းဆုံးပဲ” ဟု တောင်ကြီး ဒေသခံ စိုင်းအာကာ က ပြောသည်။
လက်ရှိမှာ သျှမ်းပြည် လားရှိုးမှ နေပြည်တော်သို့ ပြေးဆွဲသည့် လိုင်းကားများလည်း အဆိုပါ စည်းကမ်း တင်းကြပ်မှုကြောင့် ယာယီရပ်နား ရကြောင်း သိရသည်။
“ လိုင်းကားတွေ မပြေးဆွဲရဘူး လို့ မထုတ်ပြန်ထားဘူး။ သွားရင်တော့ Quarantine နေရမယ် ဆိုလို့ ကိုယ့် သဘောနဲ့ကိုယ်ရပ်နားလိုက်တာပါ” ဟု လားရှိုး ကားသမား တဦး ကပြောသည်။
လက်ရှိမှာ မြန်မာတဝှမ်း တွင် ကိုဗစ်-၁၉ ကူးစက်မှုနှုန်းများလာပြီး နေပြည်တော် တွင်လည်း ကိုဗစ်-၁၉ ကူးစက်ခံရသူဦးရေ တိုးလာသဖြင့် ကြိုတင် ကာကွယ်သည့်အနေဖြင့် စည်းကမ်း တင်းကြပ်လိုက်ခြင်းဖြစ်ကြောင်း သိရသည်။
“ကျနော်တို့ နေပြည်ထဲကို ဘာကြောင်းနဲမှ ဝင်လာလို့မရတော့ဘူး။ ဝင်လာရင်လည်း ၁ ပတ်လောက် Quarantine ဝင်ပြီး မှ လာလို့ရမှာပါ။ အခု ကျနော်တို့ ကားငှားဝန်ဆောင်မှုတွေလည်း နားထားရတယ်” ဟု နေပြည်တော် ကားငှားဝန်ဆောင်မှု လုပ်ဆောင်နေသူ ဦးကျော်လှ က သျှမ်းသံတော်ဆင့် ကို ပြောသည်။
မြန်မာနိုင်ငံတွင် ကိုဗစ်-၁၉ ကူးစက်ခံရသူ (၁၂၁၆) ဦး ရှိပြီ ဖြစ်ပြီး သေဆုံးသူ ၇ ဦး ရှိကြောင်း သိရသည်။
( အလုပ်သင် သတင်းထောက် စိုင်းဆိုင်လှိုင်း ရေးသားသည်။)
