သျှမ်းပြည် အရှေ့ပိုင်း ကျိုင်းတုံခရိုင် မိုင်းယန်းမြို့နယ် ဆီလူးဒေသတွင် ရခိုင်ပြည်မှ လာသည့် ရွှေ့ပြောင်းအလုပ်သမား (၃)ဦးထံ ကိုဗစ်-၁၉ ပိုးတွေ့ရှိကြောင်း စုံစမ်းသိရသည်။
အဆိုပါ ကိုဗစ်-၁၉ တွေ့ရှိ လူနာ (၃) ဦးသည် လွန်ခဲ့သည့် သြဂုတ် ၅ရက်နေ့တွင် ရခိုင်ပြည်မှ ရန်ကုန်သို့ ရောက်ရှိလာပြီး ထိုမှ တဆင့် ကျိုင်းတုံ ကိုလည်း လေကြောင်းလိုင်းဖြင့် လာသည် များဖြစ်ကြောင်း၊ ထိုသူများသည် ဆီလူးဒေသ သြဂုတ် ၉ ရက်နေ့တွင်ရောက်ရှိပြီး ငှက်ပျောခြံတွင် အလုပ်လုပ်ကိုင်နေသည့် သူများဖြစ်ကြောင်း သျှမ်းပြည် အရှေ့ပိုင်း ပြည်သူ့ ကျန်းမာရေး ဦးစီးဌာန မှလက်ထောက် ညွှန်ကြားရေးမှူး ဒေါက်တာ ဘစိုးသက် က သျှမ်းသံတော်ဆင့် ကို ပြောသည်။
“ ရခိုင်ကနေ လာတာက ၆ယောက်ပါ။ သူတို့ကို ရခိုင်ကလာတဲ့သူမလို့ စစ်ဆေးလိုက်တာပါ။ အဲ့ထဲက ၃ဦးက ပိုးတွေ့ပါတယ်။ ပိုးတွေ့တဲ့သူတွေက တော့ ရသေ့တောင်၊ ပုဏ္ဏကျွန်း ၊ မြောက်ဦး ကပါ” ဟု ဒေါက်တာ ဘစိုးသက် ကဆိုသည်။
ကိုဗစ်-၁၉ ပိုးတွေ့ လူနာ (၃)ဦးကို မိုင်းယန်းမြို့နယ် ဆီလူးဒေသတွင် Quarantine ထားရှိကြောင်း၊ ယနေ့ ကျိုင်းတုံးပြည်သူ့ဆေးရုံသို့ ပို့ဆောင်မည် ဖြစ်ကြောင်းလည်း ဒေါက်တာ ဘစိုးသက် က ပြောပြသည်။
“ သူတို့ ၃ယောက်က ဘာလက္ခဏာမှ မပြဘူး။ သူတို့ကို တော့ ဒီနေ့ ကျိုင်းတုံဆေးရုံ ကို ရွှေ့ပါမယ်” ဟု ဒေါက်တာ ဘစိုးသက် က ထပ်လောင်းပြောသည်။
ဆီလူးဒေသတွင် ကိုဗစ်-၁၉ လူနာ(၃) နှင့် အတူ ငှက်ပျောခြံတွင် အလုပ်လုပ်ကိုင်သူ အယောက် (၆၀) ပြီး ၊ ထိုသူများကိုလည်း လက်ရှိမှာ Quarantine ထားထားပြီး၊ ကိုဗစ်-၁၉ ပိုးရှိ၊ မရှိ ဓာတ်ခွဲခန်း နမူနာ ယူကာ စစ်ဆေးသွားမည် ဟု ဒေါက်တာ ဘစိုးသက် က ပြောသည်။
ထိုသူများလိုက်ပါ စီးနင်းသည့် လေကြောင်းလိုင်းသည် အဲသံလွင် လေကြောင်းလိုင်းဖြစ်ပြီး၊ လက်ရှိ မှာ ထိုသူ(၃) ၏ သတင်းအချက်အလက် သွားလာခဲ့သည့်နေရာများကို မေးမြန်းနေဆဲ ဟု သိရသည်။
မြန်မာနိုင်ငံတွင် ယနေ့ (စက်တင်ဘာ ၅)ရက် မနက် (၈)နာရီ တွင် ကိုဗစ်-၁၉ အတည်ပြုလူနာ ၃၈ဦး တိုးလာပြီး ထိုထဲတွင်လည်း သျှမ်းပြည် တောင်ပိုင်း ကလောမြို့ဒေသခံ တဦး ပါဝင်ကြောင်း သိရသည်။
လက်ရှိ အချိန်ထိ မြန်မာနိုင်ငံတွင် ကိုဗစ်-၁၉ အတည်ပြုလူနာ (၁၁၇၁) ဦးရှိပြီး သေဆုံးသူ (၇)ဦးရှိကြောင်း ကျန်းမာရေး နှင့် အားကစားဝန်ကြီးဌာန ထုတ်ပြန်ချက် အရသိရသည်။
