ယခုရက်ပိုင်း မြန်မာနိုင်ငံတွင် ကိုဗစ်-၁၉ ကူးစက်မှုနှုန်းမြင့်တက်မှုကြောင့် သျှမ်းပြည် တောင်ပိုင်း တောင်ကြီး – ဟိုပုံး ပြည်ထောင်စု လမ်းမကြီး ကျန်းမာရေး စစ်ဆေးရေး ဂိတ်ကို အမြန်ဆုံး ပြန်လည်ဖွင့်လှစ်နိုင်ရန် စီစဉ်နေကြောင်း စုံစမ်းသိရှိရသည်။
အဆိုပါ ကျန်းမာရေး စစ်ဆေးရေးဂိတ်ပြန်ဖွင့်နိုင်ရန်အတွက် သက်ဆိုင်ရာ တာဝန်ရှိသူများက ဆွေးနွေးကြကြောင်း စစ်ဆေးရေးဂိတ်မှ စေတနာ့ဝန်ထမ်း ဦးခိုင်မြင့်ထွန်း ကပြောသည်။
“အသေးစိတ်တော့ မသိရသေးဘူး။ အစောဆုံး ပြန်ဖွင့်နိုင်ဖို့ စီစဉ်နေတယ်။အမြန်ဆုံး အကောင်အထည်ဖော်သွားမယ်လို့တော့ သိရပါတယ်။ ကျနော်တို့ စေတနာ့ ဝန်ထမ်းတွေ အနေနဲ့ကတော့ ခရီးသွားရာဇဝင်တွေကောက်မယ်။” စေတနာ့ ဝန်ထမ်း ဦးခိုင်မြင့်ထွန်း ကပြောသည်။
တောင်ကြီးမြို့နယ် အုပ်ချုပ်ရေးမှူး ဦးဖြိုးမင်းထိုက် က လည်း “လောလောဆယ်တော့ မဖွင့်သေးဘူး။ အခြေနေအရ ဖွင့်ဖို့ လိုအပ်တဲ့ချိန်မှာ ဖွင့်ဖို့ပဲ အဆင်သင့်ပြင်ထားတာပဲ ရှိတယ်။” ဟုပြောသည်။
ကိုဗစ်-၁၉ သည် ပြည်တွင်း ကူးစက်မှု ပိုမိုများပြားလာပြီး ရန်ကုန်တိုင်းဒေသကြီး၊ ရခိုင်ပြည်နယ် တို့မှာ ပြည်တွင်း ကူးစက်မှု အများဆုံး ဖြစ်ကြောင်း ကျန်းမာရေး ဝန်ကြီးဌာနက ထုတ်ပြန်သည်။
“အဓိက ကတော့ ရခိုင် ရန်ကုန် မန္တလေး အဲ့ဘက်ကလာရင် ကျနော်တို့ Quarantine ထားဖို့တော့ ရှိပါတယ်။ ဒါကတော့ အကြမ်းဖျင်းပေါ့နော်။ တိတိကျကျတော့ မဆုံးဖြတ်ရသေးဘူး။” ဟု ဦးခိုင်မြင့်ထွန်း က ထပ်လောင်းပြောသည်။
မြန်မာနိုင်ငံတွင် ကိုဗစ်-၁၉ ကပ်ရောဂါကြောင့် သေဆုံးသူ (၇) ဦးထိ ရှိလာပြီး၊ ယနေ့ မနက်ထိ ကိုဗစ်-၁၉ အတည်ပြု လူနာ (၁၁၃၃) ဦးထိ မြင့်တက်လာကြောင်း သိရသည်။
Leave a Comments