သျှမ်းပြည်တွင် ကိုဗစ်-၁၉ ကာကွယ်ထိန်းချုပ်ရေး အတွက် ညမထွက်ရ အမိန့်ကို ချိုးဖောက်သူများ ဖမ်းဆီးအရေးယူနေကြောင်း စုံစမ်းသိရသည်။
လက်ရှိ ထို ညမထွက်ရ အမိန့် ဥပဒေကို ချိုးဖောက်သူ(၈၀)ကျော်သည် သျှမ်းပြည် မြောက်ပိုင်း မူဆယ်မြို့၊ သျှမ်းပြည် အရှေ့ပိုင်း တာချီလိတ်မြို့ နှင့် သျှမ်းပြည် တောင်ပိုင်း တာင်ကြီးမြို့ တို့မှ ဖြစ်ကြောင်းသိရသည်။
ကိုဗစ် -၁၉ ကာကွယ် ထိန်းချုပ်ရန်အတွက် ဒေသန္တရ ည မထွက်ရ အမိန့်ကို ည ၁၂နာရီမှ မနက် ၄ နာရီ အထိ ကန့်သတ်ထားပြီး၊ ထို အမိန့်ကို ချိုးဖောက်ပါက ဖမ်းဆီးအရေးယူသွားမည် ဟု သက်ဆိုင်ရာ က မေလလယ်ပိုင်းမှ စတင် ထုတ်ပြန်ကြေညာထားပြီးဖြစ်ကြောင်းသိရသည်။
ထို့ကြောင့် စက်တင်ဘာ ၂ရက်မှ စတင်ကာ သျှမ်းပြည် မြောက်ပိုင်း မူဆယ်တွင် စတင်ဖမ်းဆီး အရေးယူခဲ့ကြောင်း ဂရုဏာ လူမှု ကူညီရေး အသင်း မှ ဦးသောင်းထွန်း က သျှမ်းသံတော်ဆင့် ကိုပြောသည်။
“ ကျနော်တို့ မနေ့က ဖမ်းဆီးမိရသူတွေထဲမှာတော့ မူယစ်ဆေးဝါးသုံးစွဲ ထားသူလည်းပါတယ်။ ကား၊ဆိုင်ကယ်တွေကောအများကြီး ပါတယ်။ ကျနော်တို့ ကဖမ်းဆီးရပြီး ရဲစခန်းမှူးကိုဘဲ အပ်လိုက်တာပါ” ဟု ဦးသောင်းထွန်းက ပြောသည်။
အဆိုပါဖမ်းဆီးခံရသူ တချို့တွင် ကျန်းမာရေး အထောက်အထားများ ပါရှိသဖြင့် ခွင့်ပြုပေးခဲ့ပြီး၊ ကျန်းမာရေး အထောက်အထားမရှိသူများကို ဖမ်းဆီး ပြီး အရေးယူခဲ့ကြောင်း ဦးသောင်းထွန်း က ပြောသည်။
“ဖမ်းဆီးခံရသူ ၃၀ ကျော်လောက်ရှိတယ်။ အသက်မပြည့်သူတွေလည်းပါတယ်” ဟု ဦးသောင်းထွန်း ကဆိုသည်။
ထိုဖမ်းဆီးခံရသည့် အယောက် (၃၀) ထဲမှ ၁၅ဦးကို ရဲစခန်းမှူး လက်ထဲ အပြီး ညမထွက်ရ ဥပဒေဖြင့် အရေးယူသွားမည်ဖြစ်ကြောင်း၊ ထောင်ဒဏ် တလ ချသွားမည် ဖြစ်ကြောင်း ဦးသောင်းထွန်း က ထပ်လောင်းပြောသည်။
“ဖမ်းဆီးရမိသူကိုတော့ လာရှိုးအကျဉ်းထောင်ကို ပို့ဖို့စီစဉ်နေတယ်။ ဘယ်နယောက် အမိန့်ချလဲတော့မသိသေးဘူး။ အဖြေကိုတော့ ညမှသိရမှာပါ” ဟု ဦးသောင်းထွန်း က ဖြည့်စွက်ပြောသည်။
ထိုနည်းတူ သျှမ်းပြည် အရှေ့ပိုင်း တာချီလိတ်တွင်လည်း ညမထွက်ရ အမိန့်ချိုးဖောက်သူ (၂၂) ဦး ကို ဖမ်းဆီးရမိကြောင်း တာချီလိတ်မြို့နယ် အုပ်ချုပ်ရေးမှူး ဦးချမ်းမြေ့စော က သျှမ်းသံတော်ဆင့်ကို ပြောသည်။
“တာချီလိတ်မှာတော့ (၂၂)ဦး ဖမ်းဆီးရတယ်။ တရားရုံးမှာ ပုဒ်မ(၁၈၈) နဲ့ အမှုဖွင့်ထားလိုက်ပြီ။ မနေ့ညက KTV ဆိုင် (၂) ဆိုင်ကိုလည်း ဖမ်းဆီးရမိတယ်” ဟု ဦးချမ်းမြေ့စော က ပြောသည်။
ဆက်လက်ပြီး သျှမ်းပြည် တောင်ပိုင်း တောင်ကြီးမြို့တွင်လည်း ညမထွက်ရ ဥပဒေ အမိန့်ကို ချိုးဖောက်သူ ၃၀ ကျော်ရှိကြောင်း တောင်ကြီးမြို့နယ် အုပ်ချုပ်ရေးမှု ဦးဖြိုးမင်းထိုက်က သျှမ်းသံတော်ဆင့်ကို ပြောသည်။
“ကျနော်တို့ မနေ့ညကတော့ ၃ ဦးထပ်မံဖမ်းဆီးရမိတယ်။ တောင်ကြီးမြို့ပေါ်မှာ စုစုပေါင်း ၃၀ ကျော် ဖမ်းဆီးရမိပြီ ” ဟုဦးဖြိုးမင်းထိုက်က ပြောသည်။
ထို ဖမ်းဆီးရမည့်သူများအားလုံးကို ဥပဒေနှင့်အညီ ထပ်မံဆောင်ရွက်သွားမည်ဖြစ်ကြောင်း ဦးဖြိုးမင်းထိုက် က ဆိုသည်။
ယခုရက်ပိုင်း မြန်မာနိုင်ငံတွင် ကိုဗစ်-၁၉ ကူးစက်မှုမြင့် လာသဖြင့် တားဆီး ကာကွယ်ရန်အတွက် သျှမ်းပြည်နယ်တွင် ယခင်ကထက် စည်းကမ်း ပိုမိုတင်းကြပ်လာကြောင်းသိရ သည်။
ကနေ့ မြန်မာနိုင်ငံတွင် ကိုဗစ် -၁၉ ကူးစက်သူ မှာ စုစုပေါင်း (၁၁၃၃) ဦးရှိပြီး ပြန်လည်သက်သာလာသူ (၃၅၉) ရှိပါသည်။
သို့သော် ကူးစက်လူနာများအနက် ယမန်နေ့ စက်တင်ဘာ ၃ ရက် ည ၁၀ နာရီခွဲ အချိန်က ကိုဗစ်-၁၉ လူနာတစ်ဦး ထပ်မံသေဆုံးခဲ့ကြောင်း သိရသည်။ ထို့ကြောင့် မြန်မာနိုင်ငံတွင် ကိုဗစ်-၁၉ လူနာ သေဆုံးသူ (၇) ဦး ရှိ ဖြစ်ကြောင်း ကျန်းမာရေးထုတ်ပြန်ချက် အရ သိရသည်။
(အလုပ်သင် သတင်းထောက် စိုင်းဆိုင်လှိုင်း ရေးသားသည်။)
Leave a Comments