စိုင်းဆိုင်လှိုင်း
မြန်မာနိုင်ငံတွင် ကိုဗစ် -၁၉ ကူးစက်ခံရသူ မြင့်တက်လာသဖြင့် သျှမ်းပြည်တဝှမ်း သွားလာမှု ယခင်ကထက် စည်းကမ်း တင်ကြပ်လာသည် ဟု စုံစမ်းသိရသည်။
မြန်မာနိုင်ငံတွင် ယနေ့ထိ ကိုဗစ်ကူးစက်ခံရသူ (၁၀၅၈) ဦးရှိလာပြီးဖြစ်သဖြင့် သျှမ်းပြည် တဝှမ်းတွင် ကိုဗစ်-၁၉ ကူးစက်မှု ရှိလာမည်ကို စိုးရိမ်သည့်အတွက် ကာကွယ်သည့်အနေဖြင့် Mask (နှာခေါင်းစည်း) မတပ်ပါက ရပ်ကွက်အတွင်းသို့ ပေးမဝင်ကြောင်း မူဆယ် တောင်ရပ်ကွက် ဒေသခံ စိုင်းမြတ်အောင် က သျှမ်းသံတော်ဆင့် ကို ပြောသည်။
“ကိုဗစ် -၁၉ ကူးစက်မှု မြင့်တက်လာတဲ့အတွက် ကျနော်တို့မူဆယ်မြို့မှာရှိတဲ့ ရပ်ကွက် အားလုံးကို ဌာနဆိုင်ရာက အစည်းဝေး ခေါ်တယ်။ Mask မတပ်ထားရင် ရပ်ကွက်ထဲ ပေးမဝင်တော့ဘူး။ Mask မတပ်ဘဲ လာခဲ့ရင် ကျနော်တို့က Maskကို ပြန်သွားဝယ်ခိုင်း ပြီးမှ ရပ်ကွက်ထဲပေးဝင်သွားမှာပါ” ဟု စိုင်းမြတ်အောင်က သျှမ်းသံတော်ဆင့်ကို ပြောသည်။
ထိုသို့ပြုလုပ်ခြင်းသည် လက်ရှိမှာ တောင်ရပ်ကွက် တခုတည်းသာ စတင်ပြုလုပ်နေကြောင်း စိုင်းမြတ်အောင် က ပြောသည်။
“ ကျနော်တို့ သြဂုတ် လကုန် ကတည်း စလုပ်ခဲ့တာ။ ကျနော်တို့ရပ်ကွက်ပဲလုပ်သေးတယ်။ ကျန်တဲ့ရပ်ကွက်က တော့ လုပ်တာမတွေ့ရသေးဘူး” ဟု စိုင်းမြတ်အောင် ကပြောသည်။
အလားတူ ကာလိမြို့တွင်လည်း ကိုဗစ်-၁၉ ကာကွယ် ထိန်းချုပ်ရေး အတွက် ဌာနဆိုင်ရာများမှာ အစည်းဝေး ပြုလုပ်ခဲ့ သော်လည်း လက်ရှိ အချိန်ထိ ပြည်သူများက လိုက်နာခြင်မရှိသေးကြောင်း ကာလိမြို့ နမ့်ခုံးရှမ်းပရဟိတ အသင်းမှ စိုင်းဆိုင်ခေး က သျှမ်းသံတော်ဆင့် ကို ပြောသည်။
“ကျနော်တို့ ဒီနေ့ တော့ မြို့မအလယ် မှာ Mask တွေနဲ့လက်သန့်ဆေးရည်တွေကို ဝေပေးနေပါတယ်။ စည်းကမ်းကိုလိုက်နာပေးဖို့ ကျနော်တို့ကလည်း မနက်တိုင်း လိုက်နှိုးဆော်ပေးတယ်” ဟု နမ့်ခုံး ရှမ်းပရဟိတ အသင်း စိုင်းဆိုင်ခေးက ပြောသည်။
ဆက်လက်ပြီး လွိုင်လင်၊ပင်လုံမြို့ တို့တွင်လည်း ကိုဗစ် -၁၉ ကာကွယ် ထိန်းချုပ်သည့် အနေဖြင့် ကျန်းမာရေး စစ်ဆေးဂိတ် များကိုဖွင့်ထားကြောင်းသိရသည်။
“ကျမတို့မြို့ထဲဖြတ်မဲ့ကား တွေအားလုံးကို စစ်ဆေးဂိတ် ကနေပြီး အဖျားတိုင်းပေးတယ်။ လက်ဆေးခိုင်းတယ်။ နယ်ဝေးကနေလာပြီး မြို့ထဲမှလာအိပ်မယ်ဆိုရင်လည်း မှတ်ပုံတင်၊ ဖုန်းနံပါတ်၊ နေရပ်လိပ်စာ၊နာမည် တွေကို အရင်ကောက် ပြီးမှ ဘဲ ပေးနေမှာပါ” ဟု လွိုင်လင်ဒေသခံ နန်းမွန်းခမ်းက ပြောသည်။
ကမ္ဘာတဝှမ်းတွင် ကိုဗစ်-၁၉ ကပ်ရောဂါကို ယမန်နှစ် ဒီဇင်ဘာ လမှ စတင်ကာ ဖြစ်ပွားခဲ့ပြီး မြန်မာနိုင်ငံတွင်မေလ တွင် ကိုဗစ်-၁၉ ကို စတင်တွေ့ရှိသည့်အချိန်တွင် မြန်မာပြည်သူများစိုးရိမ်မှု အနည်းငယ်သာရှိခဲ့ပြီး၊ လက်ရှိ ဒုတိယလှိုင်းဖြစ်သည့် ပြည်တွင်းကူးစက်မှုနှုန်းများလာသည့်အချိန်တွင် ပြည်သူများ စိုးရိမ်စိတ်မြင့်တက်လာကြောင်း သိရသည်။
သျှမ်းပြည်နယ်တွင် ကိုဗစ်ပိုးတွေလူနာ စုစုပေါင်း ၁၂ ဦးရှိကြောင်း၊ ကိုဗစ်-၁၉ နှင့် ထိတွေ့ဆက်စပ်သူ များစွာ ရှိကြောင်းသိရသည်။
ယခုရက်ပိုင်း ကိုဗစ်-၁၉ ကူးစက်ခံရသည့် သူ အများဆုံးသည် ရခိုင်ပြည်နယ် မှ ဖြစ်ကြောင်းသိရသည်။
