သျှမ်းပြည် တဝှမ်း တွင် ကိုဗစ် – ၁၉ သံသယ လူနာ (၈) ဦးရှိကြောင်း စုံစမ်းသိရှိရသည်။
အဆိုပါ (၈) ဦးသည် ရန်ကုန် မှ ပြန်လာသည့် လူနာများ နှင့် ရခိုင်မှ ပြန်လာသည့် လူနာများဖြစ်ကြောင်း သိရသည်။
သျှမ်းပြည်မြောက်ပိုင်း သီပေါမြို့မှ ရခိုင်ပြည်မှာ ပြန်လည်ရောက်လာပြီး နေမကောင်းဖြစ်သည့် အတွက် သီပေါဆေးရုံသို့ ဆေးကုသမှု ခံယူပြီး၊ ၎င်းတို့၏ ဓါတ်ခွဲနမူနာကို ပို့ဆောင် စစ်ဆေးသွားမည်ဖြစ်ကြောင်း သီပေါမြို့ နယ်ခြားမစည်း ပရဟိတ ကိုမျိုး ကပြောသည်။
“ရခိုင်မှာ ပြန်လာပြီး နေမကောင်းတာ ၂ ယောက်ရှိတယ်။ ကျနော်တို့ သွားရောက်ခေါ်ဆောင်ပြီး သူတို့ရဲ့ swab ကို ယူထားပါတယ်” ဟု ကိုမျိုး ကပြောသည်။
သျှမ်းပြည်အရှေ့ပိုင်း ကျိုင်းတုံတွင် သံသယ လူနာ (၃) ဦး နှင့် တာချီလိတ်တွင် (၃) ဦး ရှိကြောင်း သိရသည်။
“ကိုဗစ် သံသယလူနာ ၃ ဦးရှိထားပါတယ်။ ဖျားတယ်။ အနံ့မရဘူး။၂ ယောက်က ရန်ကုန်ကနေ ပြန်လာတယ်။ ၁ ယောက်တော့ ကားလိုင်းမောင်းတဲ့သူပါ။” သျှမ်းပြည်အရှေ့ပိုင်း လက်ထောက်ညွှန်ကြားရေးမှူး ဒေါက်တာဘစိုးသက် က သျှမ်းသံတော်ဆင့် ကိုပြောသည်။
ကျိုင်းတုံမြို့မ ဈေး နှင့် မြို့သစ်ဈေး ( အာခါဈေး) တို့သည် ကိုဗစ်-၁၉ သံသယ လူနာ ရှိသည့်အတွက် ဈေးများကို စက်တင်ဘာ (၂ မှ ၄) ရက်ထိ ပိတ်သွားမည်ဖြစ်ကြောင်း ကျိုင်းတုံ ဒေသခံ စိုင်းဆိုင်တွံ ကပြောသည်။
“ဟုတ်ပါတယ်။ ၃ ရက်ပိတ်မယ်လို့ ကြောညာထားပါတယ်။ ကိုဗစ် သံသယ လူနာရှိလို့တဲ့” ဟု ဒေသခံ စိုင်းဆိုင်တွံ ကပြောသည်။
ဈေးပြန်လည်ဖွင့်ရန်အတွက် ၎င်းတို့၏ ဓါတ်ခွဲအဖြေရမှာ ဆုံးဖြတ်သွားမည်ဖြစ်ကြောင်း သိရသည်။
“ဈေး ၃ ရက်ပိတ်ထားပါတယ်။ ဘာကြောင့် ပိတ်ရတာလဲ ဆိုတော့ သံသယ လူနာက လက္ခဏာ တော်တော် ဆင်တူ ကြတယ်။ ဓါတ်ခွဲအဖြေရမှ ဈေးဖွင့်ဖို့ မဖွင့်ဖို့ ဆုံးဖြတ်မယ်လို့ သိရပါတယ်” ဟု သျှမ်းပြည်အရှေ့ပိုင်း လက်ထောက်ညွှန်ကြားရေးမှူး ဒေါက်တာဘစိုးသက် က သျှမ်းသံတော်ဆင့် ကိုပြောသည်။
တာချီလိတ်မြို့တွင်လည်း ရခိုင်ပြည်မှ ပြန်လည် ဝင်ရောက်လာသူ (၃) ဦးရှိပြီး ၎င်းတို့၏ ဓါတ်ခွဲနမူနာ ယူထားပြီး ရန်ကုန်အမျိုးသား ကျန်းမာရေး ဓါတ်ခွဲဌာန သို့ ပို့ဆောင်စစ်ဆေးသွားမည်ဖြစ်ကြောင်း တာချီလိတ်မြို့နယ် အုပ်ချုပ်ရေးမှူး ဦးချမ်းမြေ့စော ကပြောသည်။
“လက်ရှိ မှာ ရခိုင်ပြန် (၃) ဦးရှိထားပါတယ်။ သူတို့ရဲ့ ဓါတ်ခွဲနမူနာ ပို့ထားပါတယ်။” ဟု ဦးချမ်းမြေ့စော ကပြောသည်။
သျှမ်းပြည်နယ်တွင်းရှိ တချို့ မြို့နယ် တွင်လည်း ကိုဗစ်-၁၉ ကာကွယ် ထိန်းချုပ်နိုင်ရန်အတွက် မြို့မဈေးရှိ ဆိုင်ခန်းများကို အလှည့်ကျ စနစ်ဖြင့် ဖွင့်လှစ်ခဲ့ကြောင်း သိရသည်။
မြန်မာနိုင်ငံတွင် ကိုဗစ်-၁၉ အတည်ပြု လူနာ တစ်ထောင် ဝန်းကျင် ရှိပြီဖြစ်ကြောင်း ကျန်းမာရေး ဝန်ကြီးဌာနက ထုတ်ပြန်ထားသည်။
စက်တင်ဘာ (၂) ရက် ထုတ်ပြန်ချက်အရ ကိုဗစ် အတည်ပြု လူနာ ( ၉၃၈) ဦး ၊ ပြန်လည် သက်သာလာသူ ( ၃၅၇) ဦး၊ လက်ရှိလူနာ (၅၇၅) ဦး နှင့် သေဆုံးသူ (၆) ဦး ရှိကြောင်း ကျန်းမာရေး ဝန်ကြီးဌာနက ထုတ်ပြန်ထားသည်။
အဆိုပါ အတည်ပြု လူနာ အများစုသည် ရခိုင်ပြည်နယ် နှင့် ရန်ကုန်တိုင်းဒေသကြီးတို့မှာ အများဆုံး တွေ့ရသည်။
သျှမ်းပြည်တောင်ပိုင်း တောင်ကြီး စဝ်စံထွန်း ဆေးရုံမှာ ကိုဗစ် -၁၉ အတည်ပြု လူနာ တစ်ဦး ရှိကြောင်းသိရသည်။
Leave a Comments