သျှမ်းပြည် တောင်ပိုင်း တောင်ကြီးမြို့ ကိုဗစ်-၁၉ လူနာ အမှတ် (၆၅၂) နှင့် ထိတွေ့ ဆက်စပ်သူ ၃၀ကျော် ရှိပြီး သက်ဆိုင်ရာ Quarantine တွင် ရှိထားကြောင်း စုံစမ်းသိရသည်။
https://www.facebook.com/photo?fbid=2698344010419787&set=a.1386663754921159
ကျန်းမာရေး နှင့် အားကစား ဝန်ကြီးဌာနက သြဂုတ် (၂၉ ) ရက်တွင် ထုတ်ပြန်ခဲ့သည့်တောင်ကြီး လူနာအမှတ် (၆၅၂) နှင့် ထိတွေ့ ဆက်စပ်သူ (၃၁) ဦးရှိပြီး ၊၎င်းတို့၏ ဓါတ်ခွဲနမူနာ ယူထားပြီး ရန်ကုန်အမျိုးသား ကျန်းမာရေး ဓါတ်ခွဲဌာနသို့ ပို့ဆောင် စစ်ဆေးသွားမည်ဖြစ်ကြောင်း သိရသည်။
“အခု စုံစမ်း ရသလောက် ၃၁ ဦး ရှိပါတယ်။ သက်ဆိုင်ရာ Quarantine ထားထားတယ်။ Swab က ယူပြီးပြီ မနက် ပို့ပြီး စစ်မယ်။ လူနာ အမှတ် (၆၅၂) လည်း ရဲ့ ကျန်းမာရေး အခြေနေကောင်းတယ်။ နဂိုကတည်းက လက္ခဏာ မရှိဘူး” ဟု ပြည်နယ် အထူးရောဂါ နှိမ်နင်းရေး လက်ထောက်ညွှန်ကြားရေးမှူး ဒေါက်တာဇဝနကို က သျှမ်းသံတော်ဆင့် ကိုပြောသည်။
ကျန်းမာရေး ဆိုင်ရာ လမ်းညွှန်ချက် မှ ထုတ်ပြန်ထားသည့်အတိုင်း mask ( နှားခေါင်းစည်း) တပ်ဆင်ခြင်း၊ လူစုလူဝေး ရှောင်ရှားခြင်း၊ လက်ကို မကြာခဏ ဆေးခြင်း၊ သြဂုတ် ၁၀ ရက် နောက်ပိုင်း ရခိုင်ပြည်မှ ပြန်လာသည့် ပြည်သူများ ရှိလျှင် Quarantine ဝင်ရန် လိုအပ်ကြောင်း သျှမ်းပြည်နယ် ကျန်းမာရေး ဌာနက ပြောသည်။
“ကိုယ့် ကျန်းမာရေးအတွက် ကိုယ်ပတ်ဝန်းကျင်တွေအတွက် maskတပ်ရင် အကောင်းဆုံးပေါ့နော်။ ဒါမယ့် လူတွေက ကိုယ့်ကိုယ်တပ်ဖို့ အားနည်းလာတယ်။ မေ့လျော့လာတဲ့အပေါ်မှာတော့ နဂို ရှိပြီးသား ဥပဒေတွေ အရေးယူ ဆောင်ရွက်မှုတွေ လုပ်သင့်ရင်တော့ လုပ်ရမှာပေါ့နော်။” ဟု ဒေါက်တာ ဇဝနကို ကပြောသည်။
သျှမ်းပြည်တောင်ပိုင်း တောင်ကြီးမြို့ရှိ ဒေသခံ ပြည်သူများ လူနာအမှတ် (၆၅၂) တွေ့ပြီးနောက်ပိုင်း mask တပ်ဆင်မှု ၈၀ ရာခိုင်နှုန်းကျော်ရှိ လာကြောင်း တောင်ကြီးမြို့နယ် အုပ်ချုပ်ရေးမှူး ဦးဖြိုးမင်းထိုက် က ပြောသည်။
“တောင်ကြီးဒေသခံတွေ ၈၀ ရာခိုင်နှုန်းလောက် Mask တွေ တပ်လာပြီ။ ပြီးတော့ ဒီရောဂါပိုးတွေ့ရှိတဲ့သူ ဆိုတဲ့သတင်းလေး ကြားသွားတော့ နည်းနည်း ပိုပြီးတော့ နှိုးနှိုးကြားကြား ဖြစ်သွားတဲ့သဘောမျိုး” ဟု ဦးဖြိုးမင်းထိုက် ကပြောသည်။
ကျန်းမာရေးဆိုင်ရာ လမ်းညွှန်ချက် နှင့် အညီ Mask တပ်ဆင်ရန်အတွက် ပညာပေးခြင်း လုပ်ဆောင်ပြီး လိုက်နာမှု မရှိလျှင် စီမံခန့်ခွဲရေးဆိုင်ရာ အနေဖြင့် သော်လည်း သက်ဆိုင်ရာ တည်ဆဲ ဥပဒေ နှင့် အညီ အရေးယူဆောင်ရွက်သွားမည်ဖြစ်ကြောင်း ဦးဖြိုးမင်းထိုက် က ထပ်လောင်းပြောသည်။
“လိုက်နာမှု မရှိရင် ပျက်ကွက်နေမယ်ဆိုရင် စီမံခန့်ခွဲရေးဆိုင်ရာ အနေနဲ့ကော သက်ဆိုင်ရာ တည်ဆဲ ဥပဒေ နဲ့ အညီ အရေးယူ ဆောင်ရွက်နိုင်ရေးကို သျှမ်းပြည်နယ် အစိုးရ အဖွဲ့ အစည်းအဝေးမှာ ထည့်သွင်းပြီးတော့ ဆောင်ရွက်သွားမှာ ဖြစ်ပါတယ်။” ဟု ဦးဖြိုးမင်းထိုက် ကပြောသည်။
သျှမ်းပြည်တောင်ပိုင်း တောင်ကြီးမြို့မှာ Quarantine ဝင်ထားသည့်သူ (၆၀) ဝန်းကျင်ခန့်ရှိထားကြောင်း သိရသည်။
မြန်မာနိုင်ငံတွင် ကိုဗစ် -၁၉ ကို နေ့စဉ် နှင့်အမျှ ထပ်တိုး လူနာ များလာပြီး ၎င်း အထဲတွင် ရခိုင်ပြည်နယ် နှင့် ရန်ကုန်တိုင်းဒေသကြီးတို့ ဖြစ်ပြီး သျှမ်းပြည်တောင်ပိုင်း တောင်ကြီးတွင် ကိုဗစ် -၁၉ အတည်ပြု လူနာ တစ်ဦးရှိထားကြောင်း သိရသည်။
မြန်မာနိုင်ငံတွင် ကိုဗစ် -၁၉ အတည်ပြု လူနာ (၇၈၇) ဦး၊ ပြန်လည် သက်သာလာသူ ( ၃၅၂) ဦး၊ လက်ရှိ လူနာ ( ၄၉၂) ဦး နှင့် သေဆုံးသူ (၆) ဦး ရှိကြောင်း ကျန်းမာရေး ဝန်ကြီးဌာနက ထုတ်ပြန်ထားသည်။
Leave a Comments