နယ်စပ်ကုန်စည်ဒိုင်များ တရုတ်အစိုးရဖိအားပေးမှု ကြုံတွေ့နေရ

မြန်မာ-တရုတ် နယ်စပ် ရှိ မြန်မာကုန်စည်ဒိုင်များကို တရုတ်အစိုးရက တင်းကြပ်သည့်ဥပဒေ ထုတ်ပြန်လိုက်ပြီးနောက် မူဆယ်မြို့ အတွင်း ကုန်စည်ဒိုင်နေရာ များ အမြန်ဖန်တီးပေးရန် လိုအပ်ကြောင်း ကုန်သည်များ အသိုင်းအဝိုင်းက တောင်းဆိုလိုက်သည်။

သြဂုတ် ၂၅ ရက်က တရုတ်နိုင်ငံ အစိုးရက – ယခုမှစ၍ တရုတ်နိုင်ငံ ကျယ်ဂေါင် အတွင်း ကုန်စည်ဒိုင် လာရောက်ဖွင့်လှစ်မည်ဆိုပါက တရုတ် နိုင်ငံသား ရှယ်ယာ (သို့မဟုတ်) တရုတ် မှတ်ပုံတင်မှသာ လိုင်စင်လျှောက်ခွင့်ပြုမည်ဖြစ်ကြောင်း၊ လိုင်စင်လျှောက်ထားရန်အတွက် တရုတ်ယွမ်ငွေ ၅ သိန်း (မြန်မာကျပ်ငွေသိန်း ၁၀၀ နီးပါး) ဂရန် (အာမခံ) ငွေပေးဆောင်ရမည် ဖြစ်ကြောင်း ထုတ်ပြန်လိုက်သည်ဟု ကုန်စည်ဒိုင် များက ပြောသည်။

တရုတ်နိုင်ငံ ကျယ်ဂေါင်တွင် ဖွင့်လှစ်ထားသည့် မြန်မာ ကုန်စည်ဒိုင် သမားများအနေဖြင့် တရုတ်နိုင်ငံက ထုတ်သည့် စည်းမျဉ်း ဥပဒေ ပြစ်ဒဏ်များကို လက်ခံနိုင်ကြောင်း သို့သော် တရုတ်နိုင်ငံသား နှင့် လိုင်စင်လျှောက်ပါက တရုတ်ယွမ် ၅ အာမခံအတွက်ပေးထားရမည့် ကိစ္စကို လက်မခံနိုင်ကြောင်း ချယ်ရီမြေ ကုန်စည်ဒိုင် မှ ကိုဇော်မင်း က သျှမ်းသံတော်ဆင့် ကို ပြောသည်။

ကိုဇော်မင်း က “ တဖက်က တရုတ်နိုင်ငံသား မှတ်ပုံတင် ယွမ် ၅ သိန်း စပေါ်ငွေ က မတရားလုပ်ခံရတာပေါ့။ဒီဟာတွေ ဖြေလျော့ဖို့အကောင်းဆုံးကတော့ ကိုယ့်နိုင်ငံဘက် ခြမ်းမှာပဲ ကုန်စည်ဒိုင်တွေ ကုန်ဂိတ်တွေကို အမြန်ဆုံးလုပ်ပေးရင် ဒီလို ပြဿနာတွေ ပေါ်ပေါက်လာမှာ မဟုတ်တော့ဘူး။ အခု က နေရာကို အမြန်ဆုံး စီစဉ်ပေးဖို့ပါ” ဟု ပြောဆိုလိုက်သည်။

ဆက်လက်ပြီး လုပ်ငန်းခွင် လိုင်စင် လျှောက်ရန် အတွက်လည်း ၁၀ရက်သာ အချိန်ပေးသည့်အပေါ် ဖြေလျော့ရန် နှင့် အလုပ်သမား (၅) ဦး ကိုကျန်းမာရေး ထောက်ခံချက်နှင့် အညီ ဝင်၊ထွက် ခွင့်ပေးရန် နှင့် ဂိတ်ပိုင်၊ ဂိတ်မှူးများကို ဝင်ခွင့်ပြုရန် ကုန်စည်ဒိုင်များက တောင်းဆိုထားကြောင်း ကိုဇော်မင်း က ထပ်လောင်းပြောသည်။

မြန်မာ-တရုတ်နယ်စပ် ကျယ်ဂေါင် ကို လွတ်လပ်သည့် ကုန်သွယ်ရေး ဇုံ (Free Trade Zone) ဟု သတ်မှတ်ထားသော်လည်း လက်ရှိ မှာ တရုတ်ပြည်ဘက်မှ စည်းကမ်း တင်းကြပ်သည့် အပေါ် မလိုလားကြောင်း လည်း ကုန်စည်ဒိုင် အသိုင်းအဝိုင်းက ပြောဆိုသည်။

“ ကျနော်တို့ အတွက် အကောင်းဆုံးက မူဆယ်ဘက် မှာ နေရာ ဖန်တီးပေးဖို့ပါပဲ။ ကုန်စည်ဒိုင် အမြန်လုပ်ပေးဖို့လည်း အစိုးရကို တောင်းဆိုချင်တယ်” ဟု ကုန်စည်ဒိုင် ဂိတ်မှူး တဦး က ပြောသည်။

မူဆယ်ဘက်ခြမ်းသို့ ကုန်စည်ဒိုင်များ ဖွင့်လှစ်နိုင်ပါက မူဆယ်ဒေသခံများအတွက် အဖက်ဖက်မှကောင်းမွန်သကဲ့သို့ ကုန်စည်ဒိုင်များ အလုပ်သမားများအတွက်လည်း အဆင်ပြေကြောင်း ၎င်း ဂိတ်မှူး က ဆိုသည်။

“ မြန်မာဘက် ကုန်စည်ဒိုင်တွေ ရွှေ့လာမယ်ဆိုရင် ဒေသခံတွေ အတွက် အများကြီး ကောင်းမယ်။ အလုပ်သမားတွေလည်း တရုတ်ပြည်ကို ဝင်၊ထွက်ရမခက်တော့ဘူး။ တရုတ်ဖမ်းဆီးမှုလည်း မခံရတော့ဘူး” ဟု ကိုဇော်မင်း က ပြောသည်။

တရုတ်ပြည်ကျယ်ဂေါင်-ရွှေလီ အတွင်းရှိ မြန်မာနိုင်ငံသားပိုင် ကုမ္ပဏီများ ၊ ကုန်စည်ပို့ဆောင်ရေး ဂိတ်များ၊ အမြန်ချောပို့ ဂိတ်များ နှင့်အခြားလုပ်ငန်းရှင်များ အားလုံးသည် တရုတ်ပြည်မှ ထုတ်ပေးထားသော လုပ်ငန်းလိုင်စင်များ မရှိပါက သြဂုတ် ၂၅ရက်မှ စက်တင်ဘာ ၃ရက် အတွင်း လုပ်ငန်းနှင့် ပတ်သက်သည့် အရာများအား အမြန်ဆုံး သိမ်းဆည်းပြီး တရုတ်ပြည်ကျယ်ဂေါင်-ရွှေလီမှ ထွက်ခွာပေးရမည် ဟု တရုတ်နိုင်ငံ အစိုးရ က ကြေညာချက်ထုတ်ထားသည်။

ထို့ပြင် တရုတ်ပြည်သူ့သမ္မတနိုင်ငံ မှသက်ဆိုင်သော ဥပဒေ စည်းမျဉ်းစည်းကမ်းများအရ မြန်မာနိုင်ငံ သားများသည် လုပ်ငန်းလိုင်စင် ရှိပါသော်လည်း လုပ်ငန်းဆက်လက်ဆောင်ရွက်ခြ င်းမပြုရဘဲ တရုတ်ပြည်အတွင်းရှိ တရုတ်နိုင်ငံသားများနှင့်ဖက်စပ် လုပ်ကိုင်သည့် မှက်ပုံတင်ပြီး မှ သာ လုပ်ငန်းဆက်လက် လည်ပတ်ဆောင်ရွက်ရမည် ဖြစ်ပါသည်။

တရုတ်အစိုးရ၏ ထုတ်ပြန်ချက်များကို ကျူးလွန်ပါက ဒဏ်ကြေးငွေ ယွမ် ၅၀၀၀ မှ ယွမ် ၁၀၀၀၀၀ အထိ ဆောင်ရမည့်အပြင် လုပ်ငန်းလိုင်စင်များပါ ဖျက်သိမ်းခြင်း၊ လုပ်ငန်းများ ချိတ်ပိတ် ကာ ဖမ်းဆီးခြင်းပါ ခံရမည်ဖြစ်ကြောင်း ပါရှိသည်ဟု သိရသည်။