ကိုဗစ်-၁၉ ကာလမှာ တရုတ်နိုင်ငံသို့ ကုန်တင်ယာဉ် တစ်ရက်လျှင် ကားအစီးရေ (၁၅၀) ဝန်းကျင် သာ ပို့ဆောင်နိုင်ကြောင်း သစ်သီးဝလံ ကုန်စည်ဒိုင် မှ စုံစမ်းသိရှိရသည်။
သျှမ်းပြည်မြောက်ပိုင်း မူဆယ်မြို့နယ်ရှိ မြန်မာ – တရုတ် နယ်စပ်မှာ မြန်မာနိုင်ငံဘက်မှ တရုတ်နိုင်ငံသို့ တင်ပို့ သည့်ကုန်တင်ယာဉ် တစ်ရက်လျှင် ကားအစီးရေ (၁၅၀) ခန့်သာ ရှိကြောင်း မူဆယ် ၁၀၅ မိုင် သစ်သီးဝလံ ကုန်စည်ဒိုင် ဒုဥက္ကဋ္ဌ ဦးခင်မောင် က သျှမ်းသံတော်ဆင့် ကိုပြောသည်။
“တစ်ရက်ကို ကား အစီး (၁၅၀) လောက်ပဲ ဝင်လို့ရတယ်။ တန်းစီ ထားတဲ့ ကားတွေက ၃၀၀ လောက်ရှိတယ်။ အကုန်ဝင်လို့ မရဘူး။ ” ဟု ဦးခင်မောင် ကပြောသည်။
မြန်မာနိုင်ငံမှ တရုတ်သို့ဝင်မည့် ကုန်ကားများသည် ယာဉ်မောင်း အစားထိုးမောင်းရသဖြင့် အခက်အခဲရှိပြီး အချိန်ကုန်ကြောင်း ၊ တရုတ်ပြည်သို့ဝင်ရန် အတွက် တစီးလျှင် တပတ်စောင့်ဆိုင်းရကြောင်း လည်း ဦးခင်မော်ငက ပြောသည်။
ကိုဗစ်-၁၉ မဖြစ်ခင် ကာလတွင် မြန်မာ မှ တရုတ်နိုင်ငံသို့ တစ်ရက်လျှင် ကုန်တင်ယာဉ်ပေါင်း (၆၀၀) ဝန်းကျင်ခန့်ရှိကြောင်း သိရသည်။
“ကိုဗစ် မဖြစ်ခင်ကတော့ ကုန်တင်ယာဉ်တွေ တစ်ရက် ၅၀၀ ၊ ၆၀၀ လောက် တရုတ်ဘက်ခြမ်း ဝင်လို့ရတယ်” ဟု ဦးခင်မောင် ကပြောသည်။
စက်တင်ဘာ (၁၅) ရက်မှ စပြီး တရုတ်နယ်စပ် ရွှေလီ ၊ ကျယ်ဂေါင် နှင့် ဝမ်တိန်မြို့တို့ကို တရုတ်ဘက်မှ lockdown ချခဲ့ပြီး စက်တင်ဘာ (၂၁) ရက်နေ့မှာ တရုတ်ဘက်မှ ပြန်လည်ဖွင့်ပေးခဲ့ကြောင်းသိရသည်။
ရွှေလီမြို့မှာ ကိုဗစ် -၁၉ အတည်ပြု လူနာ ရှိသည့် အတွက် ရွှေလီ၊ ကျယ်ဂေါင် နဲ့ ဝမ်တိန်မြို့တို့မှာ နေထိုင်သည့် ပြည်သူ အားလုံးကို ကိုဗစ်-၁၉ စစ်ဆေးပေးခဲ့ပြီး ပိုးတွေ့လူနာ မရှိသည့်အတွက် တရုတ်ဘက်မှ Lockdown ဖြေလျော့ပေးခဲ့ကြောင်းသိရသည်။။
မူဆယ် (၁၀၅) မိုင် ကုန်သွယ်ရေးဇုန်သည် မြန်မာနိုင်ငံ၏ အကြီးဆုံးသော ကုန်သွယ်ရေးဇုန် တစ်ခုဖြစ်သည်။မြန်မာ-တရုတ်နယ်စပ် ဝင်၊ ထွက် ဂိတ်များတွင် ကုန်ပစ္စည်း စီးဆင်းမှု သာဖွင့်လှစ်ပေးခဲ့ပြီး၊ လူဝင် ၊ လူထွက် များကို ဧပြီလနှောင်းပိုင်းက စတင်ပြီး ပိတ်လိုက်ကြောင်း သိရသည်။
ကမ္ဘာတဝှမ်းတွင် ကိုဗစ်-၁၉ ရိုက်ခတ်မှုကြောင့် စီးပွားရေး ကျဆင်းသလို မြန်မာနိုင်ငံမှ တရုတ်နိုင်ငံသို့ သွားရောက် အလုပ်လုပ်သည့် မြန်မာရွှေ့ပြောင်းအလုပ်သမားများသည် မြန်မာပြည်သို့ ပြန်လည်ဝင်ရောက်လာရပြီး အလုပ်အကိုင် အခွင့်အလမ်း ရှားပါးမှုများလည်း ရင်ဆိုင်နေရကြောင်း သိရသည်။
