သြဂုတ်လ ၂၉ ရက်ယနေ့မနက်ပိုင်း ကိုဗစ် -၁၉ အတည်ပြုလူနာ ၁၃ ဦး ထပ်တိုးရာ ထိုထဲမှ တဦးသည် သျှမ်းပြည်တောင်ပိုင်း တောင်ကြီးမြို့ တွင်နေထိုင်သူဖြစ်ကြောင်း ကျန်းမာရေး နှင့် အားကစား ဝန်ကြီးဌာနမှ ထုတ်ပြန်ခဲ့သည်။
တောင်ကြီးဒေသခံ ကိုဗစ် – ၁၉ အတည်ပြု လူနာ အမှတ် ၆၅၂ သည် သြဂုတ် ၂၅ ရက်ကအတည်ပြု လူနာ အမှတ် ၄၇၇ နှင့် ထိတွေ့ခဲ့ဖူးသူဖြစ်သည်။
လူနာ အမှတ် ၆၅၂ သည် ပြည်ပသို့ ခရီးသွား ရာဇဝင်သို့ မရှိခဲ့ကြောင်း လည်းသိရသည်။
ထိုလူနာသည် အသက် ၄၂ နှစ် အရွယ် အမျိုးသမီးဖြစ်ပြီး အသွားအလာ ကန့်သတ်ထားသူဖြစ်ကြောင်း တောင်ကြီး စဝ်စံထွန်းဆေးရုံအုပ်ကြီး ဒေါက်တာမြင့်သိန်း က သျှမ်းသံတော်ဆင့် ကိုပြောသည်။
“စဝ်စံထွန်း ဆေးရုံကိုတော့ ဒီမနက် ၈ နာရီ ဝန်းကျင်ကိုတော့ ပို့မယ်လို့တော့ ပြောတယ်။အသေးစိတ်တော့ မသိရသေးဘူး” စဝ်စံထွန်းဆေးရုံအုပ်ကြီး ဒေါက်တာမြင့်သိန်း က ပြောသည်။
အဆိုပါ ပိုးတွေ့ထားသူ လူနာအမှတ် (၄၇၇) နှင့် တကွ ထိတွေ့သူ (၆) ဦးတို့သည် တောင်ကြီးမြို့ ဘုရားဖြူရပ်ကွက်၊ ဧရာဝတီလမ်းတွင် နေထိုင်ကြပြီး၊ လက်ရှိမှာ ထိုလမ်းကို အသွားအလာ ကန့်သတ်ထားမှုများ ပြုလုပ်ထားကြောင်း သိရသည်။
တောင်ကြီးဒေသခံ လူနာ အမှတ် ၄၇၇ သည် သြဂုတ် ၂ ရက်နေ့ကတည်းက ရန်ကုန်သို့ ရောက်ရှိနေကြောင်း၊ လက်ရှိတွင်လည်း ရန်ကုန်ဆေးရုံတွင်ပင်ဆေးကုသမှုခံယူနေကြောင်းလည်းသိရသည်။
ပိုးတွေ့လူနာ အမှတ်( ၆၅၂) နှင့်ပတ်သက်ပြီး ပြည်နယ် ကျန်းမာရေးရုံးသို့ အကြိမ်ကြိမ် ဆက်သွယ် ကြည့်သော်လည်း အသေးစိတ်အချက်အလက်မရရှိသေးပေ ။
သြဂုတ်လ ၂၉ ရက် ယနေ့အထိ မြန်မာနိုင်ငံတွင် ပိုးတွေ့ လူနာ ၆၅၆ ဦးရှိခဲ့ပြီး ၊ ပြန်လည်သက်သာလာသူ ( ၃၄၉ ) ဦး နှင့် သေဆုံးသူ (၆) ဦး ရှိကြောင်း ကျန်းမာရေး နှင့် အားကစားဝန်ကြီးဌာနက ထုတ်ပြန်ထားသည်။
ထို့ကြောင့် ယနေ့ သျှမ်းပြည်တောင်ပိုင်း စဝ်စံထွန်းဆေးရုံတွင် ပိုးတွေ့လူနာ တစ်ဦးရှိနေပြီဖြစ်သည်။
