ရှမ်းတိုင်းရင်းသားများ ဒီမိုကရေစီ အဖွဲ့ချုပ် (SNLD) ပါတီ အနေဖြင့် လာမည့် ၂၀၂၀ ရွေးကောက်ပွဲတွင် သျှမ်းပြည်တောင်ပိုင်း တောင်ကြီးမြို့နယ် ၌ ကိုယ်စားလှယ်လောင်း လူငယ် အမျိုးသမီး (၃) ဦး ဝင်ရောက်ယှဉ်ပြိုင်သွားမည်ဖြစ်ကြောင်း သိရသည်။
တောင်ကြီးမြို့နယ် တွင် SNLD ကိုယ်စားလှယ်လောင်း ၅ ဦးထဲ၌ လူငယ် အမျိုးသမီး (၃) ဦးပါဝင်ကြောင်း သိရသည်။
“ဝင်ရောက်ယှဉ်ပြိုင်တဲ့ ကိုယ်စားလှယ် ၅ ဦး စလုံးကို ကြည့်မယ်ဆိုလို့ရှိရင် အသက်အရွယ်အားဖြင့် လူငယ်လို့ ပြောရမှာပါ။ အဲ့ဒီ လူငယ်တွေဟာ ဘာသာစကားအားဖြင့်လဲ ၂ ခု ၃ ခုလောက်ပြောနိုင်တယ်။ ဥပဒေ ပညာရှင်လည်း အဲ့ထဲမှာ ပါတယ်။ နိုင်ငံခြားက ဘွဲ့ရလာတဲ့သူတွေလည်း ပါတယ်။ သူတို့ရဲ့ အရည်ချင်းကို ကြည့်ခြင်းအားဖြင့် ဒါဟာ (၁၀) ရာခိုင်နှုန်း အောင်မြင်နိုင်မယ်လို့ ယုံကြည်တယ်” ဟု ရှမ်းတိုင်းရင်းသားများ ဒီမိုကရေစီအဖွဲ့ချုပ် ( SNLD) တောင်ကြီးမြို့နယ် ဥက္ကဋ္ဌ နန်းမြဦး ကပြောသည်။
SNLD အနေဖြင့် တောင်ကြီးမြို့နယ် အတွင်း ဝင်ရောက်ယှဉ်ပြိုင်မည့် နေရာများမှာ ဗမာတိုင်းရင်းသား ရေးရာ ဝန်ကြီး ၊ အမျိုးသား လွှတ်တော် ၊ ပြည်သူ့ လွှတ်တော် နှင့် ပြည်နယ် လွှတ်တော် (၂) နေရာ တို့ဖြစ်ကြောင်းသိရသည်။
“လာမယ့် ရွေးကောက်ပွဲမှာ အနိုင်ရမယ်လို့ မျှော်လင့်ထားပါတယ်။ အနည်းဆုံး ၅၀ ရာခိုင်နှုန်းလောက်ကတော့ နိုင်မယ်လို့ မျှော်လင့်တာပေ့ါ ဒါတောင်ကြီး အနေနဲ့ပဲ တွက်တာပါ။ အဲ့လောက်ထိ နိုင်မယ်ဆိုလို့ရှိရင် အဲ့ထက် မကလဲ နိုင်ခြေ နိုင်ပါတယ်။ အဲ့မှကိုယ့်ရဲ့ သမိုင်းမှာ မပေါ်ဖူးတဲ့အရာမျိုး တခါမှ မဖြစ်ဖူးတဲ့ အရာမျိုးလည်း ဖြစ်နိုင်တယ်။” ဟု နန်းမြဦး က ဆိုသည်။
SNLD ပါတီအနေဖြင့် ၂၀၁၀ ရွေးကောက်ပွဲ နှင့် ၂၀၁၅ ရွေးကောက်ပွဲ ကာလ မှာ တောင်ကြီးခရိုင်မှာ အနိုင်ရခြင်း မရှိခဲ့ပေ။
လာမည့် ၂၀၂၀ ရွေးကောက်ပွဲတွင် ( SNLD) ပါတီအနေဖြင့် အမျိုးသမီး လွှတ်တော် ကိုယ်စားလှယ်လောင်း ၂၉ ရာခိုင်နှုန်း ပါဝင်ထားကြောင်း သိရသည်။
SNLD ပါတီသည် (၄၅) မြို့နယ် ဝင်ရောက်ယှဉ်ပြိုင်သွားမည်ဖြစ်ပြီး တိုင်းရင်းသား မဲဆန္ဒနယ် (၃) ဦး၊ အမျိုးသား လွှတ်တော် နေရာ (၁၂) ဦး၊ ပြည်သူ့ လွှတ်တော်နေရာ (၃၈) ဦး နှင့် ပြည်နယ် လွှတ်တော် နေရာ (၇၉ ) ဦး စုစုပေါင်း (၁၃၂) ဦး ဝင်ရောက်ယှဉ် ပြိုင် သွားမည်ဖြစ်သည်။
၂၀၁၅ ရွေးကောက်ပွဲတွင် (SNLD) အနေဖြင့် ၁၆၃ ဦး ဝင်ရောက်ယှဉ်ပြိုင်ရာမှ လွှတ်တော်အတွင်း ၄၀ နေရာ အနိုင်ရရှိခဲ့သည်။
Leave a Comments