၂၄ နာရီ အတွင်း မြန်မာနိုင်ငံတွင် ကိုဗစ်-၁၉ ကူးစက်သူ (၁၀၀) တွေ့ရှိခဲ့ရာ ထိုထဲတွင် တောင်ကြီးဒေသခံ တစ်ဦး ပါဝင်နေကြောင်း သိရသည်။
ထို ကိုဗစ်-၁၉ လူနာ ၁၀၀ ဦးထဲတွင် အများစုမှာ ရခိုင်ပြည် မှ ဖြစ်သည်။
အဆိုပါ ထုတ်ပြန်ချက်သည် သြဂုတ် (၂၅) ရက် ည ၈း၀၀ နာရီတွင် ကိုဗစ် ကူးစက်သူ (၃၀) ဦးရှိပြီး ယနေ့ သြဂုတ် (၂၆) မနက် ၈း၀၀ နာရီတွင် ကူးစက်သူ (၇၀) ဦးရှိကြောင်း ကျန်းမာရေး နှင့် အားကစားဝန်ကြီးဌာန က ထုတ်ပြန်ခဲ့သည်။
အဆိုပါ တောင်ကြီးဒေသခံ တစ်ဦးသည် ပြည်ပသို့ ခရီးသွား ရာဇဝင် မရှိသလို ထိတွေ့လူနာ နှင့်လည်း မရှိခဲ့ကြောင်း သိရသည်။
“လူနာအမှတ် (၄၇၇) က တောင်ကြီး ကနေ ရန်ကုန် ကို ဒီလ ၂ ရက်နေ့တည်းက သွားနေတာပါ။ လက္ခဏာရှိလို့ ၂၂ ရက်နေ့က ရန်ကုန်ဆေးရုံကို တက်ပြီး စစ်လိုက်တာပါဗျ” ဟု သျှမ်းပြည် ပြည်သူ့ ကျန်းမာရေး ဦးစီးဌာန လက်ထောက်ညွှန်ကြားရေးမှူး ဒေါက်တာ ဇဝနကို ကပြောသည်။
Covid-19 ပိုးတွေ့လူနာ အမှတ် (၄၇၇) သည် တောင်ကြီးမြို့မှ ဖြစ်ပြီး ၎င်းသည် ရန်ကုန်သို့ ရောက်ရှိသည်မှာ တစ်လခန့်ကြာမြင့်နေကြောင်း ဒေါက်တာ ဇဝနကို က ပြောသည်။
တောင်ကြီး စေတနာ့ဝန်ထမ်း ပိုးသတ်ဆေးဖျန်းသည့် အဖွဲ့ကို ဦးဆောင်သည့် ကိုဝင်းနိုင်စိုး မှ “ပိုးသတ်ဆေးတွေလည်း အကုန်လုံး ကျနော်တို့ ပြန်လည်ပြင်ဆင်ထားပြီ။ စေတနာ့ ဝန်ထမ်းတွေလည်း ပြန်လည်စုနေပါပြီ။ လိုအပ်တဲ့ ပစ္စည်းတွေလည်း ဝယ်ဖို့ ရှိပါတယ်။ ကာကွယ်ရေး နဲ့ ပတ်သက်ပြီး ကြိုတင်ပြင်ဆင်မှုတွေ စလုပ်နေပါပြီ။” ဟု ပြောသည်။
တခြားမြို့မှာ ဖြစ်သော်လည်း နိုင်ငံသား အချင်းချင်းဖြစ်သည့်တွက် စိုးရိမ်မှုရှိပြီး ပြည်သူတစ်ယောက် အနေဖြင့်လည်း စိုးရိမ်ကြောင်း ကိုဝင်းနိုင်စိုး က ပြောသည်။
“ဒီနေ့ဆိုရင် မြို့နယ် အုပ်ချုပ်ရေးမှူးနဲ့ ရပ်ကျေး ဥက္ကဋ္ဌ တွေ ရပ်ကျေး အဖွဲ့ဝင်တွေ မြို့အနှံ့မှာ mask တွေ တပ်ကြဖို့ နှိုးဆော်နေပါပြီ။ ဒီနေ့ဆိုရင် ပြည်သူတွေ Mask တွေ တော်တော်များများ ပြန်တပ်လာတာကို တွေ့နေရပါတယ်။” ဟု ကိုဝင်းနိုင်စိုး က ဆိုသည်။
အဆိုပါ လူနာ အမှတ်(၄၇၇) သည် တောင်ကြီးမြို့၊ ဘုရားဖြူ ရပ်ကွက်နေ အသက် ၄၅ နှစ်အရွယ် အမျိုးသမီး ဖြစ်ပြီး ပြည်ပသို့ ခရီးသွား ရာဇဝင် နှင့် ရောဂါအတည်ပြု လူနာများနှင့် ထိတွေ့ခဲ့သည့် ရာဇဝင် မရှိဖြစ်ကာ သြဂုတ် ၂၂ ရက်တွင် သျှမ်းပြည်နယ်မှ ရန်ကုန်သို့ ရောက်ရှိနေသူဖြစ်ကြောင်း ၎င်း၏ ခရီးသွားရာဇဝင် ဇယားကို လူမှုကွန်ရက် စာမျက်နှာ ( facebook) တွင် ပျံ့နှံ့နေသည်ကို တွေ့ရသည်။
ယနေ့ သြဂုတ် (၂၆) မနက် ၈ နာရီမှာ ကိုဗစ် အတည်ပြု လူနာသစ် ၇၀ ဦးတွေ့ရှိပြီး တစ်ရက်တည်း စံချိန်တင် အများဆုံး တွေ့ရှိမှု ဖြစ်ပွားခဲ့သည်။
မြန်မာနိုင်ငံတွင် ကိုဗစ် အတည်ပြု လူနာ (၅၇၄) ဦး ၊ သေဆုံးသူ (၆) ဦး နှင့် ပြန်လည် သက်သာ လာသူ (၃၄၁) ဦး ရှိပြီဖြစ်ကြောင်း ကျန်းမာရေး ဝန်ကြီးဌာနက ထုတ်ပြန်ထားသည်။
ရခိုင်ပြည်နယ်တွင် သြဂုတ် (၁၆) ရက်မှ (၂၆ ) ရက်ထိ ကိုဗစ်-၁၉ ပိုးတွေ့ရှိသူ ၂၀၀ နီးပါး ရှိသွားပြီဖြစ်ကြောင်း ကျန်းမာရေး နှင့် အားကစား ဝန်ကြီးဌာနက ထုတ်ပြန်ခဲ့သည်။
