နိုင်ငံတော်၏ အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည် သည် ကိုဗစ်-၁၉ ကာလ အတွင်း ဒေသန္တရ အမိန့် ကို မလိုက်နာဘဲ လူစုလူဝေးပြုလုပ်ခွင့်ပြုသည်ဟုဆိုကာ ဦးထွန်းမြင့်အောင် က သြဂုတ် ၂၄ရက်စွဲဖြင့် ကျန်းမာရေး နှင့် အားကစားဝန်ကြီးဌာနကို တိုင်ကြားထားကြောင်း သိရသည်။
သြဂုတ် ၁၉ ရက် တွင် နေပြည်တော် ဇမ္ဗူသီရိမြို့နယ် ရွှေကြာပင်ရပ်ကွက် တွင် နိုင်ငံတော်၏ အတိုင်ပင်ခံပုဂ္ဂိုလ်၊ အမျိုးသား ဒီမိုကရေစီ အဖွဲ့ချုပ် ပါတီ၏ ဥက္ကဌ ဒေါ်အောင်ဆန်းစုကြည် သည် ၎င်းပါတီဝင်များနှင့် တွေ့ဆုံသည့်အပေါ် ထိုသို့တိုင်ကြားခြင်းခံခဲ့ရသည်။
ထိုတွေ့ဆုံမှုတွင် နိုင်ငံတော်မှ ထုတ်ပြန်ထားသည့် ဒေသန္တရ အမိန့်ဖြစ်သည့် လူ ၃၀ဦးဖြစ်စေ၊ ၃၀ဦး အထက်ဖြစ်စေ မစုစည်းရဟုသော အမိန့်အာဏာ ကို ဖောက်ဖျက်ကျူးလွန်ခဲ့ သည်ဟု နေပြည်တော် ဇမ္ဗူသီရိမြို့နယ်၏ NLD အတွင်းရေးမှူးဟောင်းဖြစ်သည့် တိုင်ကြားသူ ဦးထွန်းမြင့်အောင် ကဆိုပါသည်။
အဆိုပါ တိုင်ကြားမှုနှင့် ပတ်သက်ပြီး မိတ္တူကို ဇမ္ဗူသီရိ မြို့နယ် အမှတ်(၁) ရဲစခန်းသို့ ယမန်နေ့(သြဂုတ် ၂၄)ရက်တွင် ပေးပို့ခဲ့ရာ၊ ယနေ့ (သြဂုတ် ၂၅)ရက်မှာ ထိုအမှုသည် ရဲအရေးပိုင်မှု မဟုတ်ကြောင်း ရဲစခန်းက ပြန်လည် ပြောဆိုလာကြောင်း ဦးထွန်းမြင့်အောင် ကပြောသည်။
“မြို့နယ်မှူးကတော့ ရဲအရေးပိုင်မှုမဟုတ်ဘူးလို့ ပြောပါတယ်။ အမိန့်ထုတ်ထားတဲ့ ဌာနဆိုင်ရာ နဲ့ သက်ဆိုင်တယ်လို့ပြောပါတယ်” ဟု ဦးထွန်းမြင့်အောင် က ဆိုသည်။
နိုင်ငံတော် မှထုတ်ပြန်ထားသည့် ဒေသန္တရ အမိန့် ကို နိုင်ငံသားတိုင်းက လိုက်နာရမည်ဖြစ်ကြောင်း အထူးသဖြင့် နိုင်ငံတော် အဆင့် တာဝန်ရှိသူများက ပိုပြီး လိုက်နာရန် လိုအပ်ကြောင်းလည်း ၎င်းက ဆိုသည်။
“ ကျနော်အနေနဲ့ကတော့ တရားရေးကို ဆက်ပြီးတိုင်မယ်။ တရားရေးက လက်မခံဘူးဆိုရင်တော့ တရားဝင်ခွင့်ပြုမိန့်ယူပြီး ဆန္ဒထုတ်ဖော်ပါမယ်” ဟု ဦးထွန်းမြင့်အောင်က ပြောသည်။
ကိုဗစ်-၁၉ ကြိုတင်ကာကွယ် ရေး လုပ်ငန်းများနှင့် စပ်လျဉ်းပြီး ဧပြီ ၁၆ရက်မှ စတင်ကာ လူ ၅ဦးဖြစ်စေ၊ လူ၅ဦးထပ်ပို ၍ ဖြစ်စေ စုဝေးခြင်းမပြုလုပ်ရန် ကြေညာခဲ့ရာ သြဂုတ် ၁ရက်နေ့မှ စပြီး လူ၅ဦး အစား၊ လူ ၁၅ဦး ထက်ပို၍ ဖြစ်စေ စုဝေးခြင်းမပြုရန် ပြင်ဆင်ထုတ်ပြန်ခဲ့ကြောင်းသိရသည်။
ဆက်လက်ပြီး သြဂုတ် ၁၆ရက်တွင် လူ၁၅ဦး အစား လူ၃၀ဦး ဖြစ်စေ၊ လူ ၃၀ဦးထက်ပို၍ ဖြစ်စေ စုဝေးခြင်း မပြုရန် ထပ်မံပြင်ဆင် ထုတ်ပြန်ခဲ့သည်။
Leave a Comments