သီပေါမြို့ နယ် ရေကြီးရေလျှံမှု ကြောင့် ဒေသခံ(၁၀၀)ကျော် အခက်ကြုံနေ

0

စိုင်းဆိုင်လှိုင်း

သျှမ်းပြည် မြောက်ပိုင်း သီပေါမြို့နယ် နားမခေါ်ကျေးရွာ တွင် ယနေ့ (သြဂုတ် ၂၄) ၌ ရေကြီးရေလျှံမှုကြောင့် ဒေသခံပြည်သူ (၁၀၀) ကျော် စားဝတ်နေရေး ခက်ခဲနေကြောင်း စုံစမ်းသိရသည်။

Photo by တူးလီ/ Facebook
https://www.facebook.com/photo?fbid=613196749571175&set=pcb.613197076237809

ယခုရက်ပိုင်း ဆက်တိုက် မိုးသည်ထန်စွာရွာသွန်းမှုကြောင့် သီပေါမြို့နယ် နားမခေါ်ကျေးွရွာတွင် ရေကြီးမှုဖြစ်ပွားကာ ဒေသခံ (၁၁၂)ဦး ဘုန်းကြီးကျောင်းသို့ ယာယီပြောင်းရွှေ့နေထိုင်ရပြီး၊ စားဝတ်နေရေး အခက်အခဲဖြစ်ပွားနေကြောင်း နားမခေါ် ဒေသခံ လူငယ်အဖွဲ့ခေါင်ဆောင် စိုင်းအောင်ဌေး က သျှမ်းသံတော်ဆင့် ကို ပြောသည်။

“ အိမ်ခြေ ၂၇အိမ် ရေနစ်မြုပ်သွားခဲ့တယ်။ အိမ်ထဲကို ရေ ၄ပေလောက် ဝင်လာတယ်။ စားဝတ်နေရေးအတွက်တော့ အခက်ခဲရှိနေတယ်။ အိမ်အသုံးအဆောင် ပစ္စည်းတွေ ဆုံးရှုံးရတယ်” ဟု စိုင်းအောင်ဌေးက ပြောသည်။

နားမခေါ်ကျေးရွာသည် သီပေါမြိုနယ် အတွင်းတည်ရှိပြီး၊ သီပေါမြို့ နှင့် နမ့်လန် သို့သွားရာလမ်းမပေါ်တွင်တည်ရှိသည့် ကျေးရွာတခုဖြစ်သည်။

ထိုကျေးရွာတွင် အိမ်ခြေ (၄၀၀)ကျော်ရှိပြီး လက်ရှိမှာ အိမ်ခြေ ၂၇ အိမ် ရေဘေးကြုံနေရကြောင်းသိရသည်။

Photo by Aung Htay

ထိုနည်းတူ လွန်ခဲ့သည့် ၁၀နှစ်ကျော် ဝန်းကျင်တွင်လည်း နားမခေါ်ကျေးရွာတွင် ရေကြီးမှုဖြစ်ပွားခဲ့ကြောင်း နားမခေါ် ကျေးရွာ ဒေသခံများက ပြောသည်။

“ချောင်းရေနှင့် တောင်ကျရေတွေနဲ့ စုပြီးရေကြီးမှု ဖြစ်တာ။ ရေကြီးမှုက ရွာလယ်ပိုင်းနဲ ရွာစွန်းပိုင်း အနိမ့် ပိုင်းတွေမှာ ဖြစ်တာ။ အဲနေရာတွေက ချောင်းနဲနီးတဲ့ နေရာတွေဖြစ်တယ်” ဟု စိုင်းအောင်ဌေး က ဆိုသည်။

လက်ရှိ အခြေအနေအရ ချောင်းရေများပြန်ကျသွားသော်လည်း ရေလွှမ်းမိုးခံရသည့် နေအိမ်မှ ဒေသခံ (၁၀၀)ကျော် ထပ်မံရေကြီးလာမှာကို စိုးရိမ်နေကြကြောင်းသိရသည်။

ထို့ကြောင့် ရေဘေးကြုံနေရသည့် ပြည်သူများသည် ယာယီဘုန်းကြီးကျောင်းတွင်နေထိုင်နေရကြောင်း၊ ကျန်းမာရေးမှာ အားလုံးကောင်းမွန်ကြောင်း ယနေ့မနက် ရေလွှမ်းမိုးသည့် နေအိမ်ကို သွားရောက် ကူညီပေးသည့် နယ်စည်းမခြား ပရဟိတ အဖွဲ့ (သီပေါ) မှ ကိုမျိုး က သျှမ်းသံတော်ဆင့်သို့ပြောသည်။

“အခက်ခဲကြုံနေတဲ့ ပြည်သူတွေကိုတော့ ယာယီ ဘုန်ကြီးကျောင်းမှာ ထားထားတယ်။ ကျန်းမာရေးမကောင်းတဲ့ လူ၊ အသက်ကြီးတွေလည်း မပါဘူး။ ကလေးငယ်တွေတော့(၃) ဦးလောက် ပါတယ်” ကိုမျိုး က ဆိုသည်။

သီပေါနှင့် နားမခေါ်ကျေးရွာသည် မိုင် ၂၈မိုင် အကျော်တွင် တည်ရှိသည်။

ယခုရက်ပိုင်း သျှမ်းပြည် တဝှမ်းတွင် နေရာအနှံ့ နီးပါး ရေကြီးရေလျှံမှု ဖြစ်ပွားခဲ့ကြောင်း သိရသည်။

သျှမ်းပြည် အတွင်း သဘာဝပတ်ဝန်းကျင်ပျက်စီးမှု၊ သစ်ပင်ခုတ်မှုကြောင့် ယခုနောက်ပိုင်း ရေကြီးမှု ဖြစ်လာရခြင်းဖြစ်ကြောင်း သီပေါမြို့ တွင်နေထိုင်သည့် စိုင်းလောဝ် က ပြောသည်။

“ တောင်တွေပေါ်မှာ သစ်ပင်တွေ မရှိတော့ဘူး။ သစ်ပင်တွေ ခုတ်ပြီး တရုတ်တွေကိုရောင်းတယ်။ နောက်သစ်ပင်တွေရှင်းပြီး ပြောင်းတွေစိုက်ကြတယ်။ သဘာဝပတ်ဝန်းကျင်တွေ ပျက်စီးလာတယ်” ဟု စိုင်းလောဝ် က ပြောပြသည်။

သြဂုတ်(၂၁)ရက်တွင် သျှမ်းပြည် တောင်ပိုင်း လင်းခေးခရိုင် ဟိုမိန်းနှင့် လင်းခေးလမ်းပိုင်းတွင် ရေကြီးမှု ဖြစ်ပွားခဲ့ပြီး၊ သြဂုတ် (၁၀) တွင် သျှမ်းပြည်တောင်ပိုင်းနမ့်စန်မြို့တွင်လည်း အိမ်ခြေ (၂၃၁) အိမ်ရေဘေးကြုံခဲ့ရကြောင်းသိရဥည်။

အလားတူ သြဂုတ်လ (၃) ရက်နေ့တွင်လည်း တောင်ကြီးမြို့တွင် မိုးသည်းထန်စွာ ရွာသွန်းမှုကြောင့် ရေကြီး မြေပြိုဖြစ်ကာ အမျိုးသားတစ်ဦး သေဆုံးခဲ့ကြောင်းသိရသည်။

Leave a Comments