ကျားဖြူပါတီ ဥက္ကဌ ဦးစိုင်းအိုက်ပေါင်း ကြားဝင်အကျိုးဆောင်ပေးမှုကြောင့် လာမည့်ရက်ပိုင်းအတွင်း နေပြည်တော် ငြိမ်းချမ်းရေးကောင်စီ မှ သျှမ်းပြည်တိုးတက်ရေးပါတီ ၀မ့်ဟိုင်းဌာနချုပ် သို့ သွားရောက်ကာ တွေ့ဆုံဆွေးနွေးကြမည်ဟုသိရသည်။
သျှမ်းပြည်တိုးတက်ရေးပါတီ SSPP/SSA ဟိုင်းဌာနချုပ်သို့သွားပြီး တွေ့ဆုံကြမည့် ခရီးစဉ်တွင် နေပြည်တော်အစိုးရ ငြိမ်းချမ်းရေးကော်မရှင် ဒုဥက္ကဌ ဦးသိန်းဇော်၊ အတွင်းရေးမှူး ဒုတိယဗိုလ်ချုပ်ကြီး ခင်ဇော်ဦး (ငြိမ်း) တို့ ဦးဆောင်မည်ဖြစ်ကြောင်း၊ အကျိုးတော် ဆောင်ပေးသည့် ကျားဖြူပါတီ ဥက္ကဌ ဦးစိုင်းအိုက်ပေါင်း၊ ဒုတိယ ဥက္ကဌ ဦးစိုင်းဆောင်ဆီ တို့လည်းပါ၀င်မည်ဖြစ်ကြောင်း ကြားသိရသည်။
“ကျားဖြူပါတီ အနေ့နဲ့ အကျိုးတော်ဆောင်ပေးတာဘဲရှိတယ်။ အခုတော့ဘာမှ မပြောနိုင်သေးဘူး။ ၄ ရက်နေ့ လောက်မှ တွေ့ပြီးတော့မှဘဲ အသေးစိပ်သိရမယ် ”- ဟု ကျားဖြူပါတီ ဥက္ကဌ ဦးစိုင်းအိုက်ပေါင်းက ပြောသည်။
အမည်မဖေါ်လိုသည့် ၀မ့်ဟိုင်းဌာချုပ်အရာ ရှိကြီးတဦးက – မည်သည့်ပုဂ္ဂိုလ်လက်ခံတွေ့ဆုံဆွေးနွေးကြမည် မသိရသေးသော်လည်း လကုန်ပိုင်းလောက်တွင်ဆွေးနွေးမှု ဖြစ်နိုင်သည်ဟုလည်း သျှမ်းသံတော် ဆင့်သို့ အတည် ပြုသည်။
သျှမ်းပြည်တိုးတက်ရေးပါတီ သျှမ်းပြည်တပ်မတော် SSPP/SSA မှ တနိုင်ငံလုံးအပစ်အခတ်ရပ်စဲရေးစာချုပ် လက်မှတ်ရေးထိုးချုပ်ဆိုနိုင်ရန်၊ ငြိမ်းချမ်းရေးကောင်စီ နှင့် တွေ့ဆုံဆွေးနွေးရန် အတွက် မတ်လ လယ်ပိုင်းက ကျားဖြူပါတီ ဥက္ကဌ ဦးဆောင်သည့် အဖွဲ့ ၀မ့်ဟိုင်းဌာနချုပ်သို့ ရှေ့ပြေးသွားရောက်ခဲ့ပါသေးသည်။
ငြိမ်းချမ်းရေးကောင်စီ PC သည် ဧပြီ ၂၆ ရက်နေ့က ကရင်နီအမျိုးသားတိုးတက်ရေးပါတီ KNPP နှင့်လည်း ကယားပြည်နယ် လွိုင်ကော်မြို့တွင် တွေ့ဆုံခဲ့ပါသေးသည်။
သျှမ်းပြည်တိုးတက်ရေးပါတီ သျှမ်းပြည်တပ်မတော် SSPP/SSA သည် ၀တပ် UWSA နှင့် ကချင်တပ် KIA တို့ ဦးဆောင်သည့် မြောက်ပိုင်းမဟာမိတ်အဖွဲ့ FPNCC တွင်ပါ၀င်သည့် သျှမ်းလက်နက်ကိုင်တပ်တခုဖြစ်သည်။ ထို FPNCC သည် တနိုင်ငံအပစ်အခတ်ရပ်စဲရေးစာချုပ် NCA လမ်းကြောင်းကို လက်မခံ ဘဲ ပါ၀င်သင့် ပါ၀င်ထိုက် သူများအားလုံးပါ၀င်သည့် နိုင်ငံရေးဆွေးနွေးပွဲသို့ တိုက်ရိုက်သွားလိုသည့် မဟာမိတ်အဖွဲ့အစည်းဖြစ်သည်။
