၂၀၂၀ ပါတီစုံ ရွေးကောက်ပွဲကို ကိုဗစ်-၁၉ ထိန်းချုပ် ကာကွယ်သည့် ကာလအတွင်းကျင်းပသည့်အတွက် မဲရုံများကျယ်ဝန်းခြင်းနှင့် မဲရုံများများထားရှိရန် လိုအပ်ကြောင်း သျှမ်းပြည်အခြေစိုက်လူမှု အဖွဲ့အစည်း များက ပြောဆိုလိုက်သည်။
သျှမ်းပြည်တွင်းရှိ မဲရုံ အရေအတွက် (၃၆၇၆) ခန့်ရှိပြီး အတိုးအလျော့ ဆက်လက်ရှိသွားမည်ဖြစ်ကြောင်း သျှမ်းပြည်နယ် ရွေးကောက်ပွဲ ကော်မရှင် အဖွဲ့ခွဲ ဥက္ကဋ္ဌ ဦးထင်ကျော် က သြဂုတ် (၁၈) တွင်ပြုလုပ်သည့် အစည်းအဝေးတွင် ပြောကြားခဲ့သည်။
ရွေးကောက်ပွဲ ကာလသည် ကိုဗစ်-၁၉ထိန်းချုပ် ကာကွယ်သည့် ကာလဖြစ်သဖြင့် မဲရုံကျယ်ဝန်းမှု မရှိမည်ကို စိုးရိမ်ရကြောင်း၊ မဲရုံ ပရဝုဏ် တွင် တဦးနှင့် တဦး ၆ ပေ ကွာ တန်းစီခြင်း မပြုလုပ်မှာကိုစိုးရိမ်ကြောင်း သျှမ်းပြည် အခြေစိုက် မြန်မာ့ ငြိမ်းချမ်းရေး နှင့် လုံခြုံရေး သိပ္ပံ မှ ကိုဝင့်ထည်ကောင်းမြတ်က သျှမ်းသံတော်ဆင့် ကို ပြောသည်။
“မဲရုံတွေ ကျယ်ပါ့မလား။ မဲရုံတွေရဲ့အပြင်မှာ လူတွေက ပြုံပြီးတော့ မဲပေးဖို့စောင့်နေတဲ့ဟာ မျိုး ဆိုလို့ရှိရင်လည်း အဆင်မပြေဘူး” ကိုဝင့်ထည်ကောင်းမြတ် က ပြောသည်။
ကျန်းမာရေး နှင့် အညီ မဲပေးခွင့် ရရန် အတွက်ကျန်းမာရေး ဌာနနှင့် ပူးပေါင်းပြီး လုပ်ထားသင့်ကြောင်းလည်း သျှမ်းပြည် လှုပ်ရှားနေသည့် လူမှု အဖွဲ့အစည်းများက ပြောဆိုလိုက်သည်။
လာမည့် ၂၀၂၀ ပါတီစုံ ဒီမိုကရေစီ အထွေထွေရွေးကောက်ပွဲသည် ကိုဗစ်- ၁၉ ကာလလည်း ဖြစ်သ ည့်အတွက် ဘယ်လို ပုံစံဖြင့် မဲပေးရမည်ကို တိတိကျကျ မပြော နိုင်သေးကြောင်းလည်း သျှမ်းပြည် ရွေးကောက်ပွဲ ကော်မရှင်ထံ မှ သိရသည်။
လူဦးရေ များပြားသည့် ကျေးရွာများတွင် မဲရုံ ကျဉ်းကြပ်ပါက စိုးရိမ်ရမည့် အနေအထားဖြစ်ပြီး မဲရုံမှ အစ ပြင်ဆင်သည့် အခါတွင် ကျေးရွာမှာ ရှိသည့် အုပ်ချုပ်ရေးမှူးမှ ရွေးကောက်ပွဲ ကော်မရှင်နှင့် ပူးပေါင်းပြီး သေချာပြုလုပ်သင့်ကြောင်းလည်း သျှမ်းပြည် လူထုများကပြောသည်။
ယခုရက်ပိုင်း ကိုဗစ်-၁၉ ပိုးတွေ့ရှိသူသည် နေ့စဉ် ရက်ဆက်မြင့်တက်လာပြီး၊ ရခိုင်ပြည် စစ်တွေတွင် ခရီးသွားရာဇာဝင်မရှိ၊ ပိုးထိတွေ့သူမရှိဘဲ အလိုအလျောက် ကူးစက်ခံရသူ (၁၀) ဦးရှိကြောင်း ယနေ့မနက် ၈နာရီတွင် ကျန်းမာရေး ဝန်ကြီးဌာနက ထုတ်ပြန်ကြေညာခဲ့သည်။
“ရွေးကောက်ပွဲ မဲပေးတဲ့ချိန်မှာ ကိုဗစ်ကလည်း တစ်ခေါက်ပြန်ပြီး စိုးရိမ်စရာ တစ်ခု ဖြစ်လာတယ်။ စိုးရိမ်စရာ ကိစ္စလည်း ဖြစ်လာတယ်။ တကယ့်ကို ပြည်တွင်း ကူးစက်တာ အနည်းငယ် စဖြစ်လာပြီပေါ့နော်။” ကိုဝင့်ထည်ကောင်းမြတ် ကပြောသည်။
ရွေးကောက်ပွဲနီးလာသည့်နှင့် အမျှ ကိုဗစ်-၁၉ အတည်ပြုလူနာကလည်း တိုးလာသည့်အတွက် မဲရုံတွင် သက်ဆိုင်ရာများအနေဖြင့် စနစ်တကျ ပြုလုပ်ရန် လိုအပ်ကြောင်းလည်း သျှမ်းပြည်သူများက ပြောသည်။
ထိုအခြေအနေများကြောင့် ကျန်းမာရေး ဝန်ကြီးဌာန ၏ လမ်းညွှန်မှုသည် အလွန် အရေးကြီး ကြောင်း၊ မဲပေးချိန်တွင် လူစု လူဝေးမဖြစ်ရန် အတွက် မဲရုံများများထားပေးရန် လိုအပ်ကြောင်းလည်း သျှမ်းမြောက် လူ့အခွင့်အရေး တက်ကြွ လှုပ်ရှားသူ မမိုင်းမိုင် က ပြောသည်။
ရွေးကောက်ပွဲနေ့တွင် မဲလာပေးသူများ ကို Mask (နှာခေါင်းစည်း)၊Hang gel (လက်ဆေးရည်) များကို အလျင်မီအောင် လုပ်ပေးရမည် ဖြစ်ကြောင်း လည်း မိုင်းမိုင် က ပြောသည်။
“ မဲပေးချိန် လူစု၊လူဝေးဖြစ်မှာပဲလေ။ ဖြစ်တဲ့အတွက် ကြောင့်မလို့ မဲရုံတွေ များများထားရမယ် ကျန်းမာရေး ဝန်ကြီးဌာန လမ်းညွှန်ချက်ကို အပြည့်အဝ လိုက်နာရမယ်” ဟု မမိုင်းမိုင် က ဆိုသည်။
ရွေးကောက်ပွဲကာလသည် ကိုဗစ်-၁၉ ထိန်းချုပ်သည့် ကာလဖြစ်သည့်အတွက် စိန်ခေါ်မှုများစွာ အခက်အခဲများစွာရှိကြောင်းလည်း သိရသည်။
“ မဲရုံများပြီး စောင့်ကြည့်လေ့လာတဲ့သူ မရှိရင်လည်း အဆင်မပြေဘူး။ မဲရုံများများ မခွဲရင်လည်း ကျန်းမာရေး ဘက်ကကြည့်ရင် အဆင်မပြေပြန်ဘူး။ အခက်အခဲကတော့ မျိုးစုံပဲ” ဟု လာရှိုးဒေသခံ နန်းဟွမ် ကပြောသည်။
တဖက်တွင်လည်း ကိုဗစ် ကာလကြောင့် ရွေးကောက်ပွဲ မကျင်းပနိုင်ပါက ပြည်သူများ အနေဖြင့် ကိုဗစ်ထက် ပိုသော ကျပ်တည်းမှုများ ရင်ဆိုင်ရနိုင်ဖွယ်ရှိကြောင်း နိုင်ငံရေး လေ့လာ သုံးသပ်သူ ဦးမောင်မောင်စိုးက သျှမ်းသံတော်ဆင့် ကို ပြောဆိုခဲ့ဖူးသည်။
ကိုဗစ် ကာလ ကြားရွေးကောက်ပွဲကျင်းပမည်ဖြစ်သဖြင့် ကျန်းမာရေး ဝန်ကြီးဌာန နှင့် ပြည်ထောင်စု ရွေးကောက်ပွဲ ကော်မရှင် ( UEC) က လူထုကို မထိခိုက်စေမည့် စည်းရုံးရေး ကိစ္စကို လိုက်လျောညီထွေမှုပြုလုပ်သွားရန် သေချာ ညှိနှိုင်း သင့်ကြောင်း ရှမ်းတိုင်းရင်းသားများ ဒီမိုကရေစီ အဖွဲ့ချုပ် အထွေထွေ အတွင်းရေးမှူး စိုင်းလိတ် က ပြောဆိုခဲ့ဖူးသည်။
ထို့ကြောင့် လာမည့် ရွေးကောက်ပွဲသည် ကိုဗစ် -၁၉ အကျပ်အတည်း ကြားတွင် ယှဉ်ပြိုင်ရမည့် ရွေးကောက်ပွဲ ဖြစ်သဖြင့် တရားမျှတသည့် ယှဉ်ပြိုင်မှု မဖြစ်မည်ကို သျှမ်းလူထုက စိုးရိမ်နေကြသည်။
