ဖက်ဒရယ်တိုင်းပြည်လက်တွဲတည်ဆောက်ရေး ၂၁ ပင်လုံ စတုတ္ထ ညီလာခံတွင် သဘောတူ

၃ ရက်တာကာလအတွင်းကျင်းပခဲ့သည့် ပြည်ထောင်စု ငြိမ်းချမ်းရေး ညီလာခံ (၂၁) ရာစု ပင်လုံ စတုတ္တအစည်းအဝေးမှ ပြည်ထောင်စု သဘောတူညီချက် အစိတ်အပိုင်း (၃)ကို ချုပ်ဆိုနိုင်ခဲ့ကြောင်း သိရသည်။

နေပြည်တော်ရှိ မြန်မာ အပြည်ပြည်ဆိုင်ရာ ကွန်ဗန်းရှင်းဗဟိုဌာန- (၂) ( MICC -2 ) တွင် (၂၁) ရာစု ပင်လုံ စတုတ္တအစည်းအဝေးကို ၂၀၂၀ သြဂုတ်လ ၁၉ ရက်မှ ၂၁ ရက်အထိ ဆွေးနွေးပြီး စာချုပ်လက်မှတ်ရေးထိုးနိုင်ခဲ့ခြင်းဖြစ်သည်။

အဆိုပါ သဘောတူညီချက် အစိတ်အပိုင်း (၃) တွင် တစ်နိုင်ငံလုံးပစ်ခတ် တိုက်ခိုက်မှု ရပ်စဲရေး သဘောတူစာချုပ် NCA အကောင်အထည်ဖော်မှုဆိုင်ရာ မူဘောင် သဘောတူညီချက် ၊ ၂၀၂၀ အလွန် အဆင့်လိုက် လုပ်ငန်းစဉ်များနှင့် အဆင့်လိုက် အကောင်အထည်ဖော်မှုများ ၊ ဒီမိုကရေစီ နှင့် ဖက်ဒရယ်စနစ်တို့ကို အခြေခံသည့် ပြည်ထောင်စု တည်ဆောက်ရေး ဆိုင်ရာ လမ်းညွှန်အခြေခံမူ သဘောတူညီချက် တို့ ဖြစ်သည်။

ညီလာခံတက်ရောက်သည့် RCSS/SSA ၏ ငြိမ်းချမ်းရေးဖော်ဆောင်ရေးအဖွဲ့ခေါင်းဆောင် စိုင်းလျန်းက – “အခုညီလာခံကနေ သဘောတူညီချက်တွေရရှိကြလို့ ကျနော်တို့ ကြိုးစားခဲ့တဲ့ ဖက်ဒရယ်ပြည်ထောင်စု တည်ဆောက်ရေးအတွက် လမ်းစပွင့်လာပြီ။ ”- ဟု သျှမ်းသံတော်ဆင့်အားပြောသည်။

၃ ရက်သာ ညီလာခံ ကာလသည် တိုတောင်း သော်လည်း ယနေ့(သြဂုတ် ၂၁)ရက်တွင် ပြည်ထောင်စု သဘာတူစာချုပ် အစိတ်အပိုင်း (၃)ကို လွယ်ကူစွာရရှိခဲ့ခြင်းမဟုတ်ကြောင်း နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် က ညီလာခံ တွင် ပြောကြားခဲ့သည်။

“ငြိမ်းချမ်းရေး လုပ်ငန်းစဉ်မှာ တွေ့ကြုံရင်ဆိုင်ရမြဲဖြစ်တဲ့ အနိမ့်အမြင့် အတက်အကျတွေ တဖက် နဲ့ တဖက် ကျေကျေလည်လည်ဖြစ်အောင် အချိန်ယူရတာတွေ ကိုဗစ် -၁၉ ကပ်ရောဂါ ကာကွယ်ထိန်း ချုပ်ရသည့် ကာလ ဖြစ်နေတာတွေကြား က ခက်ခက်ခဲခဲ အချိန်ယူ ကြိုးပမ်းပြီးတဲ့နောက် ရရှိလာခဲ့တဲ့ သဘောတူ စာချုပ်ဖြစ်ပါတယ်” ဟု ဒေါ်အောင်ဆန်းစုကြည် ကထပ်လောင်းပြောသည်။

ယနေ့ ချုပ်ဆိုသည့် ပြည်ထောင်စု သဘောတူစာချုပ် အစိတ်အပိုင်း (၃) ၏ ဦးတည်ချက်သည် အနာဂတ် ဖက်ဒရယ် ဒီမိုကရေစီ ပြည်ထောင်စု ရေး အတွက် အရေးကြီးသည့် အစပျိုး မှု တခု ဖြစ်ကြောင်း NCA-S-EAO ကိုယ်စား မွန်ပြည်သစ်ပါတီ ဥက္ကဌကြီး နိုင်ဟံသာ က ညီလာခံတွင် ပြောဆိုခဲ့သည်။

“ ဆက်လက်ဆွေးနွေးရန် ကျန်ရှိနေသေးတဲ့ ပြည်နယ်ဖွဲ့စည်းပုံ အခြေခံ ဥပဒေ ကိစ္စ နဲ့ လွှတ်တော်ပိုင်း ဆိုင်ရာ ကဏ္ဍများကိုလည်း ကျနော်တို့ အချင်းချင်း ရင်းနှီး ပွင့်လင်းစွာ ဆက်လက် အဖြေရှာနိုင်မယ်လို့ မျှော်လင့်ပါတယ်” ဟု နိုင်ဟံသာ မိန့်ခွန်းတွင် ထည့်ပြောဆိုခဲ့သည်။

ထို့ပြင် NCA သဘောတူညီချက် (၁၅)ချက် ထဲမှ ပြည်ထောင်စု သမ္မတ မြန်မာနိုင်ငံအား မပြိုကွဲရေး တိုင်းရင်းသား စည်းလုံးညီညွှတ်မှု မပြိုကွဲရေး၊ အချုပ်အခြာ အာဏာ တည်တံ့ခိုင်မြဲရေး တို့ကို ရှေးရှုပြီး လွတ်လပ်မှု တန်းတူ ညီမျှမှု နှင့် တရားမျှတ မှုတို့ကို အခြေခံပြီး ပင်လုံ စိတ်ဓာတ်နှင့်အညီ ဒီမိုကရေစီရေး အမျိုးသား တန်းတူရေး နှင့် ကိုယ်ပိုင် ပြဋ္ဌာန်းခွင့် အခွင့်အရေးများ အာမခံချက်များ အပြည့်အဝ ရှိသော ဒီမိုကရေစီ နှင့် ဖက်ဒရယ် စနစ်တို့ကို အခြခံ သည့် ပြည်ထောင်စု တို့ကို နိုင်ငံရေး ဆွေးနွေးပွဲ ရလဒ်များနှင့် အညီ တည်ဆောက်သွားရန် ဒုတိယ ဗိုလ်ချုပ်ကြီး ခင်ဇော်ဦး (အငြိမ်းစား) တပ်မတော်သားကိုယ်စားလှယ် က ညီလာခံမှာ အဆိုပြုခဲ့သည်။

ဆက်လက်ပြီး ပြည်ထောင်စု နှင့် တိုင်းဒေသကြီး၊ ပြည်နယ်အကြား ဖက်ဒရယ်စနစ်နှင့် အညီ အာဏာ ခွဲဝေမှု သယံဇာတ ခွဲဝေမှု အခွန်အကောက်ခွဲဝေမှု နှင့် ဘဏ္ဍရေး ခွဲဝေမှု ရှိရမည် ဟု နိုင်ငံရေး ပါတီ အစုအဖွဲ့ ညီလာခံ ကိုယ်စားလှယ် UPDJC အတွင်းရေးမှူးများ အဖွဲ့ဝင် စိုင်းကျော်ညွှန့် က ညီလာခံတွင် အဆိုပြုတင်သွင်းခဲ့သည်။

နိုင်ငံတော် အချုပ်အခြာအာဏာဖြစ်သည့် အုပ်ချုပ်ရေး ၊ ဥပဒေပြုရေး၊ တရားစီရင်ရေး အာဏာ သုံးရပ်ကို ပြည်ထောင်စု၊ ပြည်နယ်များနှင့် ကိုယ်ပိုင်အုပ်ချုပ်ခွင့်ရ တိုင်း၊ ဒေသများသို့ ခွဲဝေ အပ်နှင်းမည့် ပြည်ထောင်စု တိုင်းဒေသကြီး၊ ပြည်နယ် များ ကိုယ်ပိုင်အုပ်ချုပ်ခွင့်ရ တိုင်း၊ ဒေသများအကြား ဥပဒေပြုရေး ဆိုင်ရာ အာဏာများနှင့် ပူးတွဲအာဏာများကို နိုင်ငံတော် ဖွဲ့စည်းပုံ အခြေခံ ဥပဒေက ခွဲဝေ အပ်နှင်းပေးရမည် ဟုလည်း စိုင်းကျော်ညွှန့် ၏ အဆိုပြုလွှာတွင် ရေးသားဖော်ပြထားသည်။

အထက်ပါ သဘောတူညီချက်များကို တစ်နိုင်ငံလုံ ပစ်ခတ်တိုက်ခိုက်မှု ရပ်စဲရေး သဘောတူစာချုပ် အပိုဒ် ၂၀(င) အရ ပြည်ထောင်စု သဘောတူစာချုပ် အစိတ်အပိုင်း (၃) အဖြစ် ပြည်ထောင်စု ငြိမ်းချမ်းရေး ညီလာခံ (၂၁) ရာစု ပင်လုံ စတုတ္တအစည်းအဝေးတွင် အစုအဖွဲ့အသီးသီး၏ ခေါင်းဆောင်များ နှင့် အသိသက်သေများက လက်မှတ်ရေးထိုးကြသည်။

အမျိုးသား ပြန်လည်သင့်မြတ်ရေး နှင့် ငြိမ်ချမ်းရေး ဗဟိုဌာန (NRPC) ဥက္ကဋ္ဌ နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည် အပါအဝင် အစိုးရ လွှတ်တော် တပ်မတော် နိုင်ငံရေး ပါတီများ NCA လက်မှတ်ရေးထိုးထားသော တိုင်းရင်းသား လက်နက်ကိုင် အဖွဲ့အစည်းများမှ ခေါင်းဆောင်များ နှင့် ကိုယ်စားလှယ်များ တက်ရောက်ခဲ့သည်။

၂၁ ရာစု ပင်လုံ ငြိမ်းချမ်းရေး ညီလာခံ စတုတ္တအကြိမ်တွင် ပြည်ထောင်စု သဘောတူစာချုပ် အစိတ်အပိုင်း ၃ လက်မှတ် ရေးထိုး နိုင်ရန်အတွက် သြဂုတ် (၁၄-၁၈) ထိ UPDJC အဖွဲ့မှ ငြိမ်းချမ်းရေး ညီလာခံမှာ တင်ပြမည့် ပုံစံကို ပြန်လည် ရေးဆွဲပြီး ယနေ့ ၂၁ ရက်နေ့မှာ စာချုပ်ကို အတည်ပြု ချုပ်ဆိုနိုင်ခဲ့သည်။

ပြည်ထောင်စု သဘောတူစာချုပ် အစိတ်အပိုင်း ၂ နှင့် အစိတ်အပိုင်း ၁ ကို ပြီးခဲ့သည့် ၂၀၁၈ ခုနှစ်နှင့် ၂၀၁၇ ခုနှစ်က ကျင်းပသည့် ပြည်ထောင်စုငြိမ်းချမ်းရေးညီလာခံ တတိယ နှင့် ဒုတိယအစည်းအဝေး တို့တွင် သဘောတူညီမှုရရှိခဲ့ပါသည်။