မြန်မာနိုင်ငံတွင် ခရီးသွား ရာဇာဝင်မရှိ၊ ပိုးရှိသူ နှင့် ထိတွေ့မှု မရှိဘဲ အလိုအလျောက် ကူးစက်လာသည့် လူနာ (၂၅) ဦးခန့် ရှိလာသည်။

ထိုနေရာများမှာ ရန်ကုန် ၊ ကချင်ပြည်နယ်၊ သျှမ်းပြည် ၊ ရခိုင်၊ မန္တလေး နှင့် နေပြည်တော် စသည်တို့ နေရာသည် အလိုအလျောက် ကူးစက်လာသည့် လူနာ ၂၅ နီးပါး ရှိလာကြောင်း သိရသည်။

ကိုဗစ် ကူးစက်မှု ၃-၄ လအတွင်း သျှမ်းပြည်သူ လူထု နည်းတူ တခြား ပြည်နယ် နှင့် တိုင်းဒေသက ပြည်သူများက နေထိုင်သွားလာမှု ပေ့ါဆလာပြီး အပြင်ထွက်သည့်အခါ Maskတပ်ခြင်း မပြုလုပ်ကြတော့ပေ။

ယခု ရက်တပတ်အတွင်း ရခိုင်ပြည် စစ်တွေမြို့တွင် ခရီးသွားရာဇာဝင်မရှိ၊ ပိုးရှိသူနှင့်ထိတွေ့မှု ကိုဗစ်-၁၉ ကူးစက်ခံနေရတဲ့ လူနာ ၆ဦးရှိလာသည်။

“ဒေသခံတွေ စိုးရိမ်နေတာ ပြောမနေနဲ့ အရမ်းကြီးပဲ။ ဒီနေ့ဆို ၇၅ ရာခိုင်နှုန်းထိ Mask တွေ တပ်တာ တွေ့ရတယ်။” ရခိုင်ပြည် စစ်တွေမြို့၏ ဒေသခံ တစ်ဦးက ပြောပါတယ်။

မြန်မာနိုင်ငံတွင် ကိုဗစ်-၁၉ အလိုအလျောက်ကူးစက်ခံနေရသူ ယခုရက်ပိုင်းရှိလာသည့်အတွက် တခြားပြည်နယ် နှင့် အထူးသဖြင့် သျှမ်းပြည် သူများ ပေါ့ဆစွာ မနေထိုင်သင့်ကြောင်း သျှမ်းလူထု အသိုင်းအဝန်းက ပြောဆိုလိုက်သည်။

ယခုလို ပြည်တွင်း ကူးစက်မှု များပြားလာသည့်အတွက် စိုးရိမ်မှုတွေ များစွာ ရှိလာကြသော်လည်း ပြည်သူလူထုအနေဖြင့် ပေါ့ဆစွာ မနေသင့်ကြောင်း သျှမ်းပြည်တောင်ပိုင်း တောင်ကြီးဒေသခံ စိုင်းဦး ကပြောသည်။

“ဒီလို ပြည်တွင်းကူးစက်မှု ရှိလာတော့ စိုးရိမ်မှုကတော့ ထိပ်ဆုံးက ရှိနေတာပေါ့။ ကြိုတင် ကာကွယ်မှု မလုပ်ဘူးဆိုရင် ဆိုးကျိုးတွေ အများကြီး ဖြစ်လာနိုင်တယ်။ ခုကတည်း လုပ်ထားဖို့ လိုတာပေါ့နော်” ဒေသခံ စိုင်းဦး ကပြောသည်။

ကျန်းမာရေး ဝန်ကြီး ဌာနက ထုတ်ပြန်ထားသည့် စည်းကမ်းအတိုင်း လူစုလူဝေး ရှောင်ရခြင်း၊ အပြင်ထွက်သည့်ခါ Mask တပ်ရခြင်း ၊ မကြာခဏ လက်ဆေးရခြင်း နှင့် တစ်ဦး နှင့်တစ်ဦး ၆ ပေ အကွာမှာ နေထိုင်ရခြင်းစသည့်အချက်များကို သျှမ်းပြည်အတွင်း လိုက်နာ ဆောင်ရွက်မှု အားနည်း သွားပြီဖြစ်ကြောင်း သျှမ်းပြည် ဒေသခံများက ပြောဆိုကြသည်။

“စိုးရိမ်ရတဲ့ အခြေအနေပါ။ တော်တော်များများက ကိုဗစ် ပြီးသွားသလို သွားလာနေထိုင်ကြတာ။ လူစုလူဝေးမှာ တစ်ယောက် ကူးစက်တာနဲ့ အကုန်ထိခိုက်နိုင်တာလေ” ဟု သျှမ်းမြောက် ဒေသခံ စိုင်းကောင်း က ပြောသည်။

ကိုဗစ်-၁၉ ကူးစက်မှုနှုန်း ရှိနေသေးသည့်အတွက် သွားလာသည့် နေရာတွင် သတိ နှင့် သွားလာသင့်ကြောင်း ဆေးတက္ကသိုလ် နောက်ဆုံးနှစ် တက်ထားသူ စိုင်းကော်ယုမ့် က ပြောသည်။

“ဒီရောဂါ မပြီးမချင်း ကိုယ့်ဘက်က အမြဲတမ်း ဂရုစိုက်နေရမှာပါ။ လူများတဲ့နေရာမှာ သွားတာတွေရှောင်ပါ။ mask တပ်တာတို့ စဖြစ်ကတည်းက ပုံစံ နဲ့ ပြန်နေနိုင်ရင် ပိုကောင်းတယ် ။ဘာဖြစ်လို့လဲဆိုတော့ ဒီဟာက ဒုတိယ လှိုင်း ပြန်ဖြစ်နိုင်ပါတယ်။ လူတွေက ပေါ့သွားကြတယ်။ ဘာမှ မဖြစ်တော့ဘူးဆိုတော့ အမှန်တကယ် အဲ့လို မဖြစ်သင့်ဘူးပေါ့” ဟု စိုင်းကော်ယုမ့် က ပြောသည်။

ကိုဗစ်-၁၉ လူနာသည် ရက်ပိုင်း ၂၀ကျော် မရှိခဲ့ရာမှ ယခု နေ့တိုင်းနီးပါး ပြန်လည် ရှိလာပြီး၊ တဖက်တွင် အခြေခံအလယ်တန်းကျောင်း၊ မူလတန်းကျောင်း ပြန်လည် ဖွင့်လှစ်မည်ဖြစ်သဖြင့် ကျောင်းသားမိဘများကလည်း စိုးရိမ်မှု ရေချိန်တက်နေကြောင်းလည်း သိရသည်။

“ ကလေးတွေ ကျောင်းပြန်ဖွင့်ခါနီးမှာ ကိုဗစ်-၁၉ လူနာက နေ့တိုင်းလိုလို ပြန်ရှိလာတယ်။ အစကတော့ လျော့သွားရင် စိုးရိမ်စရာမရှိရင်ကျောင်းလွှတ်မလားလို့ စဉ်းစားနေတယ်။ အခု လိုမျိုးဆိုရင် စိတ်က ပူရပြန်ပြီ” ဟု ကျောင်းသားမိဘ တဦးဖြစ်သည့် နန်းယိင်း က ပြောသည်။

ကိုဗစ်-၁၉ လူနာ နေ့တိုင်းနီးပါးရှိလာသည့်အတွက် ပြည်သူများအနေဖြင့် ကျန်းမာရေး ဝန်ကြီးဌာန မှ ထုတ်ပြန်ချက်ကို လိုက်နာရန်လိုအပ်ကြောင်း၊ မပေါ့ဆသင့်ကြောင်း လည်း နန်းယိင်း က ဆိုသည်။

မြန်မာနိုင်ငံတွင် တဖက်တွင် ကိုဗစ်-၁၉ ရင်ဆိုင်နေရသကဲ့သို့ တဖက်တွင် ရာသီတုတ်ကွေး ကိုလည်း ရင်ဆိုင်နေရသည်။

“ကိုဗစ်ကိုလည်း ရင်ဆိုင်နေရ ရာသီတုတ်ကွေးလည်းဖြစ်တော့ ကျမ အနေနဲ့ အားလုံးကို လန့်နေရတယ်။ ကလေးကျန်းမာရေး၊ကိုယ့်ကျန်းမာရေးကိုပါ ဂရုစိုက်နေရတယ်” ဟု နန်းယိင်း ကထပ်လောင်းပြောသည်။

မြန်မာနိုင်ငံတွင် ပထမဆုံး ကိုဗစ်-၁၉ လူနာကို မေလ ၂၃တွင် စတင်တွေ့ရှိပြီး၊ ယနေ့ အထိ ကိုဗစ် -၁၉ ကူးစက်သူ ( ၃၉၆) ဦးရှိလာခဲ့ပြီဖြစ်သည်။

ကိုဗစ်-၁၉ ကူးစက်ခံရပြီး ပြန်လည် သက်သာလာသူ (၃၃၃) ဦး နှင့် သေဆုံးသူ (၆) ဦး ရှိပြီဖြစ်ကြောင်း ကျန်းမာရေး ဝန်ကြီးဌာနက ထုတ်ပြန်ထားသည်။

ထိုထဲတွင် သျှမ်းပြည်တွင် ကိုဗစ်-၁၉ ကူးစက်သူ (၁၀) ဦးရှိခဲ့ပြီး ဆေးရုံမှာ အသီးသီး ဆင်းရပြီဖြစ်ကြောင်း သိရသည်။

လက်ရှိမှာ သျှမ်းပြည်တွင် ကိုဗစ်-၁၉ လူနာ တဦးတယောက်မှ မရှိတော့သည့်အတွက် သျှမ်းလူထုများ ယခင်ကထက် များစွာပေ့ါဆစွာနေထိုင်ခြင်း၊ လူစုလူဝေးများပြန်လည်ပြုလုပ်ခြင်း၊ Mask(နှာခေါင်းစည်း) များ တပ်ခြင်းတို့ မပြုလုပ်တော့ပေ။

မြန်မာနိုင်ငံတွင် ပြန်လည် ဝင်ရောက်လာသည့် ပြည်ပပြန် ကူးစက်မှုသည် ၅၆ ရာခိုင်နှုန်းရှိပြီး ပြည်တွင်း ကူးစက်မှု ၄၃ ရာခိုင်နှုန်း ရှိကြောင်း သိရသည်။