မြန်မာနိုင်ငံတွင် အင်တာနက် လွတ်လပ်စွာ အသုံးပြုခွင့်သည် နှစ်စဉ်ကျဆင်းလာပြီး ဒီဂျစ်တယ် အခွင့်အရေး ချိုးဖောက်မှု အဆိုးရွာဆုံး နိုင်ငံဖြစ်လာကြောင်း Free Expression Myanmar အစီရင်ခံစာအရ စုံစမ်း သိရှိရသည်။
လက်ရှိ မြန်မာနိုင်ငံသည် အိမ်နီးချင်း တရုတ်နိုင်ငံနည်းတူ ဒစ်ဂျစ်တယ် အခွင့်ရေး ချိုးဖောက်မှုများသည် ကမ္ဘာ့အဆိုးရွားဆုံး နိုင်ငံများအနက် တစ်နိုင်ငံဖြစ်လာနိုင်ကြောင်း Free Expression Myanmar က အောက်တိုဘာ ၁၈ ရက်တွင် ထုတ်ပြန်ထားသည့် အစီရင်ခံစာ၌ ရေးသားဖော်ပြထားသည်။
မြန်မာနိုင်ငံ အင်တာနက် လွတ်လပ်ခွင့်သည် စစ်တပ်က အာဏာသိမ်းပြီးနောက်ပိုင်း ဆက်တိုက်ကျဆင်းလာပြီး၊ စစ်တပ်သည် နိုင်ငံရေး တက်ကြွလှုပ်ရှားသူများကို အင်တာနက်မှ တဆင့် ခြေရာခံကာ အမြဲတမ်းစောင့်ကြည့် ဖမ်းဆီးမှုများပြုလုပ်ခဲ့သည်။
“ စစ်တပ်က အာဏာသိမ်းပြီးနောက်ပိုင်းမှာ အင်တာနက်တွေ လွတ်လပ်စွာ အသုံးပြုခွင့်ကို ထိန်းချုပ်လာခဲ့တယ်။ အဓိကတော့ အွန်လိုင်းပေါ်ကနေ တက်ကြွလှုပ်ရှားသူတွေကို ဖမ်းဆီးထောင်ချတာတွေ ပိုပြီးမြင့်မားလာတယ်။ ဒီအင်တာနက်ကနေလည်း ဖမ်းဆီးခံရပြီးတော့ အမြင့်ဆုံး ပြစ်ဒဏ်အနေနဲ့ သေဒဏ်တွေ ချမှတ်ခံရတာတွေလည်း ရှိလာခဲ့တယ်” ဟု Free Expression Myanmar ဒါရိုက်တာ ဒေါ်ယဉ်ရတနာသိန်းက ပြောသည်။
လက်ရှိမှာ မြန်မာနိုင်ငံတွင် အင်တာနက် အသုံးပြုရာမှာ လုံခြုံမှုလုံးဝ မရှိတော့ကြောင်း ဒေါ်ယဉ်ရတနာသိန်းက ဆိုသည်။
ထိုအပြင် အင်တာနက် အသုံးပြုရာတွင်လည်း သတိထား အသုံးပြုရကြောင်း နိုင်ငံရေးဆိုင်ရာတွင်လည်း မရှဲရဲတော့ကြောင်း တောင်ကြီးမြို့ ဒေသခံ အမျိုးသားတစ်ဦးက ပြောသည်။
“ ဒီတိုင်းပဲ ကြည့်တာပေါ့။ သတင်းတွေလည်း ဖတ်ပဲဖတ်တယ်။ မရှဲတော့ဘူး။ ရှဲရင်လည်း သူတို့ လာဖမ်းမှာကြောက်ရတယ်။ နိုင်ငံရေး နဲ့ ပတ်သက်ရင်လည်း ကော်မန့်တွေ၊ ရှဲတာတွေလုပ်လို့မရဘူး။ သိတဲ့အတိုင်း သူတို့တွေက လိုက်ဖမ်းနေတာလေ” ဟု သျှမ်းပြည်အရှေ့ပိုင်း မိုင်းဆတ်ဒေသခံ လူငယ်တစ်ဦးက ပြောသည်။
အလားတူ လက်ရှိမြန်မာနိုင်ငံတွင်လည်း အင်တာနက် package သည်လည်း ဈေးမြင့်တက်လာပြီး လိုင်းကောင်းမွန်စွာ မရရှိကြောင်း သိရသည်။
ယခင်က ၁,၀၀၀ ကျပ်လျှင် 1GB ရရှိသော်လည်း လက်ရှိမှာ ၁,၀၀၀ ကျပ်လျှင် 470 MB သာရရှိတော့ကြောင်း သိရသည်။
“ အင်တာနက်ကလည်း ဈေးကြီးလာတယ်။ အရင်က ၁,၀၀၀ ဆိုရင် ၂ ရက်လောက် သုံးလို့ရတယ်။ အခုဆိုရင် တစ်မနက်နဲ့တင်ကုန်သွားပြီ။ လိုင်းကလည်း မကောင်းဘူး။ ကျနော်တို့ကလည်း VPN ကျော်သုံးရတယ်ဆိုတော့ ပိုဆိုးတယ်လေ။ တစ်လကို အင်တာနက်ဖိုးပဲဆိုရင် ၃ သောင်းလောက်ကုန်တယ်” ဟု သျှမ်းပြည်အရှေ့ပိုင်း မိုင်းဆတ်ဒေသခံတစ်ဦးက ပြောသည်။
ထိုသို့ စစ်ကောင်စီက အင်တာနက်လွတ်လပ်စွာ အသုံးပြုမှုကို ပိတ်ဆို့လာပြီး အခွင့်ရေးကို ချိုးဖောက်လာသောကြောင့် ပြည်သူများအနေဖြင့်လည်း အင်တာနက်အသုံးပြုရာတွင် သတိထားပြီး VPN ကို မဖြစ်မနေ အသုံးပြုရန် လိုအပ်ကြောင်း ဒေါ်ယဉ်ရတနာသိန်းက ထပ်လောင်းပြောသည်။
စစ်တပ်က အာဏာသိမ်းပြီးနောက် မြန်မာနိုင်ငံတွင် အင်တာနက် အသုံးပြုမှု အခွင့်ရေးများကို ချိုးဖောက်လာပြီး လက်ရှိ Website ၁၂၀၀ ကျော်လည်း ပိတ်ခံထားရကြောင်းသိရသည်။
