လာမည့် ၂၀၂၀ ရွေးကောက်ပွဲ တောင်ကြီးခရိုင်တွင်းရှိ ပထမအကြိမ် မဲဆန္ဒရှင် စာရင်းကြေညာရာတွင် လာရောက်ကြည့်ရှုသူ ၃သိန်း သာရှိကြောင်း သတင်းရရှိသည်။
တောင်ကြီးခရိုင်အတွင်းရှိ မဲဆန္ဒရှင် စာရင်း ကြေညာထားသည်မှာ (၇) သိန်းကျော် ရှိသော်လည်း လာရောက် ကြည့်ရှုသူ (၃) သိန်းကျော်သာ ရှိကြောင်း တောင်ကြီးခရိုင် ရွေးကော်ပွဲ ကော်မရှင်အဖွဲ့ခွဲ အရာရှိ ဦးသန်းဇော်ဦး ကပြောသည်။
လက်ရှိ မဲဆန္ဒရှင် စာရင်းလာရောက်ကြည့်သူများစာရင်းသည် တောင်ကြီးခရိုင် အတွင်းရှိ မြို့နယ် (၅)မြို့နယ် ဖြစ်သည့် တောင်ကြီး၊ ညောင်ရွှေ ၊ ကလော၊ ရပ်စောက် နှင့် ဖယ်ခုံ မြို့နယ်တို့ဖြစ်ကြောင်းသိရသည်။
“လာမယ့် အောက်တိုဘာ လမှာလည်း ဒုတိယအကြိမ် ထပ်မံ ကပ်ထား ကြေညာပါမယ်” ဟု ဦးသန်းဇော်ဦး က ပြောသည်။
ပြည်ထောင်စု ရွေးကောက်ပွဲ ကော်မရှင်မှ ပထမအကြိမ် မဲဆန္ဒရှင် စာရင်းကို ဇူလိုင် ၂၅ ရက်မှ သြဂုတ် ၁၄ ရက်ထိ (၁၄) ရက် ကပ်ထားကြောညာခဲ့သည်။
“ကျမ အနေနဲ့ မဲစာရင်း ကပ်ထား ကြေညာထားတယ်ဆိုတာ မသိလိုက်ဘူး။ ကပ်ထားတဲ့ နေရာမှာလည်း ကျမ နာမည်ပါ၊ မပါ မသိဘူး” တောင်ကြီးမြို့ တွင်နေထိုင်သည့် ဒေါ်နန်းဆိုင် က သျှမ်းသံတော်ဆင့်ကို ပြောသည်။
မဲဆန္ဒရှင် စာရင်းကြေညာမှု မသိရှိကြောင်း၊ မည်သည့်နေရာတွင် သွားရောက်ကြည့်ရမည်ကို မသိရှိသဖြင့် သွားမကြည့်လိုက်ရကြောင်းလည်း ဒေါ်နန်းဆိုင် က ဆိုသည်။
“ အသက် ၁၈နှစ်ပြည့်သူတိုင်း မဲစာရင်းသွားစစ်သင့်ပါတယ်။ ကိုယ့်နာမည်ပါ၊မပါ။ မှားနေလားဆိုတာ စစ်ဖို့လိုအပ်ပါတယ်။ ရက်နီးမှ နာမည်တွေမှားရင် ပြင်းလို့မရတော့ဘူး” ဟု တောင်ကြီးမြို့နယ် အတွင်းနေထိုင်သည့် အမျိုးသား တဦး ကပြောသည်။
ရွေးကောက်ပွဲကော်မရှင် ပထမအကြိမ်အဖြစ် ဇူလိုင် ၂၅ ရက်က မဲဆန္ဒရှင်စာရင်းထုတ်ပြန်ကြေညာရာတွင် တချို့မဲဆန္ဒနယ်များမှာ လူဦးရေစာရင်းကျန်ခဲ့ခြင်း၊ အချက်အလက်တချို့ မှားယွင်းနေခြင်း၊ မပါဝင်သင့်သူများ ပါဝင်နေခြင်း၊ မှတ်ပုံတင်နံပါတ်များထပ်နေခြင်း၊ လွဲမှားနေမှုများကွက်လပ်ဖြစ်နေခြင်း ကို တွေ့ရှိကြောင်း အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးသိန်းဆွေ ပြောဆိုခဲ့သည်။
တောင်ကြီးခရိုင်အတွင်းတွင်းရှိ မြို့နယ် (၁၀) မြို့မှာ မဲရုံပေါင်း (၁၁၆၆) ထားရှိမည်ဖြစ်ပြီး လုံခြုံရေး ရဲတပ်ဖွဲ့များလည်း အထူးရဲ (၁၁၆၆) ဦး ထားရှိမည်ဖြစ်ကြောင်း ဒုတိယ ရဲမှူးကြီး တောင်ကြီး ခရိုင်ရဲတပ်ဖွဲ့မှူး ဦးဇော်ဌေးဦး ကပြောသည်။
“မဲရုံ တစ်ရုံမှာ အထူးရဲ တစ်ယောက် နှုန်းနဲ့ တာဝန်ပေးသွားမှာ ဖြစ်ပါတယ်။ အထူးရဲ ၁၁၆၆ ယောက်ကိုလည်း စုဆောင်းပြီးဖြစ်ပါတယ်” ဟု ရဲတပ်ဖွဲ့မှူး ဦးဇော်ဌေးဦး ကပြောသည်။
တောင်ကြီးခရိုင်တွင်းရှိ မြို့နယ် ၅ မြို့နယ်မှ ပုံစံ (၃) ဖြင့် တောင်းဆိုလာသည်မှာ (၂၄၀၀၀) ကျော် ရှိပြီး ပုံစံ (၄) ဖြင့် တင်ပြလာသူ (၈၀၀၀) ကျော် နှင့် ပုံစံ(၄) (ဂ) ဖြင့် တင်ပြလာသူ (၂၀၀၀၀) ကျော် ရှိကြောင်း သိရသည်။
ပုံစံ (၃) သည် အမည်စာရင်းလုံးဝ မပါရှိသည့် မဲဆန္ဒရှင် ဖြစ်ပြီး၊ ပုံစံ (၄) သည် မပါသင့်သည့် သူ ပါရှိလာပြီး ကန့်ကွက်သည့် ပုံစံ နှင့် ပုံစံ (၄) (ဂ) အမည်စာရင်းလွဲမှားခြင်းကို ပြန်လည် ပြင်ဆင် ဆောင်ရွက်ရခြင်း ဖြစ်သည်။
လာမည့် ၂၀၂၀ ခုနှစ် ပါတီစုံ ဒီမိုကရေစီ အထွေထွေရွေးကောက်ပွဲတွင် သျှမ်းပြည်တွင်းရှိ မဲရုံပေါင်း (၃၅၀၀) ကျော် ထားရှိမည်ဖြစ်ကြောင်း သိရသည်။
၂၀၂၀ ခုနှစ် နိုဝင်ဘာလ မှာ ကျင်းပမည့် ပါတီစုံ ရွေးကောက်ပွဲသည် သျှမ်းပြည်တွင်းရှိ မဲပေးပိုင်ခွင့် ရှိသူ (၃၅) သန်းကျော်ရှိကြောင်း သိရသည်။
