ကိုဗစ်-၁၉ ကပ်ရောဂါ ရေရှည်ထပ်ဖြစ်မည်ဆိုပါက တနိုင်ငံလုံး အတိုင်းအတာဖြင့် အခြေခံ ပညာကျောင်းများ၏ သင်ရိုးညွှန်းတမ်းများကို လျှော့ချသွားရမည်ဖြစ်ကြောင်း စုံစမ်းသိရှိရသည်။
ကိုဗစ်-၁၉ ကြောင့် ကျောင်းများ ၄ လ ခန့်အကြာ ပိတ်ထားခဲ့ပြီးနောက် မြန်မာတစ်နိုင်ငံလုံး ဇူလိုင် ၂၁ ရက်နေ့မှ စတင်ပြီး အထက်တန်းအဆင့်ကို စတင်ဖွင့်လှစ်ခဲ့သည်။
“သင်ရိုးညွှန်းတမ်း ပြုပြင်ရေးကနေပြီးတော့ သင်ရိုးညွှန်းတမ်း များကို လျော့ချပြီးတော့ တစ်နိုင်ငံလုံး အတိုင်းအတာနဲ့ ကြေညာဆောင်ရွက်သွားမှာ ဖြစ်ပါတယ်” ဟု သျှမ်းပြည် ပညာရေးမှူး ဦးဝင်းမောင် က သျှမ်းသံတော်ဆင့် ကိုပြောသည်။
စာသင်ခန်း တစ်ခန်းတွင် အနည်းဆုံး ကျောင်းသား/သူ အယောက် (၂၀) သာထားပြီး သင်ကြားသည့်အတွက် ကျောင်းသား အရေအတွက်များသည့် ကျောင်းတွင် ပုံမှန်ထက် တစ်ပတ်ခြား တသုတ်သို့မဟုတ် တစ်ပတ်ခြား ၂ သုတ် တက်ရသည့် ကျောင်းများလည်း ရှိသည့်အတွက် စာသင်ချိန်အတွက်အခက်အခဲ ရှိကြောင်း သျှမ်းပြည် ပညာရေးမှူး ဦးဝင်းမောင် ကပြောသည်။
“ဌာနအရနေပြီးတော့ ရေရှည်ဆောင်ရွက်မယ်ဆိုရင် သင်ရိုးညွှန်းတမ်းတွေကို ပြန်လည် လျှော့ချ ညှိနှိုင်းဆောင်ရွက်မှာဖြစ်တဲ့အတွက်ကြောင့် လက်ရှိ စာသင်ချိန်မှာ ကျောင်းတက်ခွင့် ရရှိရေးကို အဓိက ဦးစားပေး ဆောင်ရွက်လျှက်ရှိပါတယ်” ဟု ဦးဝင်းမောင် ကပြောသည်။
အထက်တန်းအဆင့်ကို နိုင်နိုင်နင်းနင်း သင်ကြားဆောင်ရွက်နိုင်ပြီးနောက် မကြာခင် အလယ်တန်းအဆင့်ကို ဆက်လက်ဖွင့်လှစ်သွားရန် အစီစဉ်ရှိကြောင်း သိရသည်။
အလားတူ အလယ်တန်းအဆင့်ကို ဖွင့်လှစ်နိုင်ပြီဆိုလျှင် ဆက်လက်ပြီး မူလတန်းအဆင့်ကိုလည်း ဖွင့်လှစ်သွားရန် စီစဉ်ဆောင်ရွက်လျှက်ရှိထားကြောင်း စုံစမ်းသိရှိရသည်။
ကိုဗစ်-၁၉ ကြောင့် ကိုယ်ပိုင်ကျောင်း၊ ဘော်ဒါဆောင်များ ဖွင့်ခွင့်မပြုသေးသည့်အတွက် ကလေးများ သက်ဆိုင်ရာ ဒေသရှိ အခြေခံကျောင်းသို့ ပြောင်းနိုင်ကြောင်း သိရသည်။
ကိုဗစ်-၁၉ ကြောင့် ဘော်ဒါဆောင်ထားရှိမည့် ကိုယ်ပိုင်အထက်တန်းကျောင်းများ ဘော်ဒါဆောင်များနှင့် ပတ်သက်ပြီး ပြန်လည်ဖွင့်လှစ်ခွင့် မပြုကြောင်း ကိုဗစ် ကာကွယ်ထိန်းချုပ် ကုသရေး ဗဟိုကော်မတီ က ဇူလိုင် (၁၄) ရက် ထုတ်ပြန်ခဲ့သည်။
ဇူလိုင် ၂၁ ရက်တွင် အခြေခံ ပညာအထက်တန်းကျောင်း နှင့် ထခွဲကျောင်း အပါအဝင် (၁၈၄) ကျောင်းဖွင့်လှစ်ထားပြီ ဖြစ်ကြောင်း သျှမ်းပြည်နယ် ပညာရေးမှူးရုံးမှ သိရသည်။
လက်ရှိ မြန်မာနိုင်ငံတွင် တစ်နေ့ထက် တစ်နေ့ ကိုဗစ်-၁၉ ကူးစက်ရောဂါ ပိုမိုများပြားလာသည့်အတွက် ကျောင်းသား မိဘများသည် မိမိကလေးများကို ကျောင်းလွှတ်ရန် စိုးရိမ်နေကြသေးသည်။
တစ်ချို့ကျောင်းသားမိဘများသည် ကိုဗစ်-၁၉ ကပ်ရောဂါ ပြီးမှသာလျှင် ကျောင်းသို့ တက်ခွင့်ပြုမည်ဟုလည်း ပြောဆိုနေကြသည်။
ယခုနှစ် ကျောင်းဖွင့်ချိန်သည် ကိုဗစ် -၁၉ ကြောင့် အခြေခံ ပညာကျောင်းများ သတ်မှတ်သည့် လထက် နောက်ကျပြီး ကျောင်းဖွင့်ခဲ့ရပြီး ယခုချိန်ထိ အထက်တန်းအဆင့်ကိုသာ ကျောင်းအပ်လက်ခံပြီး ကျောင်းဖွင့်နိုင်ခဲ့ကြောင်း သိရသည်။
