ယခုနှစ် သျှမ်းပြည် တက္ကသိုလ်ဝင် စာမေးပွဲ အောင်ချက် ရာခိုင်နှုန်း ကျဆင်းလာကြောင်း သျှမ်းပြည်နယ် ပညာရေးမှူးရုံး မှ စုံစမ်းသိရသည်။
၂၀၁၉ – ၂၀၂၀ ပညာသင်နှစ် တက္ကသိုလ် ဝင်စာမေးပွဲ အောင်စာရင်းကို သြဂုတ် ၉ ရက်တွင် ကြေညာခဲ့သည်။
သျှမ်းပြည်တွင် ဝင်ရောက်ဖြေဆိုသူ ကျောင်းသား/သူ ပေါင်း ၆ သောင်းကျော်ရှိပြီး အောင်မြင်သူ ၁ သောင်းကျော် သာ ရှိကြောင်း၊ အောင်ချက် ရာခိုင်နှုန်းအရ ( ၂၇.၂၇) ရာခိုင်နှုန်း ရှိကြောင်း သျှမ်းပြည် ပညာရေးမှူး ဦးဝင်းမောင် က သျှမ်းသံတော်ဆင့် ကိုပြောသည်။
“ပြီးခဲ့တဲ့ နှစ် ရာနှုန်းက သျှမ်းတောင်မှာဆိုရင် ၂၇.၆၉ ရာနှုန်းလောက် ရှိပြီးတော့ ယခုနှစ်မှာ ၂၆.၂၈ ရာနှုန်းလောက်ပဲ ရှိတယ်။ တပြည်လုံး ရဲ့ ရာနှုန်းနဲ့ပြောမယ်ဆိုရင် ၁.၄ ရာနှုန်းလောက် လျော့နည်းလာတာတွေ့တယ်” ဟု ပညာရေးမှူး ဦးဝင်းမောင် က သျှမ်းသံတော်ဆင့် ကိုပြောသည်။
အဆိုပါ ရာခိုင်နှုန်း လျော့ရခြင်းသည် တက်ရောက်သင်ယူကြသည့် ကျောင်းသား/သူများ အနေအထား ဆရာ/ဆရာမ များ၏ ကျွမ်းကျင်မှု အနေအထား နှင့် လိုအပ်ချက်များကြောင့် ရာခိုင်နှုန်း လျော့ဆင်းရခြင်း ဖြစ်ကြောင်း ပညာရေးမှူး ဦးဝင်းမောင် က ပြောသည်။
“ယခုနှစ်ကတော့ ဒီ တစ်နိုင်ငံလုံး Top Ten ထဲမှာ သျှမ်းပြည်က ဝင်ထားခြင်း မရှိဘူး။ ပြီးခဲ့တဲ့ နှစ်က သျှမ်းပြည်နယ် အနေအထားက top ten ထဲမှာ ဝင်တဲ့သူ ရှိပါတယ်” ဟု ဆရာကြီး ဦးဝင်းမောင် ကပြောသည်။
သျှမ်းပြည် တွင် ၆ဘာသာ ဂုဏ်ထူးရှင် ( ၈) ဦး၊ ၅ ဘာသာ ဂုဏ်ထူးရှင် ( ၄၀) ဦး၊ ၄ဘာသာ ဂုဏ်ထူးရှင် ( ၁၀၂) ဦး၊ ၃ ဘာသာဂုဏ်ထူးရှင် (၃၀၂) ဦး၊ ၂ ဘာသာ ဂုဏ်ထူးရှင် ( ၅၇၆) ဦး နှင့် ၁ ဘာသာ ဂုဏ်ထူးရှင် (၁၉ ၄၈)ဦး တို့ရှိကြောင်း ပြည်နယ် ပညာရေးရုံးမှ သိရသည်။
တောင်ကြီးမြို့ ၃ ဘာသာ ဂုဏ်ထူးရှင် နန်းဆိုင်ဟွမ် က “ ၃ဘာသာ ဂုဏ်ထူး ထွက်မယ်ဆိုတာ မမျှော်လင့်ထားဘူး။ နေ့တိုင်း ပုံမှန်ပဲ စားလုပ်သွားတယ်” ဟု သျှမ်းသံတော်ဆင့်ကို ပြောသည်။
၃ဘာသာ ဂုဏ်ထူးရသဖြင့် သူနာပြုတက္ကသိုလ်တက်ရန် စဉ်းစားထားကြောင်း လည်း နန်းဆိုင်ဟွမ် က ပြောသည်။
မြန်မာနိုင်ငံတွင်းရှိ ၂၀၁၉ -၂၀၂၀ တက္ကသိုလ်ဝင်စာမေးပွဲ ဝင်ရောက်ဖြေဆိုရာတွင် ပြည်နယ် နှင့် တိုင်းဒေသကြီး (၁၉ ) နေရာ ရှိသည့်အနက် မန္တလေးတိုင်းဒေသကြီးမှာ အောင်ချက် ပထမ အဆင့်ရရှိပြီး ဒုတိယ အဆင့်ရရှိသည့် တိုင်းဒေသကြီးမှာ စစ်ကိုင်းတိုင်းဒေသကြီး ဖြစ်ပြီး တတိယအဆင့်ရရှိသည့် ပြည်နယ်မှာ မွန်ပြည်နယ် ဖြစ်သည်။
ထို့ပြင် သျှမ်းပြည် မြောက်ပိုင်းတွင် အဆင့် (၈) နေရာ ရရှိပြီး သျှမ်းပြည်တောင်ပိုင်းတွင် အဆင့် (၁၆) ရရှိကာ သျှမ်းပြည်အရှေ့ပိုင်းတွင် အဆင့် ( ၁၉ ) နေရာ ရရှိခဲ့သည်။
၂၀၂၀-၂၀၂၁ ပညာသင်နှစ်သည် ကိုဗစ်-၁၉ ကာကွယ် ထိန်းချုပ်သည့် ဗဟိုကော်မတီ ၏ ညွန်ကြားချက်အရ အထက်တန်းအဆင့် ကို ဇူလိုင် ၂၁ ရက် မှစတင်ပြီး ပြန်လည် ဖွင့်လှစ်ခဲ့ရသည်။
Leave a Comments