လာမည့် ၂၀၂၀ ပါတီစုံ ဒီမိုကရေစီ အထွေထွေရွေးကောက်ပွဲတွင် တပ်မဲရုံများ အပြင်ထုတ်လာခြင်းသည် ပွင့်လင်းမြင်သာမှု ရှိလာသည်ဟု နိုင်ငံရေးပါတီများက သုံးသပ်ပြောဆိုလိုက်သည်။
တပ်မတော်သားများ အပြင်ထွက်ပြီး မဲလာရောက်ထည့်ခြင်းသည် တန်းတူညီမျှသည့် အနေအထား ဖော်ဆောင်သည့်အတွက် ကြိုဆိုရမည့် ကိစ္စဖြစ်ကြောင်း ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) အထွေထွေအတွင်းရေးမှူး စိုင်းလိတ် က သျှမ်းသံတော်ဆင့်ကို ပြောသည်။
“တပ်မတော်သားတွေ ကိုယ်တိုင်က အပြင်ထွက်ပြီး မဲပေးပြီ ဆိုကတည်းက ဒါ မဲပေးသူ အရေ အတွက်ကိုလည်းပဲ ပိုပြီးတော့မှ တိတိကျကျ ရေတွက်လို့ရလာနိုင်တယ်။ လူထုအနေနဲ့ ပွင့်လင်း မြင်သာမှု ရှိတဲ့သဘောပါ ကြိုဆိုရမှာပေါ့။ ဒီလိုပဲ ဖြစ်သင့်တယ်လို့ ကျနော်တို့က မြင်ပါတယ်” ဟု စိုင်းလိတ် က ပြောသည်။
တပ်မတော်သားများနှင့် သူ၏မိသားစုဝင်များ မဲပေးမည်ဆိုပါက တပ်တည်ရှိသည့်နေရာ၏ ရပ်ကွက်ကျေးရွာအုပ်စုရှိ မဲရုံပေါင်းပြီး မဲ ပေးရမည်ဖြစ်ပြီး၊ တပ်တည်ရှိသည့်နေရာသည် ရပ်ကွက်၊ကျေးရွာနှင့်အလှမ်းဝေးပါက သီးခြားနေရာဖြစ်သည့် တပ်ပြင်ပရှိအဆောက်အဦးတွင် မဲရုံဖွင့်ပေးမည် ဖြစ်ကြောင်း သျှမ်းပြည် ရွေးကောက်ပွဲ ကော်မရှင် အဖွဲ့ခွဲရုံး ဥက္ကဋ္ဌ ဦးထင်ကျော် ကပြောသည်။
“သျှမ်းပြည်နယ်မှာတော့ စစ်တပ်ထဲက မဲရုံမရှိတော့ဘူး။ တပ်ပြင်ပမှာ ရောက်သွားပြီ ” ဦးထင်ကျော် က ပြောသည်။
၂၀၂၀ ပါတီစုံ ဒီမိုကရေစီ အထွေထွေ ရွေးကောက်ပွဲသည် စစ်တပ်တွင်း မဲရုံ မထားသည့်အတွက် ပွင့်လင်းမြင်သာမှုဖြစ်အောင် ရှိရမည်ဖြစ်ကြောင်း တိုင်းရင်းသား ရေးရာ နှင့် ပြည်တွင်း ငြိမ်းချမ်းရေး ဖော်ဆောင်မှုကော်မတီ ဥက္ကဋ္ဌ ဦးခွန်မောင်သောင်း ကပြောသည်။
“ တပ် ဌာနချုပ်တွေကတော့ အပြင်ထွက်ဖို့တော့မလွယ်ဘူး။ တပ်ရင်းတွေကတော့ ပြင်ပမှာ ထွက်လို့တော့ ရတာပေါ့။ အပြင်မှာ ထွက်ဖြစ်တယ်ဆိုတော့ ပွင့်လင်းမြင်သာမှု အပြင်သာ ထုတ်ဖြစ်တယ်ဆိုရင် ပွင့်လင်းမြင်သာမှုဖြစ်အောင် ရှိရမယ်” ဟု ဦးခွန်မောင်သောင်း ကဆိုသည်။
ဆက်လက်ပြီး ဦးခွန်မောင်သောင်းက “ လွတ်လပ်တယ်။ မလွတ်လပ်ဘူး။ ပွင့်လင်းမြင်သာမှု ရှိတယ်။မရှိဘူး ဆိုတော့ ဆောင်ရွက်တဲ့အနေအထားပေါ်မှာ မူတည်တာပဲလေ ” ဟု ဦးခွန်မောင်သောင်း က သျှမ်းသံတော်ဆင့် ကိုပြောသည်။
ပွင့်လင်းမြင်သာမှု ရှိစေရန် အတွက် တပ်မတော်သားများနှင့် တပ်မိသားစုဝင်များအတွက် မဲရုံ ၆၃၂ ရုံထားမည်ဟု ဇူလိုင် ၃၁ရက် တွင် ပြည်ထောင်စု ရွေးကောက်ပွဲ ကော်မရှင် က ထုတ်ပြန်ကြေညာခဲ့သည်။
ထို့ပြင် သီးသန့် ရှိနေသည့် တပ်စခန်းများရှိ တပ်မဲရုံ တချို့ကိုအပြင်မထုတ်နိုင်ကြောင်း ဇူလိုင် ၂၅ရက် တွင် နေပြည်တော်၌ ပြုလုပ်သည့် တပ်မတော် သတင်းမှန်ပြန်ကြားရေး သတင်းစာရှင်းလင်းပွဲတွင် တပ်မတော်၏ ပြောရေးဆိုခွင့်ရှိသူ ဗိုလ်မှူးချုပ် ဇော်မင်းထွန်း က သတင်းမီဒီယာများကို ဖြေကြားခဲ့သည်။
ထို့ကြောင့် တပ်မဲရုံများကို တပ်ပြင်ထုတ်သော်လည်း တပ်မတော်သားများနှင့် တပ်မိသားစုဝင်များ မဲလာထည့်ခြင်း၊ မထည့်ခြင်းသည် သူတို့နှင့်သာဆိုင်ကြောင်း ဟု သျှမ်းပြည် ရွေးကောက်ပွဲ ကော်မရှင် ကပြောသည်။
သျှမ်းပြည်နယ်တွင် အစိုးရတပ်မတော် စခန်းများ အများဆုံးရှိသည့် ပြည်နယ် ဖြစ်သည်။
ပြီးခဲ့သည့် ၂၀၁၀ ခုနစ်ရွေးကောက်ပွဲ နှင့် ၂၀၁၅ ပါတီစုံ ဒီမိုကရေစီ အထွေထွေ ရွေးကောက်ပွဲ ကာလသည် တပ်မတော်သားများနှင့် မိသားစုဝင်များသည် စစ်တပ်တွင်းရှိ မဲရုံသာ မဲပေးခဲ့ကြကြောင်း သိရသည်။
