သြဂုတ်လအတွင်းကျင်းပရန်ပြင်ဆင်နေကြသည့် ၂၁ ရာစုပင်လုံညီလာခံ သို့ မဟုတ် ပြည်ထောင်စုငြိမ်းချမ်းရေးညီလာခံသို့ FPNCC  ကို ဖိတ်ကြားပါက  SSPP လည်းညီလာခံတက်ရောက်မည်ဟု SSPP ကပြောဆိုလိုက်သည်။

၂၁ ရာစုပင်လုံညီလာခံ စတုတ္ထအကြိမ်ကျင်းပနိုင်ရေး  ဇူလိုင်လနှောင်းပိုင်းကစပြီး ယနေ့အထိ နေပြည်တော်တွင် အစိုးရကိုယ်စားလှယ်နှင့်NCA  လက်မှတ်ထိုး တိုင်းရင်းသားကိုယ်စားလှယ်များ တွေ့ဆုံဆွေးနွေးကာပြင်ဆင်နေပြသည်။  အဆိုပါတွေ့ဆုံဆွေးနွေးပြင်ဆင်ရေးတွင် NCA  လက်မှတ်မထိုးရသေးသည့် အဖွဲ့များကိုလည်း ပါ၀င်စေလိုကြောင်းပြောဆိုတိုက်တွန်းထားသည်။ သို့သော်ယနေ့တိုင်  နေပြည်တော်အစိုးရက အပစ်ရပ်လက်မှတ်မထိုးရသေးသည့် ၀ တပ်ဖွဲ့ဉီးဆောင်သော FPNCC အား ဖိတ်ကြားခြင်းမရှိသေးပေ။

ရှမ်းပြည်တိုးတက်ရေးပါတီ ရှမ်းပြည်တပ်မတော် SSPP/SSA ပြောခွင့်ရ ဗိုလ်မှူးစ၀်သန်းအောင်က – “လာမယ့် ၂၁ ရာစုပင်လုံညီလာခံကနေ ကျနော်တို့ SSPP/SSA က  မျှော်လင့်ချက်ကြီးကြီးမားမားမရှိဘူး။ ညီလာခံတက်မလား မတက်ဘူးလားဆိုတာကတော့ FPNCC ကိုစောင့်ကြည့်ရပါမယ်။ ဖိတ်ကြားခံရမယ်ဆိုရင်တော့ အားလုံးအတူတူ တက်ကြပါမယ်။ ကျနော်တို့က FPNCC အဖွဲ့၀င်ဆိုတော့ နိုင်ငံရေးအပိုင်းဆိုရင် FPNCC ကိုဘဲ စောင့်ကြည့်ရပါမယ် ”- ဟုသျှမ်းသံတော်ဆင့်အားပြောသည်။

၂၁ ရာစု ပင်လုံညီလာခံအား သြဂုတ်လ ဒုတိယအပတ်တွင်ကျင်းပရန်စီစဉ်ထားကြသော်လည်း ပြင်ဆင်ရေးအပိုင်းနှင့်  ရှေ့လုပ်ငန်းစဉ်များ အတွက်မပြီးပြတ်နိုင်သေးသဖြင့် ညီလာခံအား သြဂုတ်လ ၁၉ ရက်မှ ၂၁ ရက်နေ့အထိ ရွှေ့ဆိုင်းထားသည်ဟုသိရပါသည်။

သျှမ်းပြည်မြောက်ပိုင်း ရှမ်းလူငယ်များအဖွဲ့ TYO ဉက္ကဌ စိုင်းဟန် က-  “လာမယ့် ၂၁ ရာစုပင်လုံညီလာခံကနေ  ရိုးသားမှုရှိဖို့ ၊ စစ်မှန်သောငြိမ်းချမ်းရေးကို တကယ်ရချင်သော စိတ်ဆန္ဒရှိဖို့အတွက် ကျနော်တို့ လူထုက အလိုရှိပါတယ်။”- ဟု သျှမ်းသံတော်ဆင့်အားပြောသည်။

တဖက်ကလည်း သျှမ်းပြည်မြောက်ပိုင်းသို့ အစိုးရတပ်မတော်က အင်အားဖြည့်တင်းနေမှုကြောင့် တိုက်ပွဲများဖြစ်ပွါးမည်ကို လူထုကစိုးရိမ်နေကြပြီး လာမည့် ၂၀၂၀ ရွေးကောက်ပွဲ မကျင်းပနိုင်မည်ကို စိုးရိမ်နေကြကြောင်းသိရသည်။ တဖက်တွင်လည်း ၂၁ ရာစုပင်လုံညီလာခံတက်ရောက်မည့် တိုင်းရင်းသားလက်နက်ကိုင်တပ်ဖွဲ့များအား ခြိမ်းခြောက်မှုတရပ်လည်းဖြစ်နိုင်ကြောင်း သုံးသပ်နေသူများလည်းရှိသည်။

၂၁ ရာစုပင်လုံညီလာခံ စတုတ္ထအကြိမ်အား ၂၀၁၉ ခုနှစ်ကတည်းက ကျင်းပရန်အစိုးရက စီစဉ်ထားသည်။ သို့သော်ဆွေးနွေးမှုများတစ်ဆို့မှုများကြောင့် ယနေ့တိုင်မကျင်းပနိုင်သေးဘဲရှိခဲ့ပါသည်။ပြီးခဲ့သည့် တတိယအကြိမ် ပင်လုံညီလာခံကလည်း ပြည်ထောင်စုမှ ခွဲမထွက်ရ ၊ လက်နက်ဖျက်သိမ်းရေး  ၊ တပ်မတော်တခုတည်းထားရှိရေးမူတို့နှင့်ပတ်သက်ပြီး ဆွေးနွေးနိုင်ခဲ့ခြင်းမရှိခဲ့ပေ။